Румазухъе кагъат 6

6 бетӀер

Мунагьалъе хвеялъул магӀна щиб?

1Цоги щиб дица абилеб? Аллагьасул баркат цӀикӀкӀине бокьани, церего гӀадин мунагьал гьаризе кколинищ? 2Кколаро! Мунагьалъе хвана нилъ! Гьанжеги мунагьал гьаризе бегьилищ нилъеца? 3Яги нужеда кӀочонищ тараб ГӀиса МасихӀгун цолъизе нилъ лъадаца чурараб заман? Гьеле гьедин нилъги лъадаца чуридал, гьесул хвел нилъееги гӀахьалаблъун лъугьана. 4Лъадаца чурун хвел гӀахьалаблъун гьабидал, гьесда цадахъ хабалъги рукъана нилъ. Инсул кӀудияб къудраталдалъун хваралъуса вахъинавурав МасихӀида релълъун, гьанже нилъедаги кӀола цӀияб гӀумру гьабизе.

5Гьедин МасихӀил хвелалдалъун нилъ гьевгун цолъун ругони, гьайгьай, чӀаголъизариялдалъунги цолъила нилъ гьевгун. 6Нилъеда лъала цеве нилъелъ вукӀарав инсан гьесда цадахъ хъанчида ван хваравлъи – нилъелъ бугеб мунагьалъул къуват лъугӀизе ва мунагьалъул лагъзаллъун нилъ хутӀунгутӀизе. 7Хварав чиясда тӀад мунагьалъ ханлъи гьабуларелъулха!

8Нилъ божула, МасихӀида цадахъ хведал, гьесда цадахъ чӀаголъизе рукӀиналдаги. 9Нилъеда лъала хваралъуса вахъинавурав МасихӀ тӀокӀав хвезе гьечӀевлъи. Хвалил кверщел хутӀичӀо гьесда тӀад. 10Гьев цо нухалда хвана, мунагьалъе хвана гьев. Гьанже гьев чӀаго вуго, Аллагьасда цеве чӀаго вуго. 11Гьедин нужецаги нужго рикӀкӀе, МасихӀиде цолъун, мунагьалъе хвараллъун, Аллагьасда цере чӀагояллъун.

12Гьединлъидал хвалил кверщаликь бугеб нужер чорхолъ мунагьалъ ханлъи гьабизе биччаге. 13Нужер чорхол лугби мунагьалъул кверщаликье ккезе риччаге, квешлъи гьабизе квалквадулеб ярагълъун ккезе риччаге гьел. Хвел тӀаса инабун чӀаголъиялде рачарал Аллагьасда кодоре кье нужго ва ритӀухълъиялъе квалквадулеб ярагълъун нужер чорхол лугбиги кье. 14Мунагьалъ нужеда тӀад кверщел гьабизе бегьуларо, щайгурелъул Къануналъул кверщаликь гурел, Аллагьасул баркаталъул кверщаликь ругелъул нуж.

РитӀухълъиялъул лагъзаллъун лъугьана нуж

15Щибха гьанже гьабизе кколеб? Къануналъул кверщаликь гьечӀого, Аллагьасул баркаталъул кверщаликь ругелъул, мунагьалищ гьарилел? Гьариларо! 16Цо лъиениги мутӀигӀлъун, гьесие лагълъи гьабулеб бугони, хӀакъикъаталдаги нуж гьесул лагъзаллъун лъугьунеллъи лъаларищ нужеда? Нужее буго кӀиго нух: хвалде рачунеб мунагьалъе мутӀигӀлъи яги жиб сабаблъун Аллагьас инсан ритӀухълъизавулеб мутӀигӀлъи. 17Кидаялиго нуж мунагьалъул лагъзаллъун рукӀарал ратаниги, Аллагьасе рецц, нужеца ракӀ-ракӀалъ къабул гьабуна дица малъарабщинаб. 18Нуж мунагьалдаса тархъанлъана ва ритӀухълъиялъул лагъзаллъун лъугьана.

19Нужер напс жеги загӀипго бугелъул, нужеда гьеб дица гӀадатияб мацӀалда бицунеб буго. Нужер чорхол лугбуз хъублъиялъе, квешлъи-пасалъиялъе лагълъи гьабулеб букӀараб гӀадин, гьанже гьел тӀаме нуж рацӀцӀалъизарулев Аллагьасе лагълъи гьабизе. 20Мунагьалъул лагъзаллъун ругеб заманалда рацӀцӀалъиялъул кверщаликьа рорчӀун рукӀана нуж. 21Гьанже нужго намуслъулел дол ишаздаса щиб пайда ккараб нужее доб мехалда? Хвалдейин додинал ишаз рачунел! 22Амма гьанже мунагьалдаса тархъанлъараб ва Аллагьасул лагъзаллъун лъугьараб мехалда нужее ккараб пайдаялъ хӀалалаб-бацӀцӀадаб гӀумруялде рачуна. Ва ахиралда абадияб гӀумруялдеги рачуна! 23Хвел буго мунагьалъухъ кьолеб мухь, амма абадияб гӀумру буго нилъер ТӀадегӀанав МасихӀ ГӀисаде цолъарал нилъее Аллагьасул сайигъат.

Currently Selected:

Румазухъе кагъат 6: АварАК

Highlight

Copy