Tujila 26

Baolo Yajipai Melie Goyane Huizho

1 Yajipa Baolode kieliewo, "Chi goyadene oluzhi kielie." Ingiese Baolo khane zhadeigha goyane huizhi kieliewo, 2"Yajipa honshan, Yutai kunla mii zhasan shiqinde enedu chii melie bi goyane huise mii inqi gou wo. 3Tebieshi chi Yutai kunlai xigon, jianjindukulai man shuxi wo. Ingiese bi chii xiahua gieye, chi rennai giezhi bi kieliesanyi chenlie."

4"Bi meila shihouse izhi goya kun dundane Yelusalende matugie giesei Yutai kunla man mejiene. 5Bishi mai jiomun dundadu zui chigharadu Falisai paini nie goude giesan kun bikui hhela eqighanse mejiene. Enei hhela duran bise ganzhen bei shidane. 6Ede mii enende beigha shenwun giekushi Huda mai xienrenlade dain giesei bi panjiwo giezho. 7Ene panjikushi mai 12 gie paini kunla xieni udu Hudai goude beiizhi ene dain giesei gholuse giesan hhe wo. Honshanya, ene nie panjiku yenyin jiere Yutai kunla mii zhazho. 8Ta yale Huda fugusan kunlai aminne olughase xianxin giekui pusho giezho?"

9"Shijishan bi goyane Nasale kun Ersai jinlianji fandui giese indanji wo giezhi sumuladene 10Yelusalende ingiezhi giewo. Fugie buwalase qienli keredene shentulai bafanzide khazhi, da hhelai sixin panjikude beizhi bi tunyi oluwo. 11Bi pse go huitanlade olonfa hhelai faizhi biidene Ersani sugieghazho. Bi hhelade hende hokuzhi da niman kunlai chenshilade echizhi heizho."

Baolo Ezhanyi Xianxin Giesei Kieliezho

(Tuj 9:1-19; 22:6-16)

12"Ene mujighala bi fugie buwalase qienli, minlinni bareidene Damashigede echine giezho. 13Honshanya, zhunwude bi mo jiere yokude chanlase asimanse gon faizhi naranse da gieghan wo. Simiende bi, bighala hhantu yosan kunlai zhouizho. 14Bijien man zemin jiere fura bouse nie shenqi Xibolai kielienghala made kieliewo, 'Saolo! Saolo! Yale mii heine? Chi fugherei mutun ezhanni eghesuntu teiyai qiuise goyane shanjine.'"

15"Ingiese bi kieliewo, 'Ezhan, chishi kien wo?' Ezhan kieliewo, 'Bishi chi heisan Ersa wo. 16Chi bosizhedene bei. Bi goyane chade xienjighakushi chii goyadene hoji danlaghazhi chi mii chanlasan shiqinde, pse bi chade jianlai xienjighaku shiqinde ganzhen beighane giezho. 17Bi chii Yutai kunlai, niman kunlai dundase jiuizhi khizhene. Bi chii peizhi hhelai hhende echighadene 18nudunlaini keighazhi kharanise gon dunda ireghane. Ibilisii nenlise likai gieghazhi Hudade shunjighane. Ingiese mii xianxin giezhi zuini mienliedene zhiguitu gholusan kunlare hhantu guzide beighane.'"

Baolo Giesan Wiliene Kieliezho

19"Yajipa honshanya, bi asimanse iresan zhoujin mutunyi shunjizhi 20xien Damashigede, pse Yelusalende, Yudayani go oronlade, niman kunlade chonjizhi geizhen giedene Hudade shunjizhi geizhen giesan shiqinne giezhi uzhegha giewo. 21Ene yenyin jiere Yutai kunla mechide mii barei agidene alane giezho. 22Ingieliuzhe enedu kurutula Huda made banman giese bi enende beizhi undu kun boghoni kunliuzhe hhelade man ganzhen beizho. Xienzhila, Musa kieliezhi jianlai fashen giene giesan shiqinse chugo bi yama ese kieliezho. 23Hheshijiu Mexiha bixi shouku giedene fugusan kun dundase xien aminne oludene Yutai kun, niman kunlade gonni mejieghane giesan wo."

24 Baolo ingiezhi huise Feisidu fugiede kieliewo, "Baolo, chi fenjiulizho. Chii unhua texien undudase chii fenjiulighazho!"

25 Baolo kieliewo, "Feisidu fugie noyen, bi uye fenjiulizho. Bi qinchude sumulasan daolini kieliezho. 26Honshanye ene shiqinlai mejiene. Ingiese bi uye ayizhi hhende kieliezho. Ene shiqinni beimiende ese giezho, ingiese enelai noyende nieda mii dakui bi mejiene. 27Yajipa honshanya, chi xienzhini xianxin gienu? Chi xianxin giekui bi mejiene."

28Ingiese Yajipa Baolode kieliewo, "Chi intughanighala mii kieliezhi Mexihani tuji gholughanu?"

29 Baolo kieliewo, "Intughaniye olune, olonye olune. Chi, pse enedu enende chenliesan kunla man bi mutun gholuse giezhi bi Hudase onxian giezho, zinie bi mutun jieliu bu zho giezho."

30Ingiese honshan, shenzhan, Beinisi, pse sousan kunlare bosizhedene 31khuina dao echi nieniedene kieliezho, "Ene kun fuguku, khaku zui ese fanjizho."

32Ingiedene Yajipa Feisidude kieliewo, "Ene kun Kaisa honshande ese zhazhoshi eqighan andaghawo."

Currently Selected:

Tujila 26: sce

Highlight

Copy