2 Коринфын оліссезлӧ 12

1Ковсьӧ ошшасьны, кӧть меным сэтісь нем абу бурыс. Ӧні висьтася Дӧсвидзисьлісь мыччалӧммесӧ да осьтӧммесӧ. 2Ме тӧда Кристослӧ веритісь мортӧс, кӧдӧ вӧлі лэбтылӧмась куимӧт енӧжӧдз. Вывтырнас лэбтылӧмась, мӧдмоз я, ог тӧд, Еныс тӧдӧ. Сэксянь чулаліс даснёль во#12:2 даснёль во ─ 14 лет. 3Сійӧ мортсӧ тӧда. Дзир ог тӧд, быдсӧн вывтырнас лэбтылӧмась, вывтырсис петӧмӧн я, Ен тӧдӧ. 4Сійӧ лэбтылӧмась вӧлі райӧ. Сэтчин сія кылӧм кывлытӧм баитӧм, кӧдӧ мортыслӧ оз туй висьтасьны. 5Сэтшӧм мортнас верма ошшасьны. Ачымӧс немись ошкыны. Ме вынтӧм да буди#12:5 буди ─ разве только сійӧн ошшасьны.

6Понда кӧ и ошшасьны, ог ло мывкыдтӧмӧн. Понда эд баитны бӧбӧттӧг. Ме ог понды ошшасьны, видзся. Ась ме йылісь озӧ пыртӧ юраныс унажыксӧ. Ась видзӧтӧны сы сьӧрті, мый адззӧны ме сайын да месянь кылӧны. 7Меным Еныс уна осьтіс-висьталіс. Уна тӧдӧмӧсянь медбы ме ачымӧс вылына эг лэбты, ме дынӧ сувтӧтӧм чушкись, сотаналӧн ангел. Сія вывтырӧс чушкӧ, оз сет ачымӧс вылына лэбтыны. 8Ме Дӧсвидзисьсӧ куимись кори менӧ сы дынісь мездыны. 9Дӧсвидзисьыс тай меным висьталіс: «Менам вынӧ ӧддьӧнжык тыдалӧ вынтӧммезас. Сійӧн тэныт тырмас Менам бурсетӧмӧ». Ӧні ме вынтӧм да сійӧн понда ошшасьны, медбы меын оліс Кристослӧн выныс. 10Сійӧн садь бырӧм коста, менӧ видӧм коста, кӧр абу и медколанаыс, Кристосыс понда вашӧтлӧм-дзескӧтлӧм коста сьӧлӧм вылам бур. Кӧр эд менам аслам вынӧ абу, сэк ме вына.

Коринфись веритіссез понда тӧждісьӧм

11Ошшасьӧмнам ме лои мывкыдтӧм морт кодь. Этчӧдз тійӧ менӧ вайӧтіт. Тіянлӧ аслыныт эд коліс бы менӧ ошкыны, «ыджыт» апостоллэс сьӧрті кӧть ме и некин. Менам быдӧс керӧмӧ абу умӧльжык ны керӧмся. 12Тійӧ адззыліт менчим ыджыт мылаӧн видзсьӧмӧс. Ме пыр Еныс мыччаліс пассэз#12:12 пас ─ знак, знамение, вына да адззывлытӧм керӧммез#12:12 адззывлытӧм керӧм ─ чудо. Оз разь эта мыччав апостоллісь уджсӧ? 13Мый тіянлӧ оз тырмы мӧдік вичкуэз сьӧрті? Дзир ӧтік эд, мекӧт тіянлӧ эз вӧв сьӧкыт. Эта понда ме вылӧ эд лӧгасьӧ. 14Куимӧтпыр ни лӧсьӧтча мунны тіян дынӧ. Месянь тіянлӧ и ӧні оз ло сьӧкыт. Меным эд тіянсянь нем оз ков, тійӧ асьныт колатӧ. Челядь озӧ ӧктӧ пажытьсӧ ай-мамныслӧ, ай-мамыс эд челядьыслӧ. 15Ме кокнита понда видзны ассим быдӧс, мый эм, да и ачымӧс сета тіян понда. Ме эд тіянӧс ёна радейта, поди, сійӧн тійӧ менӧ умӧля радейтат? 16Шуам, ме ачым эг босьтлы тіянлісь, но ме тай ылӧтлісь морт да тіянлісь босьтлі бӧбӧтлӧмӧн. 17Ме тіян дынӧ ыстывлі отирӧс. Видзи я ме мыйкӧ мӧдіккез пыр ас вылам? 18Ме кори Титсӧ ветлыны тіян дынӧ. Сыкӧт ыстылі ӧтік вонӧс. Босьтіс я мыйкӧ тіянлісь Титыс? Эгӧ разь мийӧ керӧ ӧтмоза, ӧтік ловсянь? Огӧ разь мийӧ ӧтік туй вылӧт ветлӧтӧ?

19Эдӧ я юраныт пыртӧ, мийӧ асьнымӧс дорьямӧ пӧ тіян одзын? Мийӧ, Кристоскӧт ӧтлаасьӧммес, висьталам Ен одзын: донаэзӧ, этӧ быдӧс керим, медбы тіянӧс вынсьӧтны. 20Ме пола эд, локтӧмӧ кежӧ тійӧ одӧ лоӧ сэтшӧмӧсь, кытшӧмӧсь колат меным. Сэк и ме ог ло сэтшӧм, кытшӧм кола тіянлӧ. Ась оз ло тіян коласын вермасьӧм, завид кутӧм, лӧгалӧм, видчӧм, весись морт вылӧ баитӧм, норасьӧм, асьӧс вылына лэбтӧм. Ась тіян быдӧс лоӧ арта. 21Кӧр бӧр локта, ась оз ковсьы меным гӧрдӧтны тіян кузя Еныс одзын. Ась оз ковсьы меным синва кисьтны ны понда, кӧдна лэдзчисисӧ керны сэрпӧсьсӧ, кыскасисӧ да эзӧ тӧждісьӧ асланыс умӧль керӧммез кузя.

Павеллӧн медбӧрья кыв

Currently Selected:

2 Коринфын оліссезлӧ 12: БЮ19

Highlight

Copy