Румазухъе кагъат 10

10 бетӀер

1Дие цӀакъ бокьун буго, вацал, Исраилил халкъ хвасарлъизе. Аллагьасдаги гьарулеб буго дица гьел хвасар гьареян. 2Аллагьасул диналъе гьез хӀаракатги жигарги бахъулеб бугилан нугӀлъи гьабизе кӀола дида, амма хӀаракатги жигарги бугониги, бичӀчӀиги лъайги гьечӀо гьезул. 3Аллагьасдасан бачӀунеб хӀакъаб ритӀухълъи жидеда лъаларелъул, гьел лъугьунел руго жидерго хасаб ритӀухълъи чӀезабизе. Аллагьасул ритӀухълъиялъеги мутӀигӀлъулел гьечӀо. 4МасихӀ ккола Къануналъул ахир. Гьединлъидал божи-иман бугевщинав чи ритӀухълъизе рес буго.

«ЦохӀо БетӀергьан вуго киназулго БетӀергьан»

5Къануналъ малъухъе хьвадиялдалъун щолеб ритӀухълъиялъул хӀакъалъулъ Мусаца гьадин абулеб буго: «Къануналда жанир ругел Аллагьасул амруял тӀуразариялдалъун инсан чӀаго хутӀила». 6Амма божи-иманалдалъун щолеб ритӀухълъиялъул хӀакъалъулъ ТӀухьдузда гьадин хъван буго: «Дуца дудаго гьикъуге зобалазде щив вахиневилан?» (Гьелъул магӀна – МасихӀ зобалаздаса ракьалде вачине.) 7«Гъваридаб кӀкӀалахъе щив лъугьиневиланги» гьикъуге дудаго. (Гьелъул магӀна – МасихӀ хваразул дуниялалдаса вачине.) 8Гьале гьадинги хъван буго ТӀухьдузда: «Аллагьасул рагӀи дуде гӀагарлъун буго. Гьеб дур кӀалдиб буго, дур рекӀелъ буго». Гьеб буго божи-иманалъул хӀакъалъулъ нилъеца халкъалда лъазабулеб бугеб рагӀи. 9Дур кӀалалъ абулеб бугони ГӀиса ТӀадегӀанав вугилан, Аллагьас гьев хваралъуса вахъинавиялда ракӀги божулеб бугони, мун хвасарлъила. 10Дур ракӀ божулеб бугелъул, рекӀедалъун ритӀухълъиги щвела дуе, дур кӀалалъ Рохалил хабар тӀибитӀизабулеб бугелъул, кӀалалдалъун хвасарлъиги щвела. 11ТӀухьдузда хъван бугелъулха: «Гьелда божаравщинав чиясул ракӀбухӀиларо», – ян. 12ЖугьутӀазулги цогидал халкъазулги хӀакъалъулъ батӀалъи гьечӀого абулеб буго гьедин. ЦохӀо БетӀергьан вуго киназулго БетӀергьан. Жиндир цӀар рехсон гьарарав чиясде гьес гьарзаяб баркат рещтӀинабула. 13ТӀухьдузда хъван буго: «БетӀергьанасул цӀар рехсарав чи хвасарлъила», – ян.

14Мун божуларев чиясул цӀар кин рехсолеб? Дуда рагӀичӀев чиясда кин божилев? Лъицаниги дуда лъазабулеб гьечӀони, кин дуда гьеб рагӀилеб? 15ВачӀун кин гьеб лъазабилеб, мун гьелъие витӀарав чапар гьечӀони? ТӀухьдузда хъван буго: «Рохалил хабар босун вачӀунев чиясул кӀалдиб гьоцӀо буго!»

16Амма Исраилил тӀолабго халкъалъ гуро Рохалил хабар къабул гьабураб. Ишая аварагас абун бугелъул: «Я, БетӀергьан, нижеца бицаралде иман лъурав чи вугевищ?» – ан. 17ХӀасил, божи-иман бижула хабаралъухъ гӀенеккани, хабаралъухъ гӀенеккизе ресги щола вачӀун лъицаниги МасихӀил хӀакъалъулъ хабар лъазабулеб бугони. 18Амма дица гьикъулеб буго гьезда рагӀичӀебищилан. РагӀизени рагӀана гьеб Исраилил халкъалда. ТӀухьдузда хъван бугелъул: «Аварагзабазул хабар тӀибитӀана тӀолабго ракьалда, гьезул рагӀабиги дуниялалъул рагӀалде щвана», – ян. 19Цоги дица гьикъулеб буго гьеб харбил магӀна Исраилил халкъалда бичӀчӀарабищилан. ТӀоцебе Мусаца абулеб буго: «Халкъ бугин гьебилан рикӀкӀинегицин бегьулареб халкъалда нуж бахиллъизе тӀамила дица. БичӀчӀи-лъайго гьечӀеб халкъалда нужер ццин бахъинеги гьабила», – ян. 20Гьелдаса хадуб Ишая аварагасги хӀинкъичӀого абулеб буго Аллагьасул рахъалъ: «Валагьулев вукӀинчӀезда ватана дун. Дун цӀехолел рукӀинчӀезе дунго загьирги гьавуна», – ян. 21Исраилил халкъалъул хӀакъалъулъни Ишаяца гьадин абулеб буго: «МутӀигӀлъулареб ва чанкӀкӀараб халкъалдехун вуссун тӀубараб къоялъ квералги цере ккун чӀана дун».

Currently Selected:

Румазухъе кагъат 10: АварАК

Highlight

Copy