1 Коринфӧ 1

1Гижӧ Павел, Енлӧн корӧм-кӧсйӧм серти Исус Кристослӧн апостол. Сосфен воккӧд 2ми чолӧмалам тіянӧс, Енлысь коринфса вичкосӧ. Исус Кристос пыр Енмыс вежӧдіс тіянӧс да корис лоны Аслас вежа войтырӧн. Ми чолӧмалам быдӧнӧс, коді быдлаын миян моз шыасьӧ Исус Кристос Господьным дінӧ. 3Буралӧм да лӧнь олӧм тіянлы Ен Батьнымсянь да Господь Исус Кристоссянь.

Павел ошкӧ Енмӧс

4Быд кадӧ аттьӧала ассьым Енмӧс тіянысь, ӧд Сійӧ сетӧма тіянлы буралӧмсӧ Исус Кристос пытшкын. 5Кристос пыр Енмыс озырмӧдіс тіянӧс быдторнас, ті кужанныд бура сёрнитны, тіян эм быдпӧлӧс тӧдӧмлун. 6Кристос йылысь висьталӧмыс зумыда вужъясис тіян сьӧлӧмӧ, 7та вӧсна миян Господь Исус Кристослысь локтӧмсӧ виччысигӧн ті озырӧсь сетӧмторъяснас. 8Енмыс ёнмӧдас тіянӧс зумыда сулавны помӧдз, медым миян Господь Исус Кристослӧн лунӧ ті вӧлінныд сӧстӧмӧсь. 9Енмыс эскана, Сійӧ корис ӧтувтчыны тіянӧс Аслас Пиыскӧд – миян Господь Исус Кристоскӧд.

Коринфса вичкоын вензьӧмъяс

10Вокъяс, кора тіянӧс миян Господь Исус Кристос нимӧн: ас костаныд энӧ юксьӧй, олӧй ӧти мӧвпъясӧн, ӧти видзӧдласӧн да ӧти могӧн. 11Вокъяс, Клоялӧн гортсасянь ме кывлі, ті пӧ вензянныд ӧта-мӧдныдкӧд. 12Ме сёрнита сы йылысь, мый тіян пӧвстысь кодкӧ шуӧ, ме пӧ Павеллӧн, мӧд шуӧ, ме пӧ Аполослӧн, коймӧд шуӧ, ме пӧ Кифалӧн#1:12 Видзӧд Ин. 1:42., а нёльӧд шуӧ, ме пӧ Кристослӧн.

13Гашкӧ, Кристосӧс вӧлі юклӧма? Гашкӧ, Павелӧс вӧлі тувъялӧма тіян вӧсна? Гашкӧ, Павел нимӧн ті пыртчинныд? 14Аттьӧала Енмӧс, мый Крисп да Гай кындзи ме некодӧс эг пырт тіян пиысь. 15Сідзкӧ, некод оз вермы шуны, мый ме пырті кодӧскӧ аслам нимӧн. 16Нӧшта Степанӧс пырті да сылысь гортсасӧ, сэсся пырті-ӧ кодӧскӧ – ог тӧд. 17Кристос ӧд мӧдӧдіс менӧ эз пыртны, а висьтавлыны Бур Юӧрсӧ. Тайӧ Юӧрсӧ ме висьтала ог мывкыд кывъясӧн, медым Кристослӧн крестыс эз вошты ассьыс вынсӧ.

Кристос – Енлӧн выныс да мывкыдлуныс

18Вошӧмаяслы крест йылысь висьталӧмыс – йӧйталӧм, а миянлы, мездмӧмаяслы – Енлӧн выныс. 19Гижӧма: «Мывкыда йӧзлысь мывкыдлунсӧ бырӧда, сюсь вежӧра йӧзлысь вежӧрлунсӧ ӧтдорта». 20Коді нӧ мывкыда йӧзыс? Коді велӧдчӧмаыс? Коді нӧ тайӧ му вылас вежӧраыс? Эз-ӧ тайӧ мувывса мывкыдлунсӧ Енмыс йӧйталӧмӧ бергӧд? 21Енмыс Ассьыс мывкыдлунсӧ петкӧдліс мувывса йӧзлы, но йӧзыс асланыс мывкыдлунӧн Енсӧ эз гӧгӧрвоны. Сэки Енмыс мӧвпыштіс мездыны найӧс, кодъяс эскӧны миян висьталӧмлы. Тайӧ висьталӧмсӧ йӧзыс шуӧны йӧйталӧмӧн. 22Иудейяс корӧны вӧчны шензьӧданаторъяс, грекъяс – петкӧдлыны мывкыдлун, 23а ми висьталам тувъялӧм Кристос йылысь. Иудейяс крукасьӧны тайӧ висьталӧмас, а грекъяс лыддьӧны тайӧс йӧйталӧмӧн. 24Но Енлӧн корӧмаяслы, иудейяслы да грекъяслы, Кристос – Енлӧн выныс да мывкыдлуныс. 25Ӧд Енлӧн ”мывкыдтӧмлуныс” ёна ыджыдджык морт мывкыдысь, да Енлӧн ”жеблуныс” ёна вынаджык морт вынысь.

26Вокъяс, видзӧдлӧй ас выланыд, кутшӧмӧсь ті, Енлӧн корӧмаяс. Морт видзӧдлас серти этша тіян пӧвстын мывкыдаыс, этша юралысьыс да бур рӧдысь петысьыс. 27Но Енмыс бӧрйис тайӧ муюгыдсьыс мывкыдтӧмсӧ, медым янӧдны мывкыдасӧ, бӧрйис жебсӧ, медым янӧдны вынасӧ, 28бӧрйис тайӧ муюгыдсьыс медся шогмытӧмсӧ, коньӧрсӧ да увтыртӧмсӧ, медым нинӧм туйӧ пуктыны нималанасӧ, 29медым Ен водзын некод эз ошйысь аснас. 30Енмыс йитіс тіянӧс Исус Кристоскӧд, коді лои миянлы мывкыдлуннас. Сы пыр Енмыс вештысис миян вӧсна, вӧчис миянӧс веськыдӧн да вежа войтырӧн. 31Тадзи инас тайӧ гижӧдыс: «Ошйысьысь мед ошйысьӧ Господьӧн».

Currently Selected:

1 Коринфӧ 1: КБ

Highlight

Copy