1 Петра 2
2
1Сідзкӧ, кольӧ быдпӧлӧс лӧгалӧмнытӧ, бӧбӧтчӧмнытӧ, ылӧтлӧмнытӧ. Дугдӧ завидуйтны, весись морт вылӧ баитны. 2Чужӧм челядьыс радейтӧны мамлісь йӧв. Тійӧ ны моз радейтӧ да кошшӧ Еныслісь кывсӧ. Сысянь зорамат, локтат мезмӧмӧдз. 3Тійӧ эд вежӧртіт: Дӧсвидзисьыс ─ бур.
4Сія ─ ловья из. Отирыс тай Сійӧ абутӧм туйӧ пуктісӧ, а Сія Еныслӧн бӧрйӧмыс, донася-донаыс. Локтӧ Сы дынӧ. 5Тійӧ и асьныт кыдз ловья иззэз. Ась и тіянісь Еныс лэбтӧ Аслас Ловлӧ оланінсӧ. Сэк тійӧ лоат вежауджаліссезӧн#2:5 вежауджалісь ─ священник да Кристос Исусыс пыр, Ен Лов отсӧтӧн пондат вайны езъялан козиннэсӧ#2:5 езъялан козин ─ жертвенный дар, жертва, кӧдна Еныслӧ сьӧлӧмви. 6Вежа Гижӧтас тай висьталӧм:
─ Сион#2:6 Сион ─ Ерусалимлӧн, Енлӧн вежа карлӧн, мӧд нимыс. Сія нимӧн гижисӧ и Ерусалимын оліссез йылісь. вылас Ме пукта пельӧс из#2:6 пельӧс из ─ краеугольный камень.
Сія бӧрйӧм да донася-дона.
Сылӧ веритісьыслӧ Сія абу рожа кулян.
7Сідзкӧ, тіянлӧ, веритіссеслӧ, Кристосыс донася-дона. Вериттӧммеслӧ Сія из, «кӧдӧ керку лэбтіссес абутӧм туйӧ пуктісӧ, а Сія эд лоис пельӧс изӧн. Сія изӧ нія падмӧны да усьӧны». 8Нія и падмӧны, озӧ кывзісьӧ Еныслісь Кывсӧ да. Сідз нылӧ шуӧм лоны.
9А тійӧ Енлӧн бӧрйӧм увтыр, Ӧксулӧн вежауджаліссез. Еныс босьтіс тіянӧс Аслас вежа отирӧн. Сія тіянӧс пемытсис корис адззывлытӧм#2:9 адззывлытӧм ─ невиданный югытас. Тійӧ ӧні сувтӧтӧмӧсь висьтасьны Сылісь бурся-бур керӧмсӧ. 10Одзжык тіянӧс отирӧ эзӧ пуктӧ, ӧні тійӧ Енлӧн отир. Одзжык тійӧ эдӧ тӧдӧ Еныслісь небыт сьӧлӧмсӧ, ӧні Сія Аслас небыт сьӧлӧмсянь тіянӧс проститіс.
Юраліссезӧс кывзісьны тшӧктӧм#2:11 тшӧктӧм ─ заповедь, повеление
11Донаэзӧ! Му вылас тійӧ дзир локтісь-муніссез. Сійӧн кора тіянӧс: эдӧ ни керӧ вывтырныт ӧзйӧтчӧммез сьӧрті умӧльсӧ. Ловныткӧт нія пессьӧны. 12Енсӧ тӧдтӧммес тіянӧс видӧны лёк кериссезӧс моз. Ны коласын овтӧн керӧ нылӧ бурсӧ. Нія пондасӧ адззыны нылӧ бурсӧ керӧмнытӧ да ошкасӧ Енсӧ Сылӧн локтан Лунӧ.
13Керӧ Дӧсвидзисьыс сьӧрті: му вывсис быд юралісьсӧ кывзісьӧ. Кывзісьӧ и ӧксусӧ, сія быдӧнныс вылын юралӧ. 14Быдпӧлӧс юраліссес сувтӧтӧмӧсь мыжйыны#2:14 мыжйыны ─ наказать лёк кериссесӧ да ошкыны бурсӧ кериссесӧ. Нійӧ кывзісьӧ. 15Еныслӧ эд сідз колӧ, медбы тійӧ бурсӧ керӧмнаныт пӧдналіт ӧммезнысӧ мывкыдтӧм отирлісь, кӧдна тӧдтӧг баитӧны вӧвлытӧмсӧ. 16Еныс тіянӧс мездӧтіс, но мездӧтчӧмныт#2:16 мездӧтчӧм ─ свобода ась оз ло умӧль керӧммезнытӧ сайӧвтанӧн. Тіянлӧ эд колӧ овны кыдз Енлӧн раббезлӧ. 17Быдӧннысӧ бурӧ пуктӧ, воннэзнытӧ радейтӧ, Енсис полӧ, ӧксусӧ кывзӧ.
Веритісь раббезӧс велӧтӧм
18Раббез, полӧмӧн кывзісьӧ ассиныт кӧзяиннэзнытӧ. Кывзісьӧ и лӧггесӧ, а не дзир раммесӧ#2:18 рам ─ кроткий да бурресӧ. 19Мортыс Енсӧ юрас кӧ видзӧ да умӧльсӧ кертӧг пессьӧ-мырсьӧ, сія сылӧ Енсянь бурсетӧм. 20Тійӧ кӧ терпитат, кӧр тіянӧс вартлӧны умӧльсӧ керӧмныт понда, мый понда сэк тіянӧс ошкыны? Бурсӧ кӧ керат да пессьӧм-мырсьӧм коста вермат видзсьыны, сія Еныс сьӧрті. 21Тійӧ корӧмӧсь сідз овны. Ачыс Кристосыс эд пессис-мырсис миян понда. Сія миянлӧ мыччаліс, кыдз миянлӧ мунны Сы туй вылӧт.
22─ Сія эз кер нем умӧльсӧ.
Сы ӧмись эз петлы бӧбӧтчӧмыс.
23Кристоссӧ быднёж видісӧ. Сія паныт шы эз сет. Пессьӧм-мырсьӧм коста эз кӧсйись вештісьны умӧльнас. Сія быдӧс сетіс веськыта Судитісь Ен киӧ. 24Аслас вывтырӧн Сія миянлісь умӧль керӧммезнымӧс лэбтіс крест вылас, медбы мийӧ дугдім керны умӧльсӧ да пондім овны Ен сьӧрті веськыта. Сылӧн дойманіннэс тіянӧс веськӧтісӧ. 25Тійӧ вӧліт ӧшӧм баляэз кодьӧсь. Ӧні бертіт тіян сьӧрын Видзӧтісь дынӧ, тіянлісь ловнытӧ Видзись дынӧ.
Гозйӧн олӧм йылісь
Currently Selected:
1 Петра 2: БЮ19
Highlight
Share
Copy
Want to have your highlights saved across all your devices? Sign up or sign in
