1 Иоан 5

Эскӧмыс вермӧ муюгыдсӧ

1Эскам кӧ, мый Исус эм Кристос, ми Енсянь чужӧмаӧсь. Муса кӧ миянлы Чужтысьыс, муса и Сысянь чужысьыс. 2Радейтам кӧ Енсӧ да олам Сылӧн тшӧктӧмъяс серти, та серти тӧдам, мый ми Ен челядьӧс тшӧтш радейтам. 3Тшӧктӧмъяс серти олӧмыс – тайӧ Енсӧ радейтӧм, а Сылӧн тшӧктӧмъясыс абу сьӧкыдӧсь. 4Енсянь чужысь вермӧ муюгыдсӧ. Тайӧ вермӧмыс – миян эскӧм, сы отсӧгӧн муюгыдсӧ вермӧма.

5Коді вермӧ муюгыдсӧ? Сійӧ, коді эскӧ, мый Исус эм Енлӧн Пи.

Енмыс висьталӧ Аслас Пи йылысь

6Исус Кристос локтіс ваӧн, вирӧн да Лолӧн, эз сӧмын ваӧн, но ваӧн да вирӧн. Та йылысь Лов висьталӧ, ӧд Лолыс эм збыльыс. 7Енэжас эскӧдӧны-висьталӧны та йылысь куимӧн: Бать, Кыв да Вежа Лов. Тайӧ куимыс ӧти. 8Му вылас тшӧтш эскӧдӧны-висьталӧны та йылысь куимӧн: Лов, ва да вир. Тайӧ куимыс висьталӧ ӧтитор йылысь. 9Ми сибӧдам мортлысь висьталӧмсӧ, но Енлӧн висьталӧмыс ёна ыджыдджык, ӧд сійӧс Ачыс Енмыс висьталӧ. Сійӧ висьталӧ Аслас Пи йылысь. 10Коді эскӧ Ен Пилы, сылӧн сьӧлӧмас эм тайӧ висьталӧмыс. Коді оз эскы Енмыслы, пуктӧ Сійӧс пӧръясьысь туйӧ, ӧд тайӧ мортыс оз эскы Пи йывсьыс Енлӧн висьталӧмыслы. 11А висьталӧмыс татшӧм: Ен сетӧма миянлы помтӧм олӧм, и тайӧ олӧмыс Пиыс пытшкын. 12Кодлӧн эм Пиыс, сылӧн эм олӧмыс. Кодлӧн абу Ен Пиыс, сылӧн олӧмыс абу.

Тіян эм помтӧм олӧм

13Тайӧс гижи тіянлы, Ен Пи нимӧ эскысьяслы, мед ті тӧдінныд, мый Ен Пилы эскӧмныд вӧсна тіян эм помтӧм олӧм. 14Ми вермам повтӧг локны Ен водзӧ, ӧд тӧдам: корӧмным кӧ лӧсялӧ Сылӧн кӧсйӧмлы, Сійӧ кылӧ миянӧс. 15А тӧдам кӧ, мый Сійӧ кылӧ миянлысь быд корӧм, тӧдам тшӧтш, мый Сійӧ сетас корӧмасӧ.

16Кор аддзан, мый вокыд мыжӧ усьӧма, но мыжыс оз вайӧд кулӧмӧ, кевмысь сы вӧсна. Ен сетас сылы олӧм, дерт, мыжыс кӧ оз кулӧмӧ вайӧд. Эм кулӧмӧ вайӧдысь мыж, но ме ог кор кевмысьны татшӧм мыжсӧ вӧчысь вӧсна. 17Быд лёк вӧчӧм эм мыж, но оз став мыжыс вайӧд кулӧмӧ.

18Ми тӧдам, мый Енсянь чужысьяс мыжсӧ оз вӧчны. Енсянь чужысь видзӧ асьсӧ, да омӧльыс оз вермы инмӧдчыны сы дінӧ. 19Тӧдам, мый ми Енсянь, а став муюгыдыс омӧльыслӧн кипод улын. 20Нӧшта тӧдам, мый Ен Пи локтіс да сетіс миянлы мывкыдлун, мед ми тӧдім збыль Енсӧ. И ми олам тайӧ збыльыс пытшкын, Исус Кристос Пиыс пытшкын. Сійӧ эм збыль Енмыс да помтӧм олӧмыс.

21Челядь, видзӧй асьнытӧ идолъясысь. Аминь.

Currently Selected:

1 Иоан 5: КБ

Highlight

Copy