Румазухъе кагъат 12

12 бетӀер

«Гьаб дуниялалъул халкъ хьвадулеб къагӀидаялъ хьвадуге нуж»

1Аллагь разилъулеб къурбаналъе хъолеб кьегӀер хӀалалабги бацӀцӀадабги букӀине ккола. Аллагьас цӀоб лъедал, дица нужеда гьарулеб буго, диналъул вацал, нужер чурхдулги гьелда релълъун рукӀунеб хӀалалъ хьвадейилан. ХъвечӀониги къурбанлъун ккола Аллагьасе гьабулеб бугеб нужер унго-унгояб хъулухъ. 2Гьаб дуниялалъул халкъ хьвадулеб къагӀидаялъ хьвадуге нуж. Биччанте Аллагьас нуж хисизаризе, биччанте нужер гӀакълуги цӀияб букӀине. Гьелдалъун бичӀчӀила нужеца щиб гьабизе Аллагьасе бокьун бугебали, батӀа бахъизе лъала Аллагь разилъулебги, лъикӀабги, камилабги.

Аллагьас нужер щивасе гьунар кьун буго

3Чапарлъиялъул баркат насиблъарав чи вугелъул, нужер щивасда абулеб буго, кколелдаса цӀикӀкӀун кӀодо гьаруге нужго нужецаго. ЧӀухӀдаруге нуж. Аллагьас нужер щивасе кьураб божи-иманалъул роцада рекъон цӀодорго гурони рехсоге нужерго цӀар. 4Масала, нилъер щивав чиясул буго гӀемерал лугбуздасан цолъараб цо черх, щибаб лагаялъулги буго гьелъ гьабизе кколеб иш. 5Гьедин нилъги, гӀемерал ругониги, МасихӀиде цолъун, цо черхлъун лъугьун руго, гьелъул щибаб лагаялъ цогидал лугбузе кумек гьабула. 6Аллагьас нилъее кьураб батӀи-батӀияб баркатаб гьунаралда рекъон, щивасул буго жиндирго иш. Аллагьасул амруялъул бицине гьунар бугес гьеб гьабе, жиндир божи-иманалъ насиблъизабураб ресалда рекъон. 7Диналъул вацазе кумек гьабизе гьунар бугес, гьезие кумек гьабе. Дин малъизе гьунар бугес гьеб малъе. 8НасихӀат гьабизе гьунар бугес гьебги гьабе. БетӀерлъи гьабизе гьунар бугес, хӀаракат бахъун, бетӀерлъиги гьабе. Садакъа кьолес сахаватго кье гьеб. ЛъикӀал ишал гьарулез ракӀ разиго гьаре гьел.

Павелица хьвадизе кколеб куц малъулеб буго

9РакӀ-ракӀалъго рокьа нуж цоцазе. Квешлъи рикӀкӀад гьабе, лъикӀлъиялда рекӀун чӀа. 10Цоцазе рокьун, мутӀигӀлъун, вацал гӀадин рукӀа. Дудасаго гьев кӀодо гьавун, цогидасул адаб-хъатир гьабе. 11Нужер жигарчилъи чучлъизе тоге, Аллагьасе хъулухъ гьабизе рухӀанияб хӀаракатги загӀиплъизе биччаге. 12Хьулалъ ракӀ бохизабе. Балагь бачӀаниги, къвакӀун чӀа. Кидаго гьари-дугӀаялда тӀадчӀа. 13Диналъул вацазул хӀажат тӀубан, нужер бугебги бикьун кье. Гьалбал хирияллъун рукӀа. 14Нужее гӀазаб-гӀакъуба кьолесдаги баркат лъегиян абе. НагӀана кьечӀого, баркат лъегиян абе! 15Рохун ругезда цадахъ рохунги рукӀа, гӀодулел ругезда цадахъ нужги гӀоде. 16Цоцазда гьоркьор ракӀ разияб ракълида рукӀа. ЧӀухӀи гьабуге, гӀадатиял гӀадамазулгун гьудуллъи гьабичӀого тоге. Нужго гӀакъилал чагӀийилан, гӀамал кӀодолъун лъугьунге.

17Нужее гьабураб квешлъи бецӀун квешлъиги гьабуге. Киназго лъикӀабилан рикӀкӀунеб иш гьабизе хӀаракатги бахъе. 18Нужехъа бажарараб къагӀидаялъ ракълида рукӀа нуж киназдехунго. 19РецӀел босизейилан лъугьунге, дир хириял. Аллагьасул ццин бахъине биччанте гьединал гӀадамазда. ТӀухьдузда хъван буго: «РецӀел Дихъ буго, Дица бецӀула», – ян. 20Гьелъул гӀаксалда: «Дур тушман вакъун вугони, чед кьун кваназаве, гьев къечон вугони, лъим кьун гьекъезаве. Нечезавун гьесул бетӀералда тӀаде цӀа рекӀарал тӀорччол гӀеркъалин дуца ралел ругел». 21Квешлъиялъ нужго къезаризе риччаге, лъикӀлъиялъ къезабе квешлъи!

Currently Selected:

Румазухъе кагъат 12: АварАК

Highlight

Copy