Румазухъе кагъат 11
11
11 бетӀер
Аллагьас жиндирго халкъ рехун течӀо
1Гьанже дица гьикъулеб буго: «Унго Аллагьас жиндирго халкъалдаса инкар гьабурабищ?» – абун. ГьабичӀо! Дунги исраилилав вуго, – Ибрагьимил зурияталъул, Буняминил наслуялъул. 2Цебеккун жиндаго лъалеб букӀараб жиндирго халкъалдаса инкар гьабилищха Аллагьас! Исраилил халкъалда тӀасан Иляс аварагас Аллагьасде гӀарз бахъиялъул бицунеб бакӀалда ТӀухьдузда щиб хъван бугебали лъалищ нужеда? Илясица абулеб буго: 3«Я БетӀергьан, гьез дур аварагзаби чӀвана, дуе къурбан хъвезе гьарурал бакӀал щущазаруна. Гьанже цохӀо хутӀун вугев дунги гьез чӀвазе валагьулев вуго!» 4Аллагьас гьесие жаваб кинха кьураб? «Дица диего цӀунун вуго БагӀалие#11:4 БагӀал – мажусиязул гьересиаллагь. сужда гьабичӀев анкьазарго чи». 5Гьединго Аллагьасул баркаталдалъун тӀаса рищаразул хутӀараб бутӀаялъул гӀадамал гьанжеги руго. 6Баркаталдалъун тӀаса рищарал ругони, Къануналъул амруял тӀуразаруралъухъ тӀаса рищараллъун кколаро гьел. Гьедин букӀинчӀебани, баркаталда баркатилан абизе бегьилароан.
7Щибха лъугьараб? Додинаб хӀаракат-жигаргун тӀалаб гьабулеб букӀараб жо, Исраилил халкъалъеги щвечӀого, тӀаса рищараздасан хутӀаразе щвана. Цогидал Аллагьас гӀинкълъизаруна. 8ТӀухьдузда хъван буго: «Аллагьас гьел согӀлъизаруна. Жакъа къоялде щвезегӀанги гьезул беразда бихьуларо, гьезул гӀундузда рагӀуларо». 9Давудицаги абулеб буго: «Биччанте гьел тӀад кваналеб сурпа гьезие жалго кколеб гьинлъунги къорлъунги лъугьине, риччанте гьел гӀодор ккезе, биччанте гьезде къисас рещтӀине, биччанте щибго бихьуларедухъ гьезул бералги бецлъизе, 10биччанте гьезул мугъги кидаго къулухъе хутӀизе».
Цогидал халкъалги хвасарлъила
11Цоги дица гьикъулеб буго: «ГӀодор ккезе ва тӀокӀал тӀаде рахъунгутӀизе хъван букӀунищ гьезул хӀетӀе хъущтӀараб?» – абун. Гуро! Гьел гӀодор ккей сабаблъун цогидал халкъалги хвасарлъана, Исраилил халкъ гьезда бахиллъизе. 12Гьел гӀодор ккеялдалъун дуниял бечелъидал, гьезие ккараб заралалдалъун цогидал халкъазе пайдаги ккедал, кигӀан кӀудияб баркат букӀинеб Исраилил тӀолабго халкъ Аллагьасде буссараб мехалъ?
13Гьанже дун, батӀи-батӀиял халкъазухъе витӀарав чапар, гьединаллъун рукӀараздехун хитӀаб гьабун кӀалъалев вуго. Дун дирго чапарлъиялдаса чӀухӀун вуго! 14Дир хьул буго дирго халкъалъул цо-цо гӀадамазул рекӀелъ жахӀда бижизабизе кӀвезеги бегьулин ва гьезда гьоркьоса цо-цоял хвасарлъизеги бегьулин абун. 15Аллагьас гьел рехун тей сабаблъун тӀолабго гӀалам жиндихъего ахӀун батани, Аллагьас гьел цӀидасан къабул гьари сабаблъун щибдай лъугьина? Хун рукӀарал цӀидасан чӀаголъила! 16Реччеялъул цо гороги босун, Аллагьасул цӀар рехсани, гьебги жубан буцарабщинабги Аллагьасе гӀололъун букӀуна. ГъотӀол кьибил хӀалалаб бугони, гӀаркьалабиги хӀалалал рукӀуна.
Мажусиял релълъуна гӀалхуда бижараб гъотӀода
17Зайтуналъул гъотӀол цо-цо гӀаркьалаби къотӀун руго. Мун – гӀалхул зайтуналъул гъветӀ, гьел гӀаркьалабазул бакӀалда бацӀцӀараб буго. Ахикь бижараб гьеб зайтуналъул гъотӀол кьалбаздасан регьелги цӀцӀулеб буго дуца. 18КъотӀун рехарал гӀаркьалабазе чӀухӀи гьабуге дуца. Сундаса мун чӀухӀизе кколеб? Дуца гуро кьалбал ккун ругел, кьалбаз мун ккун буго!
19«Гьеб гъотӀода дун бацӀцӀиналъе гӀоло къотӀун рукӀанин гьел гӀаркьалаби», – ян абизейищ дуе бокьун бугеб? 20ЛъикӀни абуна дуца гьеб! Гьел гӀаркьалаби къотӀана гьезул божи-иман гьечӀолъи сабаблъун. Гьезул бакӀалде мун ккана дур божи-иман сабаблъун. ЧӀухӀдаричӀого – Аллагьасукьа хӀинкъа! 21Жиндирго гъотӀол гӀаркьалабазда гурхӀичӀев Аллагь дуда гурхӀилинищ ракӀалде кколеб? 22Бихьулищ, Аллагь жив гурхӀулевги, жинца кьварараб тамихӀ гьабулевги вуго! Къосаразе гьес кьварараб тамихӀ гьабула. Дудаги гьев гурхӀула гьесул цӀобалде хьул лъун мун вугебгӀан заманалда. Гурони – къотӀун рехула мунги! 23Божи-иманалде чанкӀкӀун дандечӀей гьабичӀого тани, жугьутӀал цӀидасан Аллагьас къабул гьарила. КъотӀарал гӀаркьалаби цӀидасан гъотӀода рацӀцӀинеги хӀалкӀола Аллагьасда. 24ГӀалхул зайтуналъул гъотӀодасаги къотӀун, ахикь бижараб зайтуналъул гъотӀода, тӀабигӀияб низамги хвезабун, рацӀцӀарал гӀаркьелаллъун нуж ругони, Аллагьасе дагьабги бигьалъула гъотӀодаса къотӀарал гьелъул жиндирго гӀаркьалаби цӀидасан гьелда рацӀцӀине.
Исраилил тӀолабго халкъги хвасарлъила
25Цо балъголъи нужедаса бахчун тезе бокьун гьечӀо, вацал, дие. Гьеб балъголъи лъани, гӀамал кӀодолъун лъугьинаро нуж. Исраилил халкъалъул цо бутӀа гьадин чанкӀкӀун кидаго гуро букӀине бугеб, цогидал халкъаздасан рачӀине кколезул киналго Аллагьасде руссинегӀан хутӀила гьел гьедин. 26Гьебмехалда Исраилил тӀолабго халкъги хвасарлъила. ТӀухьдузда хъван буго: «Цион магӀардасан вачӀина нуж хвасар гьарулев чи, гьес Якъубил наслуялъул гӀадамазул къосинги лъугӀизабила. 27Дица гьезие къотӀи гьабила гьезул мунагьал чурилилан». 28Нужеда гьоркьоб Рохалил хабар тӀибитӀизабизе квекӀен гьабулеб мехалда, Аллагьасул тушбаби руго гьел. Аллагьас жиндиего гӀадамал тӀаса рищиялъул рахъ босани, – Аллагьасе хириял чагӀи руго гьел. Гьезул умумузулгун Аллагьас къотӀи гьабун букӀиндалха! 29Жиндица рещтӀинабураб баркат Аллагьас нахъе босуларо, жиндихъего ахӀараздаса инкарги гьабуларо гьес. 30Цере Аллагьасе мутӀигӀлъуларого рукӀарал нужеда цӀоб лъуна, – гьанже гьел мутӀигӀлъулел гьечӀолъи сабаблъун. 31Гьанже гьел мутӀигӀлъулареллъун лъугьана, – нужеда цӀоб лъезе, хадуб гьездаги Аллагьасул цӀоб лъезе. 32Гьедин жиндие мутӀигӀлъунгутӀиялъул асирлъуде ккезаруна Аллагьас киналго гӀадамал, ахирги гьел киназдаго жиндирго цӀоб лъезе.
Павелица Аллагьасе рецц гьабулеб буго
33Вай, Аллагьасул гӀакъиллъиялъулги гӀелмуялъулги кӀкӀалалъул гъварилъи!
Гьесул хӀукмуялда нахъгӀунтӀизе кӀоларо!
Гьесул нухазул балъголъи лъазе бажаруларо!
34БетӀергьанасул пикрабазда нахъгӀунтӀулев чи вугищ?
Щив вукӀарав Аллагьасул гӀакълучилъун?
35Нахъе бецӀизелъун лъицаниги киданиги щибниги кьурабищ гьесие?
36Кинабго гьесдасан бачӀана, кинабго гьесдалъун буго, кинабго гьесде буссуна!
Абадияб рецц гьесие! Амин.
Currently Selected:
Румазухъе кагъат 11: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
