Румазухъе кагъат 13

13 бетӀер

«ХӀукуматалъе мутӀигӀлъе»

1ХӀукуматалъе мутӀигӀлъе нуж киналго. Аллагьас тӀад тараб гурони хӀукумат букӀунаро. Аллагьасул хӀукмуялдалъунин хӀукумат гӀуцӀун бугеб. 2Гьединлъидал хӀукуматалде дандечӀолев чи ккола Аллагьас гӀуцӀаралда дандечӀолев чи. Гьесие тамихӀ гьабула. 3ХӀакимзабаздаса хӀинкъи букӀуна квешго хьвадаразе, – ритӀухъго хьвадулезе букӀунаро. ХӀакимасдаса хӀинкъи гьечӀого вукӀине бокьун бугищ? РитӀухъго хьваде, гьес мун веццила. 4Гьев хӀакимги ккола дуе лъикӀлъи гьабизе Аллагьас тӀамурав лагъ. Амма дуца квешлъи гьабулеб бугони, гьесдаса хӀинкъа мун, гӀадада гурелъул гьес хвалчен борчун бугеб. Аллагьасул лагъ вуго гьев, квешлъи гьабуразе Аллагьасул хӀукму тӀубазабулев. 5Гьединлъидал мун хӀакимзабазе мутӀигӀлъе, тамихӀ гьабилилан хӀинкъун гуревги, намус-яхӀ цӀунунги. 6Нужеца налогалги кьолел руго, жидеда тӀадаб ишги тӀубазабун, гьел хӀакимзабаз Аллагьасе хъулухъ бацӀцӀад гьабулелъул. 7ХӀасил, гьезие кьезе кколебщинаб кье нужеца: налог кьезе кколесе налог кье, магъало кьезе кколесе магъало кье, адаб гьабизе кколесул адаб гьабе, хӀурмат гьабизе кколесул хӀурмат гьабе.

Цоцазе рокьа

8Сундулъго цоцазе налъулаллъун рукӀунге нуж, цоцазе рокьиялъул налъи буго нужеда тӀад. Цогидав чи вокьулес тӀуразарула Къануналъул тӀолалго амруял. 9Кинаб амру босун халгьабуниги – «ХъахӀбалъи гьабуге», «Чи чӀваге», «Бикъуге», «Чияр боцӀуда бер бахиллъуге» – гьезул магӀна цолъула: «Мунго гӀадин вокьа дуда аскӀов вугевги» абураб цо амруялъулъ. 10АскӀов вугесе квешлъи гьабуларо рокьиялъ. Гьединлъидал рокьи ккола Къануналъул амруял тӀуразарилъун.

«ГӀиса тӀадвуссун вачӀунеб къо гӀагарлъулеб буго»

11Гьаб заман кинаб бугебалиги бичӀчӀун хьваде! Макьидаса ригьине мех щвана нужее, доб нужеца иман лъураб заманалдасаги цӀикӀкӀун гӀагарлъун буго гьанже хвасарлъи! 12Сордо рогьунеб буго, рогьел гӀагарлъулеб буго. РачӀа бецӀал ишал рехун тезин, нуралъул ярагъ борчинин! 13Бакъул канлъухъе гьабизе рекъараб гӀумруялде рачӀинин – гьекъелги мехтелги гьечӀеб, хъахӀбалъиги пасалъиги гьечӀеб, дагӀба-рагӀиги жахӀда-хӀусудги гьечӀеб – гӀумру гьабизин. 14Биччанте ТӀадегӀанав ГӀиса МасихӀ нилъее чадирлъун вукӀине. Мунагьаб напсалъе бокьараб гьабилин ракӀалдецин ккезе биччаге.

Currently Selected:

Румазухъе кагъат 13: АварАК

Highlight

Copy