Матвей 12

Шойччан лун йылысь

(Мк. 2:23-28; Лк. 6:1-5)

1Шойччан лунӧ Исус мунӧ вӧлі нянь муяс вомӧн. Велӧдчысьяслӧн кынӧмныс сюммис, и мунігмозныс найӧ пондісны нетшкыны шепсӧ да сёйны. 2Тайӧс аддзылісны фарисейяс да шуисны Исуслы: «Видзӧдлы, мый Тэнад велӧдчысьясыд вӧчӧны! Тайӧс оз позь вӧчны шойччан лунӧ». 3Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд? 4Сійӧ пырис Ен керкаӧ да сёйис аслас йӧзкӧд вежа нянь. Тайӧс налы вӧчнысӧ эз позь, сӧмын попъяслы позис. 5Ті ӧмӧй энӧ лыддьылӧй Индӧдысь, мый шойччан лунӧ попъяс уджалӧны крамын, но шойччан лунсӧ торкалӧмысь найӧ абу мыжаӧсь. 6Висьтала тіянлы: тані Сійӧ, коді крам дорысь ыджыдджык. 7Гижӧма: ”Буралӧм тіянсянь кӧсъя, ог вись вайӧм”. Гӧгӧрвоинныд кӧ тайӧс, сэки эськӧ энӧ мыжалӧй мыжтӧмъясӧс. 8Морт Пи шойччан лун вылын ыджыдыс».

Косьмӧм киаӧс бурдӧдӧм

(Мк. 3:1-6; Лк. 6:6-11)

9Сэтысь мунӧм бӧрын Исус пырис синагогаӧ. 10Сэні вӧлі косьмӧм киа морт. Фарисейяс корсисны помка мыжавны Исусӧс да юалісны Сылысь: «Позьӧ-ӧ шойччан лунӧ бурдӧднысӧ?» 11Исус вочавидзис: «Тіян ыжныд кӧ шойччан лунӧ усяс гуӧ, онӧ ӧмӧй лэптӧй сійӧс сэтысь? 12Мортыс ӧмӧй абу донаджык ыжысь? Сідзкӧ, бурсӧ позьӧ вӧчны шойччан лунӧ». 13Сэсся Исус шуис висьысьлы: «Нюжӧд китӧ». Сійӧ нюжӧдіс, и киыс пырысь-пыр бурдіс, лои мӧдыс кодь. 14Сэки фарисейяс петісны да пондісны сёрнитны Исусӧс виӧм йылысь.

Енлӧн бӧрйӧм кесъялысь

15Кор Исус тӧдмаліс та йылысь, муніс сэтысь. Сы бӧрся вӧтчис уна йӧз. Исус бурдӧдаліс висьысьясӧс 16да ӧлӧдіс найӧс Сы йылысь висьтавлӧмысь. 17Тадзи иніс Исай пророклӧн шуӧмыс:

18– Со, Менам Кесъялысьӧй,

Менам мусаӧй,

Ме бӧрйи Сійӧс,

Менам сьӧлӧмӧй нимкодясьӧ Сыӧн.

Ме мӧдӧда Сы вылӧ Ассьым Лолӧс.

Сійӧ ваяс веськыда мыждӧм быд войтырлы.

19Сійӧ оз вензьы, оз горзы,

ывлаын Сійӧс он кыв.

20Веськыда мыждӧмсӧ пӧрттӧдз

Сійӧ чегыштӧм идзас оз чег,

дзузган би оз кусӧд.

21Войтыръяс пондасны Сы вылӧ лача кутны.

Кодсянь Исуслӧн выныс?

(Мк. 3:20-30; Лк. 11:14-23; 12:10)

22Исус дінӧ вайӧдісны пеж лолӧн кутӧм мортӧс, сійӧ вӧлі синтӧм, эз вермы сёрнитны. Исус бурдӧдіс сійӧс, и сійӧ пондіс сёрнитны да аддзыны. 23Став йӧзыс чуймисны, ӧта-мӧдныслысь юасисны: «Збыльысь-ӧ Сійӧ Давид Пи?» 24Тайӧс кывлісны фарисейяс да шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.

25Налысь мӧвпъяссӧ тӧдӧмӧн Исус шуис:

«Ас муын олысьяс кӧ ас костаныс тышкасьӧны, тайӧ муыс кушмас. Зыксьӧмӧн олысь карыд да керкаыд дыр оз сулав. 26Сӧтанаыс кӧ сӧтанасӧ вӧтлӧ, сійӧ аслыс паныд тышкасьӧ. Дыр-ӧ кутчысяс сылӧн ыджыдалӧмыс? 27Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны? Найӧ тіянӧс мыждасны. 28Ме кӧ Ен Лолӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.

29Вермас-ӧ кодкӧ пырны вына мортлӧн керкаӧ да сійӧс кӧртавтӧг босьтны сылысь эмбурсӧ? Сӧмын сійӧс кӧрталӧм бӧрын вермас петкӧдны сылысь эмбурсӧ. 30Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ.

31Та вӧсна висьтала тіянлы: мортлысь быд мыж да быд омӧльтӧм лоӧ прӧститӧма, но Вежа Лолӧс омӧльтӧм оз ло прӧститӧма. 32Коді лёкӧдас Морт Пиӧс, сійӧс лоӧ прӧститӧма. Но коді лёкӧдас Вежа Лолӧс, сійӧс оз ло прӧститӧма тайӧ олӧмас, весиг локтанаас».

Бур да лёк вотӧс

(Лк. 6:43-45)

33«Бур пу вайӧ бур вотӧс, лёк пу – лёкӧс. Путӧ донъялӧны вотӧс сертиыс. 34Вижля йылӧм! Верманныд-ӧ бурсӧ висьтавны, асьныд кӧ лёкӧсь? Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ. 35Бур морт аслас бур видзанінысь бурсӧ петкӧдӧ, лёк морт аслас лёк видзанінысь лёксӧ петкӧдӧ. 36Шуа тіянлы: быд ковтӧм кывйысь мыждан лунӧ ковмас кывкутны. 37Аслад кывъяс вӧсна мыжман, аслад кывъяс вӧсна и мыждӧмысь мынан».

Ионалӧн пас

(Мк. 8:11-12; Лк. 11:29-32)

38Сэки фарисейяс да Индӧдӧ велӧдысьяс пиысь кодсюрӧ корисны: «Велӧдысь, петкӧдлы миянлы индысьпас».

39Исус воча шуис: «Лёк да пежас ылалӧм йӧз кӧсйӧны аддзывны индысьпас, но Иона пророк пасысь кындзи оз ло налы мӧдыс. 40Куим лун да куим вой Иона вӧлі ыджыд чери рушкуын. Тадзи куим лун да куим вой Морт Пи лоӧ му пыдӧсын. 41Ниневия карын олысьяс сувтасны мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь. Но тані тіянкӧд Сійӧ, коді Иона дорысь ыджыдджык. 42Лунвыв муысь ӧксы-ань сувтас мыждан лунӧ ӧнія олысьяскӧд да мыжалас найӧс. Ӧд му помсяньыс сійӧ воліс кывзыны Соломонлысь мывкыд сёрнисӧ. Но тані тіянкӧд Сійӧ, коді Соломон дорысь ыджыдджык».

Пеж ловлӧн бӧр локтӧм

(Лк. 11:24-26)

43«Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы. 44Сэки шуӧ: ”Бӧр муна важ оланінӧ, кытысь петі”. Локтӧм бӧрас аддзӧ: оланінсӧ чышкӧма-пелькӧдӧма, и олысьыс сэні абу. 45Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ. Тадзи жӧ лоӧ ӧнія лёк йӧзлы».

Коді Исуслы вок, чой да мам?

(Мк. 3:31-35; Лк. 8:19-21)

46Йӧзкӧд Исуслӧн сёрнитігкостіыс локтісны Сылӧн мамыс да вокъясыс. Найӧ сулалісны ывлаас да кӧсйисны сёрнитыштны Сыкӧд. 47Ӧти морт шуис Исуслы: «Мамыд да вокъясыд ывлаасӧсь, Тэкӧд кӧсйӧны сёрнитны». 48Исус воча шуис: «Коді Меным мамыс? Кодъяс Меным вокъясыс?» 49Велӧдчысьяс вылас индӧмӧн шуис: «Со кодъяс Меным вокъясыс да мамыс. 50Енэжвыв Батьлӧн кӧсйӧм серти олысь – Меным вок, чой да мам».

Currently Selected:

Матвей 12: КБ

Highlight

Copy