Ап. уджъяс 23

Павел веськӧдлан котыр водзын

1Павел сюся видзӧдліс веськӧдлан котыр вылӧ да шуис: «Вокъяс! Тайӧ лунӧдзыс ме пыр олі Ен водзын сӧстӧм сьӧлӧмӧн». 2Сэки Ананий нима аркирей тшӧктіс Павел дінын сулалысьӧс кучкыны сылы вомас. 3Павел шуис сылы: «Тэнӧ Енмыс пондас нӧйтны, еджыдӧн мавтӧм стен! Тэ пуксин мыждыны менӧ Индӧд серти, но ачыд Индӧдыслы паныд сувтан, тшӧктан нӧйтны менӧ». 4Сэні сулалысьяс шуисны Павеллы: «Енлысь аркирейӧс лёкӧдан?» 5Павел воча шуис: «Ме эг тӧд, вокъяс, мый сійӧ аркирей. Дерт, гижӧма: ”Эн лёкӧд ас войтырыдлысь юралысьтӧ”».

6Веськӧдлан котырын вӧліны саддукейяс да фарисейяс. Тайӧс казялӧм бӧрын Павел гораа шыасис: «Вокъяс! Ме ачым фарисей, фарисейлӧн пи. Менӧ мыжалӧны сыысь, мый ме эска кулӧмаяслӧн ловзьӧмӧ». 7Тайӧс кылӧм бӧрын фарисейяс да саддукейяс вензьыны пондісны, тадзи чукӧртчӧмаяс юксисны кык пельӧ. 8Ӧд саддукейяс шуӧны, мый ловзьӧмыс абу, весиг анделъяс и ловъяс абуӧсь, а фарисейяс шуӧны, ставыс пӧ тайӧ эм. 9Вензьысьяс лёкысь горзыны пондісны. Сэки фарисейяс лыдысь Индӧдӧ велӧдысьяс сувтісны да шуисны: «Тайӧ мортыслысь ми нинӧм лёксӧ огӧ аддзӧй. Гашкӧ, збыльысь сыкӧд сёрнитіс Лов либӧ андел. Вайӧ, огӧ пондӧй паныд сувтны Енмыслы». 10Но вензьӧмыс ӧтарӧ ӧддзис, сюрс тышкамортӧн веськӧдлысь весиг повзис, мый косявласны Павелӧс. Та вӧсна тшӧктіс шыпуртаяслы босьтны Павелӧс веськӧдлан котыр водзысь да нуӧдны изкарӧ.

11Сійӧ войнас Господь сувтіс Павел водзӧ да шуис: «Эн пов, Павел. Ӧні тэ Ерусалимын висьталін Ме йылысь, тадзи тэныд ковмас висьтавны тшӧтш Римын».

Павеллы паныд гусьӧн сёрнитчӧм

12Асывнас иудейяс пӧвстысь кодсюрӧ ас костаныс сёрнитчӧмӧн кыв сетісны, мый оз кутны сёйны-юны, кытчӧдз оз вины Павелӧс. 13Тадзи шуисны вӧчны нелямын сайӧ морт. 14Найӧ локтісны аркирейяс да юрнуӧдысьяс дінӧ да шуисны: «Ми кыв сетім Ен водзын, мый воманым дзик нинӧм огӧ босьтӧй, кытчӧдз огӧ виӧй Павелӧс. 15Ӧні тіянлы веськӧдлан котыркӧд колӧ юӧртны сюрс тышкамортӧн веськӧдлысьлы, медым сійӧ аски вайӧдас Павелӧс тіян дінӧ. Шуӧй, мый ті кӧсъянныд бурджыка тӧдмавны, мыйысь сійӧс мыжалӧны. А ми вайӧдігас виам Павелӧс».

16Та йылысь кывліс Павел чойлӧн пиыс. Сійӧ муніс изкарӧ, пырис Павел дорӧ да ставсӧ висьталіс. 17Сэки Павел корис сё тышкамортӧн веськӧдлысьӧс да шуис: «Тайӧ том мортсӧ колӧ нуӧдны сюрсӧн веськӧдлысь дінӧ, сійӧ мыйкӧ кӧсйӧ висьтавны сылы». 18Сёӧн веськӧдлысь вайӧдіс том мортӧс сюрсӧн веськӧдлысь дінӧ да шуис: «Миянын пукалысь Павел корис вайӧдны тайӧ том мортсӧ тэ дінӧ, сійӧ кӧсйӧ мыйкӧ висьтавны».

19Сюрсӧн веськӧдлысь босьтіс том мортӧс киӧдыс, сэсся бокӧ вешйӧмӧн юаліс сылысь: «Мый тэ кӧсъян висьтавны?» 20Сійӧ шуис: «Иудейяс сёрнитчӧмаӧсь корны тэнӧ, медым тэ аски вайӧдін Павелӧс веськӧдлан котыр водзӧ. Найӧ ылӧдлӧмӧн корасны бурджыка тӧдмавны, мыйысь Павелыс мыжа. 21Но тэ найӧс эн кывзы. На чукӧрысь нелямын сайӧ морт кыйӧдӧмӧн лӧсьӧдчӧны вины Павелӧс. Найӧ кыв сетӧмаӧсь, мый оз кутны сёйны-юны, кытчӧдз оз вины сійӧс. Найӧ ӧні дасьӧсь нин, виччысьӧны сӧмын тэнсьыд шуӧмтӧ». 22Сюрсӧн веськӧдлысь лэдзис том мортӧс да ӧлӧдіс: «Некодлы эн висьтав, мый йылысь тэ меным юӧртін талун».

Павелӧс Кесарияӧ нуӧдӧм

23Сюрс тышкамортӧн веськӧдлысь корис сёӧн веськӧдлысьясысь кыкӧс да шуис: «Дасьтӧй кыксё пода тышкамортӧс, сизимдас верзьӧмаӧс да кыксё лыйсьысьӧс. Ӧкмыс час рытын лоӧй дасьӧсь мӧдӧдчыны Кесарияӧ. 24Павеллы тшӧтш дасьтӧй вӧвъяссӧ да лючки-бура вайӧдӧй сійӧс Феликс юралысь дінӧ».

25Сюрсӧн веськӧдлысь мӧдӧдіс накӧд татшӧм гижӧд: 26«Пыдди пуктана Феликс юралысь, тэнӧ чолӧмалӧ Клавдий Лисий. 27Юӧрта, мый тайӧ мортсӧ босьтісны иудейяс да кӧсйисны вины. Кор ме тӧдмалі, мый сійӧ римса, муні аслам тышкайӧзкӧд да мырдди сійӧс налӧн киысь. 28Нӧшта кӧсйи тӧдмавны, мыйысь сійӧс мыжалӧны. Тайӧ могнас нуӧді сійӧс налӧн веськӧдлан котыр водзӧ. 29Тӧдмалі да, вӧлӧмкӧ, мыжалӧны сійӧс асланыс Индӧд понда, налӧн эм вензяна видзӧдлас. Ме ог аддзы сылысь мыжсӧ, мыйысь эськӧ колӧ сійӧс пуксьӧдны дзескыдінӧ да вины. 30Сэсся кывсис меӧдз, мый иудейяс кыйӧдӧмӧн лӧсьӧдчӧны вины тайӧ мортсӧ. Та вӧсна дзик пыр мӧдӧді сійӧс тэ дінӧ. Мыжалысьяслы тшӧкті тэ водзын висьтавны, мыйысь найӧ мыжалӧны сійӧс. Ло дзоньвидза!»

31Тшӧктӧм серти тышкайӧз войнас нуӧдісны Павелӧс Антипатридаӧ. 32Асьныс мӧд луннас бӧр локтісны изкарӧ, а Павелӧс верзьӧмаяскӧд мӧдӧдісны водзӧ. 33Кесарияӧ воысьяс вайӧдісны Павелӧс сэтчӧс юралысь дінӧ да сетісны сылы гижӧдсӧ. 34Сійӧс лыддьӧм бӧрын юралысь юаліс Павеллысь, кытысь сійӧ. Кор тӧдмаліс, мый Павел Киликияысь, 35шуис: «Тэнӧ мыжалысьяс кор локтасны, сэки кывза тэнӧ». Сэсся тшӧктіс нуӧдны Павелӧс дзескыдінӧ Ирӧдлӧн керкаӧ.

Currently Selected:

Ап. уджъяс 23: КБ

Highlight

Copy