2 Коринфын оліссезлӧ 6
6
1Мийӧ Еныскӧт ӧтвыв уджаліссез. Сійӧн кеймисям тіян одзын: Енлісь бурсетӧмсӧ босьтӧ сьӧлӧманыт, медбы сія эз вӧв тіянлӧ весись сетӧм. 2Еныс тай висьталӧм:
─ Бур кадӧ Ме кылі тэнӧ,
мездан лунас отсалі тэныт.
Ӧні эд сія бур кадыс. Ӧні эд мездан луныс.
Павеллӧн пессьӧм-мырсьӧм
3Мийӧ некинӧс немӧн огӧ падмӧтӧ, медбы миян удж йылісь нем вӧлі висьтавны умӧльсӧ. 4Мийӧ асьнымӧс быд кадӧ видзам Енлӧн кысъяліссезӧн. Мыла#6:4 мыла ─ терпение быртӧг видзсям сьӧкыт кадӧ, кӧр миян вылӧ локтӧ умӧльыс. Кужам видзсьыны и дзескӧтлӧммез коста. 5Миянӧс вартлӧны, вашӧтлӧны да пуксьӧтӧны. Мийӧ садь быртӧдз уджаламӧ, узьтӧг оламӧ, кӧслуналамӧ. 6Оламӧ мийӧ сӧстӧма, бур мывкыдӧн, лӧгавтӧг. Мийӧ бура отсасям, кывзісям Вежа Ловсӧ, сьӧлӧмсянь радейтам. 7Висьтасям быльсӧ, быдӧс керам Ен вынӧн. Миян тышкасянным#6:7 тышкасян ─ оружие ─ Ен сьӧрті веськыта олӧмным#6:7 Ен сьӧрті веськыта олӧм ─ праведность. 8Миян йылісь ӧтіккез баитӧны бура, мӧдіккез видӧны. Мукӧдыс вӧвлытӧмсӧ миян йылісь висьтавлӧны, а кӧда и ошкӧны. Миянӧс пуктӧны бӧбӧтчиссезӧ, но мийӧ огӧ бӧбӧтӧ. 9Мийӧ тӧдтӧмӧсь, миянӧс тай тӧдӧны. Миянӧс шуӧны кулӧммезӧн, мийӧ тай ловьяӧсь. Миянӧс кулӧмӧдз вайӧтӧны, мийӧ тай огӧ кулӧ. 10Миянлӧ шогсӧ вайӧны, мийӧ тай пыр гажаӧсь. Миян нем абу, а миян сетӧмсянь унаӧн тай буржыка пондӧны овны. Миян нем абу, а быдӧс тай миян киын.
11Коринфын оліссез, тіянлӧ мийӧ быдӧс висьталім, миян сьӧлӧммезным осьтаӧсь тіянлӧ. 12Тіянӧс мийӧ босьтім асланым сьӧлӧммезӧ, а тіян сьӧлӧммезныт пӧданаӧсь. 13Челядьлӧ моз баита: кӧть вештісьӧм могись осьтӧ миянлӧ сьӧлӧммезнытӧ.
Тійӧ ловья Енлӧн оланін
14Кристоссӧ тӧдтӧммескӧт ӧтік сийӧсӧ эд пырӧ. Мый ӧтласаыс Ен сьӧрті веськыта олӧмыслӧн да умӧльсӧ керӧмыслӧн? Мый ӧтласаыс югытыслӧн да пемытыслӧн? 15Кытшӧм баитчӧм Кристос да Велиар#6:15 Велиар ─ кульыслӧн ӧтік нимыс коласын? Вермасӧ я ӧтмоза овны Кристослӧ веритіссес да кӧдна Сылӧ озӧ веритӧ? 16Мый ӧтласаыс Ен керкулӧн ас керӧм еныскӧт? Тійӧ эд ловья Енлӧн оланін. Ачыс Еныс сідз висьталӧм:
─ Пыра ны пытшкӧ,
понда ветлӧтны ныкӧт.
Ме лоа нылӧ Енӧн,
нія лоасӧ Менам отирӧн.
17Дӧсвидзисьыс шуӧ и сідз:
─ Сійӧн петӧ ны коласісь, янсӧтчӧ!
Сэрпӧсьыс бердӧ эд павкӧтчӧ
и Ме босьта тіянӧс челядьӧн.
18Ме лоа тіянлӧ Айӧн.
Тійӧ лоатӧ Меным зоннэзӧн да ныввезӧн.
Сідз шуӧ Дӧсвидзись, Дӧсвермись Ен.
Павеллӧн Коринфись Кристос отир понда гажмӧм
Currently Selected:
2 Коринфын оліссезлӧ 6: БЮ19
Highlight
Share
Copy
Want to have your highlights saved across all your devices? Sign up or sign in
