Румазухъе кагъат 14

14 бетӀер

Божи-иман загӀипав чиясда гӀайиб чӀваге

1Божи-иман загӀипав чи нужехъего ваче, гьесул пикрабазухъ балагьун дагӀбадизе-къацандизе лъугьунге. 2Масала, цоясул божи-иманалъ гьесие изну кьола бокьа-бокьараб квен кваназе. Амма цогидав божи-иман загӀипав чияс гьан кваналаро. 3Бокьараб квен кваналес хӀакъир гьавизе бегьуларо гьеб кваналарев чи. Бокьараб квен кваналарес гьеб кваналесда гӀайиб чӀвазеги бегьуларо, – гьевги Аллагьас къабул гьавунлъидал вугев. 4Дур ихтияр щиб чияр лагъасда гӀайиб чӀвазе? Квеш хьваданиги, лъикӀ хьваданиги, бетӀергьанас тӀубала гьесул иш. ХӀакълъунго лъикӀ хьвадила гьев. БетӀергьанасда хӀалкӀолелъул гьев лъикӀ хьвадизавизе.

5Цояс рикӀкӀуна пуланаб къо цогидаздаса хирияб бугилан. Цогидасе киналго къоязул батӀалъи гьечӀо. Виччанте щивав чи жиндир гӀакълу нахъгӀунтӀараб къагӀидаялъ хьвадизе. 6Пуланаб къо хирияб бугилан рикӀкӀунес гьеб гьабула ТӀадегӀанасе гӀоло. Гьан кваналесги гьеб кванала ТӀадегӀанасе гӀоло, кванан вахъараб мехалъ гьесие рецц гьабулелъул. Гьан кваналаресги гьеб кваналаро ТӀадегӀанасе гӀоло – гьесги Аллагьасе рецц гьабулелъул.

7Нилъеда гьоркьов цониги чи гьечӀо цохӀо жиндиего гӀоло гӀумру гьабулев, нилъеда гьоркьоса цониги чи цохӀо жиндиего гӀоло хвезеги холаро. 8Нилъ чӀаго ругеб заманаялъ, нилъ рукӀуна ТӀадегӀанасе гӀоло гӀумру гьабулел. Хвезеги нилъ ТӀадегӀанасе гӀоло хола. ЧӀаго ругониги, хун ругониги – ТӀадегӀанасул халкъ буго нилъ. 9Щайин абуни, МасихӀ хвана ва чӀаголъана хваразулги чӀагоязулги ТӀадегӀанавлъун лъугьине.

10Щай дуца дурго диналъул вацазда гӀайиб чӀвалеб? Яги щай дуца гьел хӀакъир гьарулел? Нилъее киназего суд Аллагьасин гьабизе бугеб. 11ТӀухьдузда хъван буго: «Дун чӀаго вукӀин хӀакъаб бугеб гӀадин, щибаб наслуялъ дие сужда гьабизе букӀинги, щибаб мацӀалда Аллагьасе рецц гьабизе букӀинги хӀакъаб бугилан гьедулев вуго БетӀергьан». 12Нилъер щивав чияс жинцаго кьела Аллагьасда цебе жаваб. 13Гьединлъидал, рачӀа нилъеца цоцазда гӀайиб чӀваларин. Бищунго лъикӀаб букӀина диналъул вац къосинавулеб яги гьев мунагьалъукье кколеб иш гьабичӀого тани. 14ТӀадегӀанав ГӀисагун цолъарав чи вугелъул, дир тӀубанго ракӀчӀола цониги нигӀмат жибго жиндасанго хӀарамлъулареблъиялда. Инсанас жинцаго хӀарамаблъун рикӀкӀунеб нигӀмат гьесие хӀарамаблъун лъугьуна. 15Амма дуе хӀалалаб нигӀмат сабаблъун дуца дурго диналъул вац къварид гьавулев вугони, гьесдехун рокьи гьечӀолъи бихьула гьелдасан. Кваналеб нигӀмат сабаблъун хвезавуге жиндие гӀоло МасихӀ хвалде арав дурго диналъул вац.

16Нужеца лъикӀалилан рикӀкӀунел ишазул хӀакъалъулъ квешаб хабар тӀибитӀизе биччаге. 17Нужеца кваналелда яги гьекъолелда бараб гьечӀо Аллагьасул ПарччахӀлъи. Гьеб ккола Илагьияб РухӀалъ насиблъизабулеб ритӀухълъиги, саламалъиги, рохелги. 18Гьедин МасихӀие хъулухъ гьабулевщинав чиясдаса Аллагь разилъула, гӀадамаз гьесул хӀурматги гьабула.

19Гьединлъидал, рачӀа нилъеца хӀаракат бахъизин нилъеда гьоркьоб рекъелги щулалъулел, цоцазе квербакъиги камиллъулел ишал гьаризе. 20Кванил нигӀмат сабаблъун Аллагьасе бокьухъе гӀуцӀараб иш гӀадада хвезабуге. Кинабгоги нигӀмат хӀалалаб буго. Амма цо кинабалиго нигӀмат кваналеб бугин гьесилан дуца инсан къосинавизе бегьуларо. 21Диналъул вац къосинавизегӀан, гьан кваначӀого, чагъир гьекъечӀого чӀей лъикӀ. 22Гьелъул рахъалъ дурго пикру дуего те, дудаги Аллагьасдаги лъазе биччанте гьеб.

Гьардарав гурищ, жиндирго пикруялда рекъон хьвадун, жиндаго гӀайиб чӀваларев чи. 23Пуланаб нигӀмат жиндие хӀарамаб батилилан щаклъи ккун хадуб, гьеб кванарав чиясе тамихӀ гьабула, – жиндирго божи-иманалда рекъон хьвадулев гьечӀелъул. Божи-иман жиндир аслу-кьучӀлъун гьечӀебщинаб жо мунагь ккола.

Currently Selected:

Румазухъе кагъат 14: АварАК

Highlight

Copy