Matai 24

Jianlai Mechini Widaghane

(Mak 13:1-2; Luj 21:5-6)

1 Ersa mechise khizhedene yokude tujilani ire mechii loulani hhende zhiizhi uzheghawo. 2Ersa tujiladene kieliewo, "Ta enelai man chanlawu? Bi tande shuhua kielieye, jianlai man cheizhi tashi jiere tashi nieda ulie jiene."

Duyani Zuihouku Zunji

(Mak 13:3-13; Luj 21:7-19)

3 Ersa Ganlanshande soukude tujila konkonji ire asazho, "Yan xienzide ene shiqinla fashen giene? Chi irezhi duya barakude yan zunji bikui bijiende nie kielie." 4Ersa hhelade kieliewo, "Ta xioxin giezhi kunlai bu piendagha. 5Olon kunla mii niereghala iredene bishi Mexiha wo giezhi olon kunlai miine. 6Ta eghindusan, eghindune giesan xioxini sonosune. Ingiese goujida bu jinda. Ene shiqin kenjin fashen gienema, duya baraku shihou dou ese kuzhezho. 7Minzu, minzula eghindune. Gojia, gojiala eghindune. Gochude oliesuzhi zemin gojiolune. 8Eneshi tendunni keitou wo."

9"Hhe shihoude kunla tai barei echidene heizhi alane. Mii yenyinghala go minzula tai henjine. 10Hhe shihoude olon kunla jiomunni bendane. Nieniene ghudanduzhi henjindune. 11Olon jia xienzhila khizhedene olon kunlai miine. 12Mouxienni olodozhi kunlai oreku zhughe widane. 13Ingieliuzhe rennai giezhi zuihou kusanlai jiuine. 14Asiman gojiani gouxioxini qienxiade chonji kurughazhi soyuji minzulade ganzhen beidene caigie duya baraku kuzhene."

Fugie Zeinan

(Mak 13:14-23; Luj 21:20-24)

15"Ingiese Danyili xienzhi kieliesan hhe pohai giezhi hanzhan gieghaku zhiguitu oronde beisei ta chanlane. (Onshichen kunla, ene kielienni isii dunjirekuni wo.) 16Ingiekude Yudayade sousan kunla, ulade piile echi. 17Gie jieredula, giederase dunxi agile bu bouzhe. 18Ghazha jieredula, khareizhi jienne agile bu echi. 19Hhe udude kewosi laisan, gogoghasanlade gou widawo. 20Ta holukude uncha, hhamuraku udui bu kuzhegha giezhi onxian gie. 21Ingiekushi hhezighan udude zeinan zui fugie wo. Duya kaishi giesanse eli kutula imutu zeinan uwo, khuinashiye uwo. 22Hhezighan zeinantu udui ese choghonshighazhoshi nieda jiui danema, sunghusan kunladene oluzhi choghonshighane. 23Hhe udude kunla tande uzhe, Mexiha enende wo, hhende wo giese ta xianxin bu gie. 24Jia Mexiha, jia xienzhila khizhezhi fugie ghudureqi, fugie shiqinlai giekushi sunghusanlaiye kenen miine. 25Uzhe, bi shiqinlai tande eqie kieliewo. 26Ingiese kunla tande uzhe, 'Mexiha hontande wo.' giezhi kieliese ta khizhi bu echi. Pse, 'Uzhe, hhe giedera wo.' giezhi kieliese ta xianxin bu gie. 27Shanjien dunmiense khizhezhi ximiende zhouiku mutun Kunnikewon irekudeye ingiene. 28Fugusan dunxi khalashi inye khala wo."

Kunnikewon Ireku

(Mak 13:24-27; Luj 21:25-28)

29"Hhezighan zeinanni udu jian daose

naran kharalane.

Sara gon ulie faine.

Hodunla asiman jierese anda bouzhene.

Asimanyi lilianla gojiolune.

30Ingiekude Kunnikewonyi zunji asiman jiere khizhene. Zemin jieredu minzula man wilane. Hhela Kunnikewon nenli, famanude olien jiere irekui chanlane. 31Laba fugiede tunguliese Kunnikewon qienxienlane peizhi asiman enemanse hhemande kutula sunghusan kunlane simiense uruzhi hhantulaghane."

Uhuago Mutunse Suruku

(Mak 13:28-31; Luj 21:29-33)

32"Ta uhuago mutunyi bilasei suru. Mutun niazi faizhi lachen keise khaluncha orokui ta mejiene. 33Taye niekielien wo. Ta ene shiqinla fashen giesei man chanlase hhe shihou chadashizhi shida kuzhesei mejiene. 34Bi tande shuhua kielieye, ene idaini kunla fugutula ene shiqinla man gholune. 35Asiman, zemin widaliuzhe mii kielien kenjin ulie widane."

Hhe Uduni Mejiechen Kun Uwo

(Mak 13:32-37; Luj 17:26-30, 34-36)

36"Hhe udu, hhe shihouni kiema ulie mejiene. Asiman jieredu qienxienlaye ulie mejiene. Kewonye ulie mejiene. Zinie Ada mejiene. 37Nuhhani xienzide matugiezhoshi Kunnikewon irekudeye qingiene. 38Hunshuise melieshidaku hhe xienzide kunla ijiezho, ochizho, bierei agizho, dafalazhi izhi Nuhha chon sudoro oroku hhe udude kuruwo. 39Yamai mejie dakude hunshui iredene kunlai man tou yolawo. Kunnikewon irekudeye ingiene. 40Hhe shihoude ghua kun ghazha jiereshi niei uduru echine, niei jiene. 41Ghua bierei qieman sidase niei uduru echine, niei jiene. 42Ingiese ta jinxin gie. Tai Ezhan yan xienzide irekui ulie mejiene. 43Ta enei mejie, giei ezhan ghughei yan xienzide irekui mejiese jinxin giezhi giedene ulie oroghane. 44Ingiese ta goude zhunbei giendu, ta mejie dakude Kunnikewon irene."

Kekaotu Kekao Witu Hojila

(Luj 12:41-48)

45"Qinse kienshi kekaotu jienzha hoji wo? Zhanguijini hhende giededu hojilai, ijiekulani man gonjighasan pushonu? 46Zhanguiji irekude hoji ingiezhi giesei chanlase hhe hojide fuqi wine. 47Bi tande shuhua kielieye, zhanguiji hhende caichanlane man gonjighane. 48Hhe doghun hoji zhughedene sumulazhi mini zhanguiji deigo ulie irene gie, 49psedu hojilai eghizhi sudosan kunlare ochizhi ijiese, 50hhe sumula daku udu, mejie daku shihoude zhanguijini iredene 51hhei sidasunyi qiuizhi jiazhon giesan kunlare hhantu faise hhende shidunne zhouzhi wilane."

Currently Selected:

Matai 24: sce

Highlight

Copy