Матвей 22
22
Кӧлысь вылӧ корӧмаяс йылысь велӧданвисьт
(Лк. 14:15-24)
1Исус висьталіс нӧшта ӧти велӧданвисьт:
2«Енэжвыв Юралӧмыс татшӧм. Ӧксы аслас пиыслы кӧлысь вӧчас. 3Сійӧ ыстас ассьыс кесйӧгъяссӧ корны йӧзӧс кӧлысь вылӧ. Корӧмаяс оз кӧсйыны локнысӧ. 4Ӧксы бара мӧдӧдас мукӧд кесйӧгъясӧс да тшӧктас висьтавны корӧмаяслы: ”Сёян-юан менам дасьтӧма, ӧшъяс-куканьяс начкӧма, ставыс дась. Локтӧй кӧлысясьны!” 5Корӧмаяс нинӧм туйӧ пуктасны корӧмсӧ: ӧтияс мунасны видз-му выланыс, мӧдъяс вузасьны. 6Мукӧдыс кутасны ӧксылысь кесйӧгъяссӧ, янӧдасны да виасны найӧс. 7Ӧксы кывлас та йылысь да ёна скӧрмас. Сійӧ мӧдӧдас ассьыс тышкайӧзсӧ вины морт виысьясӧс, а карсӧ тшӧктас сотны. 8Сэсся аслас кесйӧгъяслы шуас: ”Кӧлысь дась. Корӧмаясыд, вӧлӧмкӧ, шогмытӧмӧсь. 9Мунӧй туйвежъясӧ да корӧй кӧлысь вылӧ быдӧнӧс, кодкӧд паныдасянныд”. 10Кесйӧгъяс мунасны да корасны быдӧнӧс: лёкъясӧс и буръясӧс. Кӧлысь гажӧдчанін тырас йӧзӧн.
11Ӧксы пырас гажӧдчанінӧ видзӧдлыны воӧмаясӧс да аддзас мортӧс, коді абу кӧлысь паськӧма. 12Ӧксы юалас сылысь: ”Ёртӧй, кыдзи тэ пырин татчӧ кӧлысь паськӧмтӧгыс?” Сійӧ кыв оз шу. 13Сэки ӧксы шуас кесйӧгъясыслы: ”Ки-коксӧ кӧрталӧмӧн шыбитӧй сійӧс пемыдас. Сэні лоӧ бӧрдӧм да пинь йирӧм”. 14Шуа тіянлы: унаӧс корӧма, но этшаӧс бӧрйӧма».
Вот мынтӧм йылысь
(Мк. 12:13-17; Лк. 20:20-26)
15Фарисейяс мунісны да ас костаныс сёрнитчисны Исусӧс кыйны сёрниас. 16Найӧ мӧдӧдісны Сы дінӧ Ирӧдлысь йӧзсӧ да ассьыныс велӧдчысьяссӧ. Локтӧмаяс шуисны: «Велӧдысь, ми тӧдам, мый Тэ веськыда сёрнитан да веськыда велӧдан Енлӧн туйӧ. Тэ он пов йӧзлӧн шуасьӧмысь, он видзӧд морт вылӧ. 17Висьтав, миянлы позьӧ вот мынтыны кесарлы?» 18Налысь наянлунсӧ тӧдӧмӧн Исус шуис: «Кык бана шаньгаяс! Мыйла ті зілянныд кыйны Менӧ? 19Петкӧдлӧй Меным вот мынтан сьӧмнытӧ». Найӧ мыччисны Сылы динар. 20Исус юаліс: «Кодлӧн тані чужӧмыс-нимыс?» 21Найӧ вочавидзисны: «Кесарлӧн». Исус шуис налы: «Кесарлысь сетӧй кесарлы, а Енлысь – Енлы». 22Тайӧс кылӧмысь найӧ чуймисны, сэсся колисны Исусӧс да мунісны.
Саддукейяс юасьӧны ловзьӧм йылысь
(Мк. 12:18-27; Лк. 20:27-40)
23Сійӧ лунӧ локтісны Исус дінӧ саддукейяс, кодъяс шуӧны, ловзьӧмыс пӧ абу. Найӧ юалісны Исуслысь: 24«Велӧдысь, Мӧисей шулӧма, мый ныв-питӧм морт кӧ кулас, вокыслы колӧ босьтны кулӧм вокыслысь дӧвасӧ гӧтырӧ да нюжӧдны вокыслысь рӧдсӧ. 25Тані миян вӧлі сизим вок. Ыджыдыс гӧтрасис, сэсся куліс, ныв-пиыс сылӧн эз вӧв. Гӧтырсӧ вокыс босьтіс. 26Тадзи лои мӧд вокыскӧд, коймӧдыскӧд, став сизимнанныскӧд. 27Медбӧрын аньыс куліс. 28Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?» 29Исус вочавидзис: «Гижӧдъяссӧ да Енлысь вынсӧ ті онӧ тӧдӧй, та вӧсна ылалӧмныд. 30Ловзьӧмаяс оз гӧтрасьны да верӧс сайӧ оз мунны. Найӧ Енлӧн енэжвыв анделъяс кодьӧсь. 31Ловзьӧм йылысь шуа – ті ӧмӧй энӧ лыддьылӧй, мый Енмыс шуӧма: 32”Ме Ӧвраамлӧн Ен, Исааклӧн Ен да Яковлӧн Ен”? Енмыс абу кулӧмаяслӧн Ен, Сійӧ ловъяяслӧн Ен». 33Йӧзыс шензисны Сылӧн велӧдӧмысь.
Медыджыд тшӧктӧм
(Мк. 12:28-34; Лк. 10:25-28)
34Фарисейяс кор кылісны, мый Исус ланьтӧдӧма саддукейясӧс, чукӧртчисны ӧтлаӧ. 35На пиысь ӧти, Индӧдӧ велӧдысь, Исусӧс кыйӧм могысь юаліс: 36«Велӧдысь, Индӧдас кутшӧм тшӧктӧм медыджыд?» 37Исус шуис: «Радейт Господьӧс, ассьыд Ентӧ, став сьӧлӧмнад, став олӧмнад да став мывкыднад. 38Тайӧ медыджыд да медтӧдчана тшӧктӧм. 39Мӧд тшӧктӧмыс – радейт матыссатӧ асьтӧ моз. Тайӧ кык тшӧктӧмыс ӧткодь, 40на вылӧ подуласьӧ став Индӧдыс да пророк гижӧдъяс».
Давид пи йылысь юалӧм
(Мк. 12:35-37; Лк. 20:41-44)
41Исус юаліс чукӧртчӧм фарисейяслысь: 42«Мый шуанныд Кристос йылысь? Кодлӧн Сійӧ пи?» Найӧ вочавидзисны: «Давидлӧн». 43Сэки Исус юаліс: «Мыйла нӧ Ловсянь сёрнитігас Давид шуӧ Сійӧс Господьӧн:
44– Господь шуис менам Ыджыдлы:
”Пукав Менам веськыдладорын,
кытчӧдз ог пукты Тэнад кок улӧ Тэнӧ мустӧмтысьясӧс”.
45Давид кӧ шуӧ Сійӧс Господьӧн, кыдзи нӧ Сійӧ Давидлы пиӧн лоӧ?»
46Исуслы некод эз вермы воча кыв шуны. Сійӧ лунсянь некод нин эз лысьт юасьны Сылысь.
Currently Selected:
Матвей 22: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
