ናሆሜ ቲንቢቴ 3
3
ናናዌስ ኣዬ ኣና
1ሱ ካታማይስ ኣዬ ኣና፤
ዎርዶይኔ ቦንቃይ
ኢዚን ኩሚዴስ፤
ኢዚፔ ቆጪሬቲ ሺቂዳይሲ
ኤፊንካ ዉሬና።
2ጹርቃፌ ጊሪሲ፥
ኢሪዞ ጬንጉርሲ፥
ፒላታ ፓራ ኣዳራሶይ፥
ፓራ-ጋሬታ ጊሪሲ ሲዬቲዴስ።
3ቶጋንቻይ ቶጌስ፤
ማሻይ ፖፖልኡ ጌስ፤
ቶራይ ጾልቄቴስ፤
ዳሮይ ሃይቂዴስ፤
ኣሃይ ኣሃ ቦላ ኮሬቲዴስ፤
ኢዛስ ቆዳይካ ዴና፤
ኣ ቢዛሶይካ
ቤቲቤና።
4ሃይሲ ኡባይ ሃኒዳይ
ቡቴ ኣዳ
ኣስ ባሌዛኔ
ሙሬኒዛ ላይማይ ጋሶና።
ኢዛ ባ ላይማቴን
ካዎቴ፥ ማሮቴን
ዴሬዛ ኣይሌሲዳሮ።
5ኡባፌ ዎልቃማ ጎዳይ፥
«ሃኔ ታኒ ኔ ቦላ
ሞርኬቴን ዴንዳዲስ፤
ታኒ ኔ ቃሚሳ ቃራ
ኔ ኣይፌሶ ካማና፤
ኔ ካሎቴ ዴራስ፥
ዬላቴ ካዎቴታስ
ታ ቤሳና።
6ታኒ ኔ ቦላ ቡራ ኦላና፤
ታ ኔና ካና፤
ቂስካ ኣ ኢማና።
7ኔና ቤኢዛይቲ ኔፔ ባቃቲሼ፥
‹ናናዌይ ላሌታዱስ፤
ኢዚስ ዬካናይ ኦኔ?› ጋና።
ኔና ሚንናዴ
ታ ኣዋፔ ዴማኔ?» ጊዴስ።
8ኔኒ ኣባዬ ሻፋ ኣቻን ዲዛ፥
ሃን ዶዴታ ዲዛ
ኖኤ ኣሞኔፔ ጎባይ?
ሻፋዚ ኢዚስ ቴቄ ሃዚካ
ኢዚስ ጊምቤ።
9ቶጵያይኔ ጊብጼይ ኢዚስ
ዛዋይ ባይንዳ ዎልቃ፤
ፑጼይኔ ሊቢያይ
ኢዞ ማዲዛይታ፤
10ጊዶ ኣቲን ኢዛ ዲኤታዱስ፤
ጎዴታ ባዱስ፤
ኢዚ ናይቲ ኦጌታ ቲጻ ቦላ
ዲንጬቲዳ፤
ኢዚ ዳናታ ቦላ
ሳማይ ዎዴስ፤
ኢዚ ጊታ ኣሳቲ
ኡባይ ሳንሳላታን ቃሼቲዳ።
11ኔኒካ ቃሴ
ማታናኔ ቆቴታና፤
ሞርኬታፔ ኣቲዛሶ ኔ ኮያና።
12ኔ ሚጻቲ ኡባይ ሙሳስ ጋኪዳ
ባላሴ ሚስ ኮይሮ ኣይፌ ማላ፤
ኢስቲ ቃጺዛ ዎዴ
ኢስታ ኣይፌቲ
ሚዛዴ ዶናን ዎቴስ።
13ሄኮ ኔ ኦላ ኣሳይ
ዉሪካ ማጫ ጻላ!
ኔ ዛዋቲ ኔ ሞርኬታስ
ዋጊ ጊ ዶዬቲዳ፤
ኢስታ ኮላታታካ ታማይ ሚዴስ።
14ኔና ጊዶዛ ዎዴስ
ሃ ዱቃ፤
ኔስ ቴቄ ሚን ጊጊሳ፤
ማና ኡርቃ ኮያ፤
ኡርቃ ዬዳ
ጹቤ ኦ።
15ኔና ሄን ታማይ ማና፤
ማሻይካ ኔና ቃንጻና፤
ጉምባሮይ ሚዛ ማላ
ኔና ጋርጫና፤
ጉምባሮ ማላ ዬሌታ፤
ቦሌ ማላ ዳራ።
16ኔ ዛልኣንቻታ
ሳሎ ጾሊንቴፔካ ዳርሳዳሳ።
ኢስቲ ጊዲኮ ቢታዮ ቦሌ ማላ
ፒቲ ሚዲ ፒራ ቢዳ።
17ኔና ናጊዛይቲ ቦሌ ማላ፤
ኔ ጊታ ኣሳቲ ሜጎ ጋላስ
ጊምቤ ጋርሳን
ኡቲዛ ጉምባሮ ማላ።
ኢስቲ ኣርሼይ ኬዚሺን
ፒራቴስ፤
ኢስቲ ፒራ ቢዛሶይ
ኣዋኮ ኤሬቴና።
18ኣሶሬ ካዎ፥
ኔ ሄንንቻቲ ስኪዳ፤
ኔ ጊታ ኣሳቲ ዎፑ ጊ ኢቺዳ፤
ኔ ዴሬይ ሺሺዛይ ዪን
ዙማ ቦላ ላሌቲዴስ።
19ኔ ማዱን ፓና
ዳንዳይዛይ ዴና፤
ኔኒ ሃይቆስ ጋዛ
ሜቆ ሜቃዳሳ፤
ኔ ጊሻስ ሲዪዳ ኡባይ
ኔ ኩንዴን ኡፋዬቲ
ኩሼ ባቃና፤
ዛዋይ ባይንዳ
ኔ ሜንጼ ኢታቴ
ቦቾንታይ ኦኔ?
Currently Selected:
ናሆሜ ቲንቢቴ 3: ጋሞመጽቅበፊደል
Highlight
Share
Copy
Want to have your highlights saved across all your devices? Sign up or sign in
The Word for the World International amp The Word for the World Ethiopia
