Ifuso 4

Mexihani Sudoro Heqishi

1Ingiese Ezhande oluzhi bafanzi sousan bi tai sidaghaye, ta yan giese zhao Huda tai urusan mutun gie. 2Yandeliuzhe goyane meilade uzhezhi renyide gie. Rennai giezhi oreku zhugheghala nieniedene ranji. 3Heqighala nieniene lienjizhi Shenlin tonjie gieghasanni xiacha giezhi barei. 4Tai urukude nie xiwonde urusan mutun nie beye, nie Shenlin, 5nie Ezhan, nie xianxin gieku, nie xili gieku, 6nie Huda wo. Hheshi soyujilai ada wo, soyujilai jiere soyujilai dunda soyujilai sudoro wo.

7Matan jien kunde Mexiha ghughazhi ogisan nenli wine. 8Ingiese jinwun jiere kieliezho,

"Hhe undude khireikude

olon duitoulane barei khireiwo,

kunlade nenlilai ogiwo."

9Hhe khireiwo giezhi ene kielienshi yan isi wo? Hhe xien doura, jiushi zemin jiere bouzhesan pushonu? 10Bouzhesan hheshi zui undu asimande khireisan Hhe wo. Ingiezhi giekushi soyujilai hulunshighane giezho. 11Kun dunda niezhanlade shitu, xienzhi, gouxioxi chonjichen, mushi, loushi danlaku nenlini ogisanshi Mexiha wo. 12Ingiezhi giekushi Mexihani wiliede oluzhi shentulai goude zhunbei gieghadene Mexihani beyeni hendaghane giezho. 13Izhi ingiezhi giezhi matan dajiala Hudai kewonyi xianxin giezhi taniku jiere nie gholudene fugiedazhi Mexihani hulunnide daine. 14Ingiese matan pse kewosi ulie danlazhi kunlai doghun muji, piendaku guijijighala yanyanji xiejioni inxianyi shouizhi eneman, hheman ulie gojioludene 15oreku zhugheghala shuhua kieliezhi go fanmiende touzi danlasan Mexiha mutun hendane. 16Mexihai kouizhi nie beyei sidasunla man chigharade lienjizho. Go iyanzi zoinlane khizheghazhi nie beyeni oreku dunda fugiedazhi hendaghazho.

Shini Kunni Musi

17Ingiese bi enei Ezhanni miende tande khidunde kielieye. Pse niman kunla mutun qingiezhi udu bu dao. Hhelai sumuladan yama oronde uwo, 18zhugheni kharalazho. Hhela yama ulie mejiezhi zhughene khiduzheghase Huda ogisan aminse danlinrazho. 19Hhela shizhekui mejie dazhi hu giedene nefuxinghala yanyanji zannanni giene. 20Ta Mexihase surusanshi intui pusho. 21Zhendao Ersai sudoro wo. Ta Ersa Mexihani chenliezhi hhense suruse 22khuichen kunni teizhi eqighanku xigonlai widagha. Eneshi nefuxin miidene qida olusan wo. 23Ta zhughe, sumulakune shinishighazhi 24Hudai yanzi mutun zhenzhenji gundan, ganjinde zhayaghasan shini kunni musi.

Shini Udu Daoku Guijin

25Ingiese ta pse ghudan bu kielie. Jien kun kunlade shuhua kielie. Matanshi nie beye jieredu iyanzi wo. 26Hokuse zui bu fanji, hokuzhi naran bu puda. 27Pse Ibiliside jihui ogine. 28Ghulachenla pse bu ghula. Goyade iresei nanxin kunlade ghughazhi ogine giezhi qinsi zhendande wilie gie. 29Zannan kielienni nie amanda bu khizheghazhi heshide kunlade banjiku kielien kielie. Ingiese chenliesan kunde haochu wine. 30Hudai Shenlinni yuchou bu giegha. Hhe shuiku udude oluzhi tai jiere hhei zhanzii taizho. 31Yanyanji henjiku, piqi shuaiku, hokuku, nouiku, kufurei fanjiku, pse mouxiennilai man tai dundase widagha. 32Huda Mexihai miende tai rouliesan mutun taye renyitu zhugheghala ubali xiizhi nieniene roulie.

Currently Selected:

Ifuso 4: sce

Highlight

Copy

Compare