Римын оліссезлӧ 6
6
1Мый висьтавны? Одзлань пондам керны умӧльсӧ Енлӧн бурсетӧмыс содӧм понда? Огӧ пондӧ! 2Умӧльсӧ керны мийӧ кулӧмӧсь! Кыдз сэк миянлӧ одзлань овны умӧльсӧ керӧмӧн? 3Одӧ разь тійӧ тӧдӧ? Мийӧ Кристос Исус нимӧн пыртчиканым ӧтлаасим Сыкӧт да Сылӧн кулӧмкӧт#6:3 кулӧм ─ смерть. 4Сідзкӧ, пыртчӧмным коста мийӧ кулім, Кристосыскӧт вӧлім дзебӧмӧсь. Айыслӧн югьялан вынӧн Кристосыс ловзис. Сідз и мийӧ пондім овны вильмоза. 5Мийӧ ӧтлаасим кӧ Кристоскӧт Сы моз кулӧм пыр, сэк Сы моз и ловзям. 6Тӧдамӧ: мийӧ одззаэс дорӧмӧсь Сыкӧт, медбы миян вывтырным ӧштіс вынсӧ керны умӧльсӧ. Умӧль керӧмыс ась оз ни видз сэсся миянӧс аслас домӧттэзын. 7Кулӧм мортнас умӧль керӧмыс эд оз ни вермы веськӧтлыны. 8Мийӧ Кристосыскӧт кулім кӧ, веритам: и овны пондам Сыкӧт. 9Тӧдам эд: Кристосыс кулӧм бӧрас ловзис. Сія оз ни кув. Сы дорӧдз кулӧмыслӧн выныс абу ни. 10Сія ӧтпырись кулӧмнас вермис умӧль керӧмсӧ пыр кежӧ. Ӧні Сія ловья да олӧ Ен понда. 11Тійӧ миян Дӧсвидзись Кристос Исускӧт ӧтлаасит. Сідзкӧ, умӧльсӧ керӧмыслӧ шуӧ асьнытӧ кулӧммезӧн, а Еныслӧ ─ ловьяэзӧн.
12Умӧльсӧ керны лэдзчисьӧмыс ась оз веськӧтлы тіян кулан вывтырӧн, медбы ӧзйӧтчӧмӧн керны сы сьӧрті. 13Вывтырсиныт ӧтік торлӧ эд лэдзӧ керны умӧльсӧ. Тійӧ эд кулӧммезісь ловзьӧмӧсь. Асьнытӧ быдсӧн сетӧ Еныслӧ. Вывтырсиныт быд торныт ась керӧ Ен сьӧрті веськыта. 14Умӧльыс ась оз вермы тіянӧс. Тійӧ эд абу Туйдӧтыс вын увтын, тійӧ эд Енлӧн бурсетӧм увтын.
Ӧні тійӧ Енлӧн раббез
15Ӧні мийӧ олам Енлӧн бурсетӧмӧн, мийӧ абу Туйдӧт увтын. Мый сэк, пондам я керны умӧльсӧ? Огӧ пондӧ. 16Одӧ я тӧдӧ: кинлӧ асьнытӧ сетіт, тійӧ нылӧн раббез, нійӧ и кывзісят. Умӧль керӧмыс видзӧ кӧ тіянӧс аслас кӧртӧттэзын, то мунат кувны. Енсӧ кӧ кывзісят, лоат Сы сьӧрті веськыта оліссезӧн. 17Ошка Енсӧ тіян понда. Ӧні эд сьӧлӧмсянь пондіт овны велӧтӧмыс сьӧрті, кӧдӧ тіянлӧ висьтасисӧ. Одзжык тійӧ вӧлітӧ умӧль керӧмыслӧн раббез. 18Умӧль керӧммезісь мезмӧм бӧрсянь тійӧ асьнытӧ быдсӧн сетіт овны Ен сьӧрті веськыта. 19Ме баита быд лунся сёрниӧн умӧля вежӧртӧмныт кузя. Одзжык тійӧ лэдзліт вывтырсиныт быд торлӧ керны умӧльсӧ, сэрпӧсьсӧ да ковтӧмсӧ. Ӧні вывтырсиныт быд торныт ась олӧ Ен сьӧрті веськыта да керӧ вежа уджсӧ.
20Умӧль керӧмыслӧн домӧттэзын олӧмныт коста тійӧ эдӧ вермӧ овны Ен сьӧрті веськыта. 21Кытшӧм воӧм сэк тіян вӧлі? Тійӧ сійӧ керліт, кӧднасянь ӧні асьныт гӧрдӧтат. Сія эд вайӧтӧ кулӧмӧ. 22Ӧні тійӧ мезмит умӧль керӧмыслӧн домӧттэзісь, лоит Енлӧн раббез. Тіян бур воӧмныт#6:22 воӧм ─ плод ─ вежа олан. А вежа олансянь ─ пырся олан. 23Умӧль керӧм понда вештісьӧмыс ─ кулӧм, а Енлӧн козиныс ─ пырся олан миян Дӧсвидзись Кристос Исускӧт ӧтлаасьӧмын.
Туйдӧт вын увтісь мезмӧм
Currently Selected:
Римын оліссезлӧ 6: БЮ19
Highlight
Share
Copy
Want to have your highlights saved across all your devices? Sign up or sign in
