2 Коринфӧ 6
6
1Ми, Енкӧд ӧтвыв уджалысьяс, корам тіянӧс: сибӧдӧй Енлысь буралӧмсӧ, мед сійӧ эз ло весьшӧрӧ. 2Енмыс ӧд тадзи висьталӧ:
– Ме кылі тэнӧ бур кадӧ,
отсалі тэныд мездман лунӧ.
Со ӧні бур кадыс, со ӧні мездман луныс.
Павеллӧн сьӧкыдлунъяс
3Ми некодлы огӧ сетӧй помка шуасьны миян вылӧ, медым эз ло лёкӧдӧма кесъялӧмнымӧс. 4Мӧдарӧ, ми быдторйын петкӧдлам асьнымӧс Енлӧн кесъялысьясӧн: ми нуам сьӧкыдсӧ, шогсӧ, дзескӧдӧмсӧ. Ми зумыдӧсь, 5кор миянӧс нӧйтӧны, пуксьӧдӧны дзескыдінӧ, вӧтлӧны, кор ми уджалам ныр вылӧ усьтӧдз, видзалам, коллялам узьтӧм войяс. 6Ми олам сӧстӧма. Миян эм тӧдӧмлун, терпитӧм, бурлун. Миянӧн веськӧдлӧ Вежа Лов да сьӧлӧмсянь муслун. 7Ми висьталам збыльсӧ, ставсӧ вӧчам Ен вынӧн. Миян вермасянторным – веськыдлун. Сійӧн вермасям и водзсасям. 8Ми дасьӧсь сибӧдны ошкӧмсӧ и янӧдӧмсӧ, нимӧдӧмсӧ и лёкӧдӧмсӧ. Миянӧс лыддьӧны пӧръясьысьясӧн, но ми веськыда сёрнитам. 9Ми огӧ нималӧй, но миянӧс ставныс тӧдӧны. Миянӧс лыддьӧны кулӧмаясӧн, но ми ловъяӧсь. Миянӧс нӧйтӧны, но огӧ кулӧй. 10Миянӧс шогӧ вӧйтӧны, а ми пыр нимкодясям. Ми гӧльӧсь, но унаӧс озырмӧдам. Миян нинӧм абу, но ставыс эм.
11Коринфсаяс, ми сёрнитам тіянкӧд веськыда, миян сьӧлӧмным восьса тіянлы. 12Ми восьтім тіянлы сьӧлӧмнымӧс, но тіян сьӧлӧмныд тупкыса миянлы. 13Ме шуа тіянлы аслам ныв-пилы моз: воча восьтӧй сьӧлӧмнытӧ миянлы.
Ми – Енлӧн крамыс
14Энӧ сюйӧй юрнытӧ ӧти сийӧс улӧ эскытӧмъяскӧд. Вермас ӧмӧй йитны мыйкӧ веськыдлунсӧ лёкыскӧд? Эм-ӧ ӧткодьлуныс югыдыслӧн пемыдыскӧд? 15Вермас ӧмӧй воны ӧти кывйӧ Кристос Велиаркӧд#6:15 Велиар – омӧльлӧн нимъяс пиысь ӧтиыс.? Мый вермас йитны эскысьӧс эскытӧмкӧд? 16Вермасны ӧмӧй сулавны идолъяс Енлӧн крамын? Ӧд ті – ловъя Енлӧн крамыс. Енмыс шуӧ:
– Овмӧдча на пытшкӧ
да понда ветлыны накӧд.
Ме лоа налӧн Енмӧн,
а найӧ – Менам войтырӧн.
17Сідзкӧ:
– Петӧй на пӧвстысь
да ылыстчӧй наысь,
– висьталӧ Господь. –
Энӧ инмӧдчӧй пежас,
сэки Ме сибӧда тіянӧс.
18Ме лоа тіянлы Батьӧн,
а ті – Меным ныв-пиӧн,
– висьталӧ Господь, Ставсӧвермысь.
Currently Selected:
2 Коринфӧ 6: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
