Галатӧ 4

1Нӧшта висьтала: пиыс, кодлы вуджӧ бать овмӧсыс, ичӧт арлыднас нинӧмӧн оз торъяв кесйӧгысь, кӧть сійӧ став вылас нин ыджыд. 2Батьыслӧн урчитӧм кадӧдз керканас веськӧдлӧны мукӧдъяс, ачыс пиыс кага видзысь киын.

3Кодыр ми вӧлім кага кодьӧсь, вӧлім муюгыд вынъяслӧн кабыр улынӧсь. 4А кор воис урчитӧм кадыс, Енмыс мӧдӧдіс Ассьыс Писӧ, кодӧс ань чужтіс. Ен Пи оліс Индӧд улын, 5медым ньӧбны Индӧд улын олысьясӧс, босьтны миянӧс ныв-пи пыдди. 6Ӧні ті Енмыслӧн ныв-пи. Та вӧсна Ен сетіс сьӧлӧманыд Пиыслысь Ловсӧ. Тайӧ Лолыс шыасьӧ: «Авва, Батьӧй!» 7Сідзкӧ, ті абу нин кесйӧгъяс, ті – ныв-пи. Ныв-пи кӧ, сідзкӧ, Исус Кристос пыр Енсянь вичмӧдӧмасӧ босьтысьяс.

Эскысьяс вӧсна майшасьӧм

8Кор ті энӧ на тӧдӧй Енсӧ, вӧлінныд мукӧд енъяслӧн кипод улынӧсь. Збыльвылас, найӧ абу енъяс. 9Но ӧні ті тӧданныд Енсӧ, бурджык шуны, Енмыс тӧдӧ тіянӧс. Сідзкӧ, мыйла ті бӧр бергӧдчанныд муюгыдса ковтӧм жеб вынъяс дінӧ да важ мозыс бара кӧртасянныд сэтчӧ? 10Кутчысянныд торъя лунъясӧ, тӧлысьясӧ, воясӧ да кадъясӧ. 11Пола тіян вӧсна – буракӧ, менам весьшӧрӧ мырсьӧма-уджалӧма.

12Вокъяс, кора тіянӧс, лоӧй ме кодь, ӧд ме тіян кодь. Ті менӧ нинӧмӧн энӧ дӧзмӧдӧй. 13Ті тӧданныд, мый тіян дінӧ волігӧн ме висьми, но тайӧ сетіс позянлун медводдзаысь висьтавны тіянлы Бур Юӧрсӧ. 14Висьӧмӧй вылӧ видзӧдтӧг ті сибӧдінныд менӧ, энӧ кедзовтӧй да энӧ эновтӧй. Сибӧдінныд Ен анделӧс моз, Исус Кристосӧс моз. 15Кутшӧм шудаӧсь ті сэки вӧлінныд. А ӧні мый лои? Тіян йылысь верма шуны: позис кӧ, ті ассьыныд синтӧ эськӧ перйинныд да сетінныд меным. 16Збыльсӧ висьталӧм вӧсна ме ӧмӧй тіянлы паныд сувтысьӧн лои?

17Кодсюрӧ оз бур могысь тӧждысьны тіян вӧсна. Найӧ кӧсйӧны янсӧдны миянӧс, медым ті тӧждысинныд на вӧсна. 18Тӧждысьӧмыд бур, ті кӧ пыр вӧчанныд тайӧс, онӧ сӧмын ме дырйи. 19Челядь, меным бара лоӧ сьӧкыда чужтыны тіянӧс, кытчӧдз Кристос оз тыдовтчы тіян олӧмын. 20Кӧсйи эськӧ ӧні лоны тіян дінын, мед тӧдны, кутшӧм ногӧн сёрнитны тіянкӧд. Ме ог гӧгӧрво тіянӧс!

Агар да Саара

21Висьталӧй меным, Индӧд улын овны кӧсйысьяс, гӧгӧрвоанныд-ӧ ті, мый висьталӧ Индӧдыс? 22Сэні гижӧма, мый Ӧвраамлӧн вӧлі кык пи: ӧтисӧ чужтіс кесйӧгыс, мӧдсӧ – гӧтырыс. 23Кесйӧглӧн пиыс чужис морт кӧсйӧмсянь, гӧтырыслӧн – Енлӧн кӧсйысьӧм серти. 24Тайӧ висьталӧ кык йитӧд йылысь. Ӧти йитӧдсӧ вӧлі кӧрталӧма Синай керӧсын – тайӧ Агар, сылӧн ныв-пиыс кесйӧгъяс. 25Агарыс индӧ Аравияын Синай керӧс вылӧ да лӧсялӧ ӧнія Ерусалимлы. Сійӧ аслас челядькӧд кесйӧг туйын. 26Енэжвыв Ерусалимыс – мездлуна кар, сійӧ миянлы ставнымлы мам. 27Гижӧма:

– Нимкодясь, сьӧктыны вермытӧм,

кага вайлытӧм ань!

Гораа нимкодясь да гажӧдчы,

чужтан дой тӧдлытӧм ань!

Ӧд эновтӧмалӧн ныв-пиыс уна,

ёна унджык верӧсыскӧд олысьлӧн дорысь.

28Вокъяс, ми Исаак моз кӧсйысьӧм серти чужысь ныв-пи. 29Сэки вир-яй кӧсйӧмсянь чужысьыс вӧтліс Ловсянь чужысьсӧ. Тадзи тшӧтш ӧні. 30Гижӧдыс мый висьталӧ? Вӧтлы кесйӧг аньсӧ пиыскӧд. Тэнад овмӧсыд мед оз вудж сылӧн пилы, а вуджас сӧмын гӧтырлӧн пиыслы. 31Вокъяс, ми абу кесйӧгыслӧн, а гӧтырыслӧн ныв-пи.

Currently Selected:

Галатӧ 4: КБ

Highlight

Copy