Tujila 1

Shenlinni Saghei Giezho

1-2 Qiafeilo noyen, bi melieshiku shu jiere Ersa wilie giezhi qiisanse sunghusan shitulade Shenlinghala fenfulasenu asiman jiere khireiku hhe udu kurutula hhe giesan, surughasanlai man huaiwo. 3Ersa ku shouidene olon zhenjighala goya aminne oluwo giezhi shitulade uzheghawo. 40 qien dunda shitulade xienjighazhi Hudai gojiai shiqinyi jianjizho. 4Ersa hhelare hhantulakude fenfulazhi kieliewo, "Ta Yelusalense likai bu giezhi bi tande kieliesan mutun Ada dain giesei saghei. 5Yaheiya usughala xili gieghawoma, giedudu ulie beizhi tai Shenlinghala xili gieghane."

Ersa Asiman Jiere Khireiwo

6Hhela man hhantu bikude Ersade asawo, "Ezhan, chi ene shihoude Isilie gojiani yen goudaghanu?" 7Ersa hhelade kieliewo, "Ada qienlighalane jinjisan shihou, uduni ta mejiekuni pushoma, 8Shenlin tai jiere bouzhese tande nenli irezhi ta Yelusalen, Yudaya, Samaliya, pse duyai uzhude kutula made ganzhen beine." 9Ene kielienyi kielie baraghadene hhela uzheku shihoude asiman jiere khireiwo. Niegieda olien hhei jienlie echise chanla dawo. 10Hhe khireikude hhela asiman jiere xianxide uzhese menzhali ghua chighan jien musisan kun hhelai kanzide beizhi kieliewo, 11"Jialili kunla, ta yale beizhi asimanyi uzhene? Tanse likai giezhi asiman jiere khireisan Ersa, ta matugie uzhezhi khireighazhoshi yen qingiezhi irene."

Maqiyani Shitu Sunghuwo

12Ingiedene hhela Ganlanshanse Yelusalende khareiwo. Ganlanshan Yelusalense chada wo, hhamuraku udude yose olune. 13Hhela chenshide orodene sousan lou jierene khireiwo. Hhende Beduru, Yaheiya, Yagebu, Andelie, Feili, Doma, Badolomai, Matai, Yalefeini kewon Yagebu, Rexinpaini Ximun, Yagebuni kewon Yuda enela wine. 14Enezighan kunla, giedun bierei, Ersani anani Mereiyen, gaijiulareni hhantu hende onxian giezho.

15Hhe oloncha chabudu 120 gie gaijiula hhantulakude Beduru bosizhedene kieliewo, 16"Gaijiula, jinwun jiere Shenlin Dawudei amanghala melieshi kieliesan mutun Yuda kunlai uduruzhi Ersai bareiku shiqin zhao hhe mutun gholuse indanji wo. 17Hhe yenlaishi matanyi dundashiku nie wo. Shitula gieku wiliese ibufen zhanjizho. 18Ene nie kun gou wiku baerghala nie ghazha agiwo. Ingie ghazhadene fura bou, kielini gha oluzhi khizhesunlani usuru khizhezho. 19Yelusalende sousan kunla ene shiqinni man mejiewo. Ingie goyalane kielienghala ghazhaini Yagedama giewo. Isishi chusun ghazha wo. 20Enei Zeburei jiere ingiezhi kieliezho,

'Hhei sousan oronni honji gholuzhi

kiemai ulie soughasejiu.'

Pse kieliezho,

'Danie kunyi hhei oronde jinjighasejiu.'

21-22Ingiese Ezhan Ersa matanyi dunda giekude Yaheiya xili gieghasanse Ezhan matanse likai giezhi asiman jiere khitula matanre chan hhantu bisan kun dundase nie sunghuzhi Ersa fuho giesande ganzhen beighakui wo."

23Ingiedene hhela sunghune giezhi ghua kunyi khizheghawo. Nieshi Yusufu wo. Hhei Basabaye giene, Yushidu giezhiye uruzho. Da nieshi Maqiya wo. 24-25Hhela onxian giezhi kieliewo, "Ezhan, chi kunlai zhughei man mejiene. Chi ene ghua kunse kienyi sunghuzhi ene shituni wiliei giekui bijiende mejiegha. Yuda ene wiliei bendadene goya orondene echiwo." 26Ingie hhela fendan qiangudene Maqiyani choui khizhewo. Hhei 11 gie shitulare hhantulaghawo.

Currently Selected:

Tujila 1: sce

Highlight

Copy