Римын оліссезлӧ 8

1Сідзкӧ, ӧні он висьтав некытшӧм судитан кыв Кристос Исускӧт ӧтлаасьӧммез вылӧ. Нія эд озӧ олӧ вывтырныс кыскӧм сьӧрті, олӧны Ен Лов туйдӧтӧм сьӧрті. 2Кристос Исускӧт ӧтлаасьӧмсянь Ловлӧн туйдӧтыс сетӧ олан. Сія эд мездіс менӧ умӧльсӧ керӧмлӧн да кулӧмлӧн туйдӧтісь. 3Моисейлӧн Туйдӧтыс эз вермы миянӧс мездыны. Умӧляс кыскан вывтырным кузя Туйдӧтыслӧн мездан выныс эз тырмы. Мый Туйдӧтыс эз вермы керны, сійӧ керис Еныс. Сія ыстіс Ассис Зонсӧ му вылас вештісьны умӧль керӧммезным понда. Сылӧ сетіс сэтшӧм вывтыр, кытшӧм вывтырыс умӧль керись мортлӧн. Сідз Сія судитіс морт вывтырын поздісьӧм умӧль керӧмсӧ. 4Еныс керис сідз, медбы мийӧ олім Ен сьӧрті веськыта: пыртім оланӧ Туйдӧтас гижӧмсӧ. Мийӧ эд огӧ олӧ умӧльсӧ керан вывтырным сьӧрті, оламӧ Ен Лов сьӧрті.

5Умӧльсӧ керан вывтыр сьӧрті оліссес эд вывтырныс кыскӧм сьӧрті керӧмсӧ юрӧ пыртӧны. Лов сьӧрті оліссес Лов сьӧрті керӧмсӧ юрӧ пыртӧны. 6Юрӧ пыртан кӧ вывтыр сьӧрті керны, сія вайӧтӧ кулӧмӧ. Юрӧ пыртӧмыс кӧ Лов сьӧрті, сія лӧньсьӧтӧ сьӧлӧм да сетӧ олан. 7Умӧльсӧ керан вывтыр сьӧрті юрӧ пыртӧмыс ─ Ен вылӧ лэбтісьӧм. Сэтшӧмсӧ юрӧ пыртіссес озӧ олӧ Ен Туйдӧт сьӧрті да и озӧ вермӧ. 8Сійӧн умӧльсӧ керан вывтыр сьӧрті оліссес озӧ вермӧ керны Еныс сьӧрті.

9Олӧ кӧ Еныслӧн Лолыс тіян пытшкын, сэк тійӧ одӧ ни олӧ вывтырныт сьӧрті. Кинлӧн абу Кристослӧн Лолыс, сія мортыс абу Сылӧн. 10Кристосыс кӧ тіян пытшкын, сэк ловныт олӧ Ен сьӧрті веськыта олӧм понда, кӧть умӧльсӧ керӧмныт кузя вывтырныт и кулӧ. 11Еныс Кристоссӧ ловзьӧтіс кулӧмсис. Олӧ кӧ тіян пытшкын Енлӧн Лолыс, Еныс и тіянлісь кулӧм вывтыррезнытӧ ловзьӧтас Аслас Лолӧн. Ӧні Сія Лолыс олӧ пытшканыт.

Тійӧ ─ Енлӧн челядь

12Воннэзӧ, мийӧ умӧльсӧ керан вывтырнымлісь нем эгӧ одзӧстӧ, и миянлӧ оз ков овны сы сьӧрті керӧмӧн. 13Олат кӧ умӧльсӧ керан вывтырныт сьӧрті, сэк кулат. Ен Лолыс отсӧтӧн кӧ вайӧтат вывтырнытлісь умӧль керӧмсӧ кулӧмӧдз, сэк пондат овны. 14Ен Лов туйдӧтӧм сьӧрті оліссес ─ Енлӧн челядь. 15Тіянлӧ сетӧм Ловсянь оз ков полӧмӧн овны-мырсьыны. Сія тіянӧс оз видз домӧттэзын. Тійӧ босьтіт сэтшӧм Лов, кӧда тіянӧс пуктӧ Енлӧн челядьӧ. Сія туйдӧтӧ миянӧс корны Енсӧ: «Авва#8:15 Авва ─ арамей кылісь кыв, вежӧртӧтӧ: «дона айӧ», Айӧ!» 16Сія Вежа Лолыс и висьталӧ миян ловлӧ: мийӧ ─ Енлӧн челядь. 17Сылӧн челядь кӧ, сэк и мийӧ Кристосыс моз Еныс увтырись. И мийӧ сэк ӧтвылісь Кристосыскӧт босьтам Сылісь кӧсйӧмсӧ. Кристоскӧт ӧтлаын кӧ пессям-мырсям, сэк югьяланінас Сыкӧт ӧтлаын лоам.

Одзланься югьялӧмсӧ видзчисьӧм

18Ме юрам видза: ӧнняся пессьӧм-мырсьӧмным одзланься югьялӧмыс сьӧрті абутӧм туйӧ. Сія югьялӧмыс миянӧс видзчисьӧ. 19Быдӧс аркмӧтӧмыс оз ни вермы видзчисьны, кӧр Еныс мыччалас Ассис челядьсӧ. 20Аркмӧтӧмыс ачыс асьсӧ эз вайӧт сэтшӧм оланӧдззас, кӧдасянь нем бурыс абу. Сідз лоны Еныс вӧлі шуӧм. Но быдӧс аркмӧтӧмыс видзчисьӧ бурсӧ. 21Локтас кад, кӧр аркмӧтӧмыс мездӧтчас разьсьӧм-сісьмӧмсис да пырас югьялӧмас. Сійӧ югьялӧмсӧ Еныс козьналас Аслас челядьлӧ. 22Тӧдам эд: быдӧс аркмӧтӧмыс зубытсяняс ӧнӧдз ойзӧ-мырсьӧ кага вайись инька моз. 23Аркмӧтӧмыскӧт ӧтлаын и мийӧ, кинлӧн эм ни Вежа Лолыс ─ Енсянь медодзза козиныс, асьным быдсӧн пытшкнаным ойзам. Мийӧ видзчисям, кӧр Еныс миянӧс босьтас дынас Аслас челядьӧн да мездас вывтырнымӧс. 24Мийӧ ӧні мездӧтӧмӧсь бурсӧ видзчисьӧмным пыр. Мый видзчисян, да сія син одзын кӧ, сія абу ни видзчисьӧм. Адззан кӧ, мый ни сэк видзчисьны? 25Кӧр видзчисям тыдавтӧмсӧ, видзчисям сійӧ мыла быртӧг.

26Миян вынным оз кӧ тырмы, сэк Ачыс Лолыс отсалӧ миянлӧ. Мийӧ эд огӧ тӧдӧ, кыдз да мый понда колӧ кеймыны. Ышлолалӧммезӧн#8:26 ышлолавны ─ вздыхать, вздохнуть, кыввез висьтавтӧг Ачыс Лолыс корӧ миян понда. 27Еныс тӧдӧ, мый морт сьӧлӧмын да мый корӧ Лолыс. Сія эд корӧ вежа отир понда сійӧ, мый Еныс сьӧрті. 28Мийӧ тӧдамӧ: Енсӧ радейтіссеслӧ, Сылӧн висьталӧм сьӧрті корӧммеслӧ, оланын быдӧс керсьӧ бур вылӧ. 29Кинӧс Сія одзлань тӧдіс, нійӧ и бӧрйис лоны Аслас Зон вылӧ вачкисянаэзӧн. Сідзкӧ, уна воннэз коласын Зоныс ─ медодз Чужӧмыс#8:29 медодз Чужӧм ─ Первенец. 30Кинӧс Еныс бӧрйис, нійӧ и корис. Кӧднӧ корис, нійӧ и керис Сы сьӧрті веськыта оліссезӧн. Кӧднӧ керис Сы сьӧрті веськыта оліссезӧн, нылӧ сетіс Ассис югьялӧмсӧ.

Енлӧн радейтӧм

31Мый сэтчӧ висьталам? Еныс кӧ миян дор, кин сэк миянлӧ паныт? 32Сылӧ нельки Ассис Зонсӧ ковсис сетны быдӧннымӧс мездӧм понда. Сэк Сыкӧт оз разь козьнав быдӧссӧ? 33Кин пондас висьтавлыны Енлӧн бӧрйӧммез вылӧ умӧльсӧ? Ачыс Еныс эд нійӧ керӧ Сы сьӧрті веськыта оліссезӧн. 34Кин вермас нійӧ судитны? Некин оз. Кристос Исусыс куліс да ловзис. Ӧні Сія Еныскӧт веськыт ладорас кеймисьӧ миян понда.

35Мый вермас миянӧс янсӧтны Енлӧн радейтӧм дынісь? Поди, шогсьӧм, дзескӧтлӧм, вашӧтлӧм янсӧтас? Поди, тшыгьялӧм, кӧмтӧг-паськӧмтӧг кольччӧм, умӧльыскӧт пантасьӧм, шыпуртсянь#8:35 шыпурт ─ меч кулӧм? 36Вежа Гижӧтас тай висьталӧм: «Тэ понда миянӧс быд лун кулӧмӧдз воштӧны. Миянӧс пуктӧны баляэз туйӧ, кӧднӧ лӧсьӧтӧмась начкывны».

37Но миян вылӧ умӧль локтӧмсӧ быдӧс вермывлам#8:37 вермывлыны ─ преодолевать миянӧс Радейтісь отсӧтӧн. 38Ме бура тӧда: кулӧм, олан, ангеллэз, енӧжсис веськӧтліссез да выннэз, ӧннясяыс, одзланьсяыс, 39вылынаыс, пыдынаыс да и кытшӧмкӧ мӧдік аркмӧтӧмыс ─ оз вермы миянӧс янсӧтны Енлӧн радейтӧм дынісь. Сія радейтӧмыс миян Дӧсвидзись Кристос Исускӧт ӧтлаасьӧмсянь.

Иудейез ─ Енлӧн бӧрйӧм отир

Currently Selected:

Римын оліссезлӧ 8: БЮ19

Highlight

Copy