Галатӧ 6
6
Нуӧй ӧта-мӧдныдлысь сьӧкыдсӧ
1Вокъяс, мыжмас кӧ кодкӧ, сэки ті, Лов серти олысьяс, веськӧдӧй сэтшӧмсӧ рам сьӧлӧмӧн. Видзӧдӧй ас бӧрсяныд, мед асьныд энӧ шедӧй ылӧгас. 2Нуӧй ӧта-мӧдныдлысь сьӧкыдсӧ, тадзи пӧртанныд олӧмӧ Кристослысь тшӧктӧмсӧ. 3Ас йывсьыс вывтіа мӧвпалысь, коді збыльвылас нинӧм, ылӧдлӧ ачыс асьсӧ. 4Видзӧдлы аслад уджъяс вылӧ, сэки мукӧд водзын кыпӧдчытӧг верман донъявны асьтӧ. 5Ӧд быдӧн нуӧ ассьыс нӧб.
6Ен кывйӧн туйдӧдӧмаыс мед юксяс быд бурнас туйдӧдысьыскӧд.
7Асьнытӧ энӧ ылӧдлӧй – Енмыс серамтуйын оз ло. Мортыд мый кӧдзас, сійӧс и вундас. 8Кӧдзас кӧ вир-яяс, вундас сысянь кулӧм. Лолас кӧ кӧдзас, вундас Ловсянь помтӧм олӧм. 9Бурсӧ вӧчигӧн огӧ сетчӧй мудзӧмас, ӧд ас кадӧ вундам, огӧ кӧ лэдзӧй кинымӧс. 10Эм кӧ на позянлун, вӧчамӧй бурсӧ быдӧнлы, торъя нин эскысь чой-воклы.
Ӧлӧдӧм да чолӧмъяс
11Ӧні ме гижа тіянлы аслам киӧн, ті аддзанныд менсьым гырысь шыпасъясӧс. 12Найӧ, кодъяс кӧсйӧны шогмыны йӧзлы, тшӧктӧны тіянӧс вундыштчыны сӧмын сы могысь, медым найӧс эз вӧтлыны Кристос крест вӧсна. 13Ӧд вундыштчӧмаяс асьныс оз овны Индӧд сертиыс. Тіян вундыштчӧмныд налы сӧмын помка ошйысьны. 14Ме ог кӧсйы ошйысьны нинӧмӧн, ошйыся сӧмын миян Господь Исус Кристослӧн крестӧн. Сэні муюгыдсӧ тувъялӧма меным, а менӧ – муюгыдыслы. 15Тэ кӧ Исус Кристос пытшкын, вундыштчӧмыд-ӧ, абу-ӧ вундыштчӧмыд – тайӧ нинӧм оз сет. Колӧ, медым выль морт тэ вӧлін. 16Буралӧм да лӧньлун тайӧс тӧд выланыс кутысьяслы да Енлӧн Израильлы.
17Водзӧ энӧ сьӧктӧдӧй менӧ, ӧд вир-яйын ме нуа Господь Исуслысь дойяссӧ.
18Вокъяс, миян Господь Исус Кристослӧн буралӧмыс тіянкӧд. Аминь.
Currently Selected:
Галатӧ 6: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
