Галатӧ 1

1Гижӧ Павел. Менӧ пуктӧма апостолавны абу йӧз кӧсйӧм серти. Эз морт менӧ пукты апостолӧ, а Исус Кристос да Сійӧс ловзьӧдысь Ен Бать. 2Вокъяскӧд ставӧн ми чолӧмалам галатса вичкояс. 3Буралӧм да лӧнь олӧм тіянлы Ен Батьсянь да миян Господь Исус Кристоссянь. 4Ен Батьнымлӧн кӧсйӧмыс серти Кристос сетіс Асьсӧ миян мыжъяс вӧсна, медым мездыны миянӧс лёкнас тырӧм муюгыдсьыс. 5Ошкӧм Сылы нэмъяс чӧж! Аминь.

Эм сӧмын ӧти Бур Юӧр

6Ме шензя: ті сэтшӧм ӧдйӧ кежинныд Сыысь, коді Кристослӧн буралӧмнас корис тіянӧс. Кутшӧм тэрыба ті сибӧданныд мӧдпӧлӧс бур юӧрсӧ. 7Збыльвылас кӧ, мӧд бур юӧрыс абу, эмӧсь сӧмын тіянӧс шӧйӧвоштысьяс. Найӧ кӧсйӧны дзугны Кристос йылысь Бур Юӧрсӧ. 8Но весиг кӧ ми либӧ енэжсянь андел пондам висьтавны мӧд нога, огӧ сійӧ Бур Юӧрсӧ, мый водзынсӧ тіянлы висьтавлім – мед лоӧ ёрӧма! 9Водзынсӧ ми шулім нин, ӧні нӧшта шуа: пондас кӧ кодкӧ висьтавны оз сійӧ Бур Юӧрсӧ, мый ті миянсянь сибӧдінныд, мед лоӧ ёрӧма сійӧс!

10Йӧзсянь-ӧ, Енсянь-ӧ виччыся ме ошкӧмсӧ? Йӧзлы ӧмӧй зіля шогмынысӧ? Ме кӧ зіли шогмыны йӧзлы, сэки эськӧ эг вӧв Кристослӧн кесйӧг.

Ен кӧсйӧм серти апостол

11Вокъяс, тӧдӧй: меӧн висьталӧм Евангелльӧыс абу мортсянь. 12Эг мортсянь ме босьт сійӧс, эз морт менӧ велӧд, но ачыс Исус Кристос восьтіс меным сійӧс.

13Ті, дерт, кывлінныд, мый водзынсӧ ме иудей эскӧм дор вӧлі, ёна вӧтлі Енлысь вичкосӧ да зіли бырӧдны сійӧс. 14Иудей эскӧмын ме пановті тшӧтшъяясӧс, ме вӧлі чорыда кутчысьӧма батьяслӧн шуӧмӧ. 15Но Енмыс менӧ мам кынӧмсянь нин бӧрйӧма да Аслас буралӧмнас корӧма. 16Сійӧ восьтіс меным Ассьыс Писӧ, медым ме висьтавлі Сы йылысь Бур Юӧрсӧ ентӧдтӧмъяслы. Сэки ме эг кут корсьны мортсянь туйдӧдӧм, 17весиг эг мун Ерусалимӧ меӧдз на пуктӧм апостолъяс дінӧ. Ме муні Аравияӧ, сэсянь бӧр локті Дамаскӧ.

18Сӧмын куим во мысти ветлі Ерусалимӧ тӧдмасьны Петыркӧд да кык вежон олі сы ордын. 19Мукӧд апостолсӧ ме эг аддзыв Господьлысь Яков воксӧ кындзи.

20Ен водзын шуа: мый гижа тіянлы, ставыс тайӧ збыль.

21Сэсся ме муні Сирия да Киликия муясӧ. 22Иудеяын Кристослӧн вичкояс менӧ весиг эз на аддзывны. 23Сӧмын кывлӧмаӧсь ме йылысь, миянӧс пӧ вӧтлысь, эскӧмсӧ бырӧдысь ӧні ачыс ышӧдӧ эскыны. 24Найӧ аттьӧалісны да ошкисны Енсӧ меысь.

Currently Selected:

Галатӧ 1: КБ

Highlight

Copy