Матвей 1

Исуслӧн ордпу

(Лк. 3:23-38)

1Исус Кристослӧн ордпуыс петӧ Ӧвраамсянь, сэсся Давидсянь. Сылӧн чужанвужйыс татшӧм.

2Ӧвраамлӧн чужӧма Исаак, Исааклӧн – Яков, Яковлӧн чужӧмаӧсь Иуда да сылӧн вокъясыс. 3Иудалӧн чужӧмаӧсь Парес да Зерах, налӧн мамныс вӧлӧма Фамар. Пареслӧн чужӧма Хецрон, Хецронлӧн – Рам, 4Рамлӧн – Аминадав, Аминадавлӧн – Наашон, Наашонлӧн – Салмон. 5Салмонлӧн чужӧма Вооз, сылӧн мамыс вӧлӧма Раав. Воозлӧн чужӧма Овид, сылӧн мамыс вӧлӧма Руфа. Овидлӧн чужӧма Ессей, 6Ессейлӧн чужӧма Давид ӧксы.

Давид ӧксылӧн чужӧма Соломон, сылӧн мамыс вӧлӧма Урийлӧн гӧтыр. 7Соломонлӧн чужӧма Ровоам, Ровоамлӧн – Авий, Авийлӧн – Аса, 8Асалӧн – Иосафат, Иосафатлӧн – Иорам, Иорамлӧн – Озей. 9Озейлӧн чужӧма Иотам, Иотамлӧн – Ахаз, Ахазлӧн – Езекей. 10Езекейлӧн чужӧма Манассей, Манассейлӧн – Амон, Амонлӧн – Иосей. 11Иосейлӧн чужӧма Ехояким, Ехоякимлӧн чужӧмаӧсь Еконей да сылӧн вокъясыс. Тайӧ вӧлӧма Израиль войтырӧс Вавилон муӧ вӧтлытӧдз на.

12Вавилонӧ вӧтлӧм бӧрын Еконейлӧн чужӧма Шеалтиэл, Шеалтиэллӧн – Зоровавель, 13Зоровавельлӧн – Авиуд, Авиудлӧн – Эляким, Элякимлӧн – Азор. 14Азорлӧн чужӧма Садок, Садоклӧн – Аким, Акимлӧн – Элиуд, 15Элиудлӧн – Элазар, Элазарлӧн – Маттан, Маттанлӧн – Яков. 16Яковлӧн чужис Ӧсип. Сылӧн Мария гӧтырыс чужтіс Исусӧс, кодӧс шуисны Кристосӧн#1:16 Кристос – Енлӧн Мавтыштӧмаыс.

17Тадзи Ӧвраамсянь Давидӧдз ставнас вӧлі дас нёль чужанвуж. Вавилонӧ вӧтлытӧдз Давидсянь – дас нёль чужанвуж. Вавилонӧ вӧтлӧмсянь Кристосӧдз – бара дас нёль чужанвуж.

Исуслӧн му вылын чужӧм

(Лк. 2:1-7)

18Исус Кристос чужис тадзи.

Исуслӧн Мария мамыс вӧлі кикутӧма Ӧсипкӧд. Налӧн ӧтлаасьтӧдз на Мария, вӧлӧмкӧ, сьӧктӧма Вежа Ловсянь#1:18 Вежа Лов – Святой Дух. 19Ӧсип вӧлі веськыда олысь морт. Сійӧ эз кӧсйы йӧзӧдны Марияӧс, та вӧсна шуис гусьӧн лэдзны сійӧс.

20Кор Ӧсип мӧвпаліс тадзи, Господьлӧн андел петкӧдчис сылы вӧтас да шуис: «Ӧсип, Давид пи, эн пов босьтны Мариятӧ гӧтырӧ. Сьӧлӧм улас сылӧн кагаыс Вежа Ловсянь. 21Марияыд чужтас пи, пуктан Сылы Исус#1:21 Исус – нимыслӧн вежӧртасыс ”Господь мездӧ”. ним, Сійӧ мездас Ассьыс войтырсӧ мыжъяссьыныс».

22Ставыс тадзи лои, медым иніс пророк пыр Господьлӧн шуӧмыс:

23– Ныв сьӧктас, сэсся пи чужтас.

Эммануил ним Сылы пуктасны.

Нимыс висьталӧ: миянкӧд Ен.

24Садьмӧм бӧрас Ӧсип вӧчис Господьлӧн андел тшӧктӧм серти: босьтіс Марияӧс гӧтырӧ, 25но эз узьлы сыкӧд. Мария чужтіс пи, ассьыс медводдза кагасӧ. Ӧсип пуктіс Сылы Исус ним.

Currently Selected:

Матвей 1: КБ

Highlight

Copy