Loma 15

Kunlai Bayasugha

1Matan khidun kunla indan goyane bu bayasughazhi khidun witu kunlai zholiennii danjikuni wo. 2Matan alinie kunliuzhe kunlai haochude oluzhi bayasughazhi hhelai hendaghakuni wo. 3Mexihaye goyane ese bayasughazho. Jinwun jiere jilasan mutun, "Chii sugiesan kunlai sugieku man mii jiere irewo." 4Eqighandei huaisan jinwunshi man matande oluzhi sughazhi huaisan wo. Hhe matai rennai gieghazhi sughazhi kieliedene matande xiwon ogizho. 5Bi onxian giese rennai gieghazhi sughazhi kieliesan Huda tai sumuladanyi Mexiha Ersai daghazhi nie gholughadene 6dajiala man hhantu mai Ezhan Ersa Mexihani Ada Hudai kuai!

Soyuji Minzula Hudade Doulane

7Ingiese Mexiha tai jienlieku mutun taye nieniene jienliezhi Hudai kuai. 8Bi kieliese Mexiha Hudai zhendaode oluzhi Yutai kunlade hoji danlazhi xienrenlade dain giesei chenjighawo, 9pse niman kunlai Huda hhelade ubali xiisande kuaighazho. Jinwun jiere jilasan mutun,

"Ingiese bi niman kunlai dunda chii chenren giene.

Bi donghala chii nierei doulane."

10Pse kieliezho,

"Niman kunla, ta Ezhanyi bexinlare hhantu bayasundu."

11Pse,

"Soyuji niman kunla, ta Ezhande doulandu.

Soyuji minzula, hhende doulandu!"

12Pse Isaiya kieliezho,

"Jianlai Yexini houdei irene.

Hhe khizhedene niman kunlai gonjine.

Niman kunla hhei xiwon giene."

13Xiwon ogisan Huda ta xianxin giekude yanyanji bayasukui, pinnanni tai zhughede durughazhi Shenlinni nenlighala xiwon olon ogi gie!

Niman Kunlade Chonjiku Baoloni Wilie

14Mii gaijiula, tande gouni, yanyanji agheli duruzhi ta nieniedene surugha shidakui bi kenjin mejiene. 15Ingieliuzhe bi niezhan shiqin jiere tai sumula ireghane giezhi danzine fugiedaghazhi tande xin huaikushi Huda made ogisan nenjienghala 16bi niman kunlade oluzhi Mexiha Ersade wiliechi danlazho. Bi hhelade Hudai gouxioxii chonjise buwa niekielien wo. Shenlinyi tungo giezhi hhelai zhiguishighadene jienlieku mure mutun Hudade ogizho. 17Ingiese Mexiha Ersai miende bi Hudade oluzhi giesan shiqinde kuaikui wine. 18Niman kunlai shunjighane giezhi Mexiha mii tungo giezhi giesan wiliese chugo bi psedulai yama ulie kieliene. Hheshi kielienji, giekughala giesan wo. 19Ghudureqi, fugie shiqinyi nenlighala, pse Hudai Ruhheryi nenlighala giesan wo. Bi Mexihai gouxioxii Yelusalense izhi Ililigude man chonji kurughawo. 20Ingiezhi bi Mexihani nierei chenliezhi ese daosan oronlade chonjine giezhi hende duralakushi kunlai jigun jiere gie ulie beighane giezho. 21Jinwun jiere jilasan mutun,

"Hhei xioxii mejie dasanla chanlane.

Chenliezhi ese daosanla dunjirene."

Baolo Lomade Echiku Jihua

22Ene yenyin jiere bi tai hhende haojihui echine giezhoma, echi dazho. 23Ede ene oronlade chonjiku oron widazho, pse haojinien bi tai hhende echiku duralazho. 24Ingiese bi Xibenyade echikude tai ochira, xien nietan laiwon giezhi xianshou giedene ta mii khughose giezhi xiwon giezho. 25Ingiezhoma, ede bi Yelusalende echizhi shentulade banman giene giezho. 26Maqidun, Yagaiyani kunla Yelusalenni nanxintu shentulade banman giene giezhi bayasuzhi baer khireighawo. 27Hhela enei bayasuzhi giekushi shuhuajia shentulade chaizho. Niman kunla hhelase ruhher jieredu haochui ghughazhi echise hhela injikude banman giese indanji wo. 28Ingiese bi kunla khireighasanni goude jiuizhi ogi ene shiqinyi onchen giedene tai hhense jingo giezhi Xibenyade echine. 29Bi tai hhende irekude Mexihani olon nenjienni deilazhi irekui bi mejiene.

30Gaijiula, bi matanyi Ezhan Ersa Mexiha, Shenlinni orekughala tande goude fenfulaye. Ta mare hhantu xiacha giezhi made oluzhi Hudase ingiezhi onxian gie, 31"Mii Yudaya oronni xianxin ulie giechen kunlai khade bu oroghazhi bi Yelusalende banman giesan shiqinde shentulai bayasuzhi jienliegha gie. 32Pse mii Hudai isighala tai hhende bayasuzhi iregha tanre hhantu hhamuragha gie." 33Pinnan ogisan Huda ta dajialare hhantu bi gie. Amine!

Currently Selected:

Loma 15: sce

Highlight

Copy