Римын оліссезлӧ 10
10
1Воннэзӧ! Ме сьӧлӧмсянь кейма да кора Енсӧ мездыны Израиль отирсӧ. 2Ме тӧда: нія быд вынісь кошшӧны Енсӧ, но нылӧн оз тырмы вежӧртӧмныс. 3Нія озӧ вежӧртӧ Ен сьӧрті веськыта олӧмсӧ. Вынсьӧтчӧны асланыс керӧмӧн лоны Ен сьӧрті веськыта оліссезнас. Нія эзӧ сетчӧ Еныслӧ, медбы Сія керис нійӧ сэтшӧммезнас. 4Кытшӧм могӧн вӧлі сетӧм Туйдӧтыс, сійӧ быдӧс керис Кристосыс. Сідзкӧ, Сылӧ быд веритісь лоӧ Ен сьӧрті веськыта олісьӧн.
Мезмӧмыс ─ быдӧнныслӧ
5Туйдӧтыссянь Ен сьӧрті веськыта олісьӧн лоӧм йылісь Моисейыс гижӧм сідз: «Туйдӧт сьӧрті керись мортлӧ Туйдӧтыс сетас олан». 6Веритӧм понда Ен сьӧрті веськыта олісьӧ пуктӧм йылісь гижӧм сідз: «Ассит эн юась: "Кин каяс енӧжас?"» ─ Сэтчинісь Кристоссӧ лэдзчӧтны. 7«И сідз эн юась: "Кин лэдзчас пыдӧстӧминас?"» ─ Кристоссӧ кулӧммес коласісь лэбтыны. 8Мый шуӧ Вежа Гижӧтыс?
─ Кылыс матын тэ дынын,
тэнат ӧмын,
тэнат сьӧлӧмын.
Эта кылыс ─ веритӧм йылісь юӧр. Мийӧ сійӧ висьтасям. 9Тэ аслат кылӧн пондан кӧ висьтасьны: «Исусыс ─ Дӧсвидзись», да сьӧлӧмсянь веритан кӧ: Еныс Исуссӧ ловзьӧтіс кулӧмись, сэк мезман. 10Исуслӧ сьӧлӧмсянь веритӧмыс керӧ тэнӧ Ен сьӧрті веськыта олісьӧн. Мӧдіккезлӧ Сы йылісь висьтасян кӧ, сэк мезман. 11Вежа Гижӧтыс эд висьталӧ: «Сылӧ веритісьлӧ оз понды ковны гӧрдӧтны». 12Иудейез, мӧдік отир я, ─ Еныслӧ эд быдӧнныс ӧткодьӧсь. Сія Дӧсвидзись быдӧнныс вылын. Быдӧнныслӧ, кин корӧ Дӧсвидзисьсӧ, Сія бурсӧ сетӧ коланася унажык. 13Вежа Гижӧтас висьталӧм: «Быдыс, кин корас Дӧсвидзисьсӧ нимнас, мезмас».
Кысянь веритӧм
14Вермасӧ разь отирыс корны Дӧсвидзисьсӧ, озӧ кӧ веритӧ Сылӧ? Вермасӧ разь веритны Сылӧ, эзӧ кӧ кывлӧ Сы йылісь? Вермасӧ разь кывны, эзӧ кӧ нылӧ юӧртӧ? 15Да и кыдз юӧртны, абу кӧ ыстӧмась висьтасиссес? Вежа Гижӧтас сідз гижӧм: «Кытшӧм гаж адззыны Бур Юӧр вайиссезлісь, лӧнь олан йылісь висьтасиссезлісь локтӧмсӧ!» 16Эзӧ кывзісьӧ быдӧнныс Бур Юӧрсӧ. Исайыс эд сідз висьтавлӧм: «Дӧсвидзисьӧ! Миян висьтасьӧмӧ кин веритіс?» 17Сідзкӧ, веритӧмыс локтӧ юӧрсӧ кылӧмсянь, а кылӧмыс ─ Енлісь Кывсӧ висьтасьӧмсянь. 18Ме юала: Израиль отирыс эзӧ разь кылӧ? Кылісӧ эд. Вежа Гижӧтас висьталӧм тай:
─ Сія висьталӧмыс паськаліс
быдсӧн муыс пасьта,
висьтасьӧмыс локтіс быдлаӧдз.
19Бӧра юала: «Израиль отирыс эзӧ разь тӧдӧ?» Моисейыс эд кӧркӧ нылӧ висьтавлӧм ни Еныслісь кыввесӧ:
─ Ме тіян пытшкын ӧзйӧта вежӧктӧмсӧ отир дынӧ,
кӧднӧ и отирӧн он шу.
Вежӧрттӧм отир пыр лӧгӧта тіянӧс.
20Сэсся Исайыс тай Еныслісь кыввесӧ повтӧг висьтавлӧм:
─ Менӧ адззисӧ нія,
кӧдна эзӧ кошшӧ.
Ме осси нылӧ,
кӧдна Ме йылісь эзӧ юасьӧ.
21Израиль отирыс йылісь Еныс висьтавлӧм сідз:
─ Кывзісьтӧм, асныра отирланьӧ
Ме лунтыр нюжлалі Ассим киэзӧс.
Ен да Сылӧн отир йылісь
Currently Selected:
Римын оліссезлӧ 10: БЮ19
Highlight
Share
Copy
Want to have your highlights saved across all your devices? Sign up or sign in
