ГӀакъилал рагӀаби 2
2
БЕТӀЕР 2
ХӀакъабщиналде, ритӀухъабщиналде ва бацӀцӀадабщиналде рачунел нухал
1Я дир вас, дир рагӀаби гӀадахъ росани
ва дир амруялги дуца рекӀелъ цӀунани,
2гӀакъиллъиялъухъ гӀенеккизе гӀинги ругьунлъани,
гӀакълу бичӀчӀиялде ракӀги гьетӀани,
3гӀакълу-насихӀатги дуца духъего ахӀани,
бичӀчӀи-лъайги духъего гьарани,
4гӀарцул тӀагӀел гӀадин дуца гьебги балагьани,
ракьулъ бахчараб хазинаялда гӀадин, мун гьелда хадувги лъугьани,
5БетӀергьанасукьа хӀинкъи щиб жояли лъала дуда,
Аллагь вичӀчӀиялъул гӀелмуялдеги вагьила.
6БетӀергьанасин гӀакъиллъи кьолеб,
Гьесдасанин цӀодорлъиги лъайги щолеб.
7РакӀбацӀцӀадал гӀадамазе квербакъизе кидаго хӀадур вуго Гьев,
хӀалаллъиялда хьвадулезе хъалхъанлъунги чӀола Гьев.
8РитӀухъго хьвадулесул нухалги цӀунула Гьес,
муъминчиясул сухъмахъалги хӀинкъи гьечӀеллъун лъугьинарула.
9Гьеб мехалда дуда лъала хӀакъабщиналде,
ритӀухъабщиналде ва бацӀцӀадабщиналде рачунел киналго нухал.
10Дур рекӀелъе гӀакъиллъи лъугьина,
гӀелму-лъаялъ рухӀалъе разилъи-лазат босун бачӀина.
11Квешаб-лъикӀаб бичӀчӀиялъ цӀунила мун,
цӀодорлъиялъ хвасарги гьавила.
12Квешал гӀадамазул нухалдаса мун гӀакъиллъиялъ цӀунила,
мекъаб-тӀекъаб бицунездасаги хвасар гьавила.
13БецӀал сухъмахъаздасан ине бокьун,
битӀараб нух рехун тола гьез.
14Квешлъи гьабиялдаса рохула гьел,
квешаб пасалъиялдасаги разилъула.
15Гьезул сухъмахъалги кӀичӀ-кӀичӀарал руго,
гьенисан аралги нух къосун хутӀула.
16ГӀакъиллъиялъ цӀунула мун чияр лъадудаса,
кӀал бахьинай чияр лъадудаса.
17ГӀолохъанаб мехалъ вукӀарав гьудулги рехун тарав гьелъ,
жиндирго Аллагьасул амруги кӀочон тараб гьелда.
18Гьелъул къайи-свериялъ мун хвалде вачуна,
гьелъул нухги хваразухъе унеб нух буго.
19Гьелда аскӀове арав цониги чи нахъвуссунаро,
цӀидасан гӀумруялъул нухги гьезие щоларо.
20Гьединлъидал мун лъикӀазул нухдасан хьваде,
муъминзабазул нухги ккве дуца.
21РакӀбацӀцӀадал гӀадамал гьаб ракьалда рукӀине руго,
мунагь гьечӀелалги ракьалда тӀад хутӀизе руго.
22РакӀхъубал гӀадамал ракьалдаса лъухъан рехизе руго,
хиянатчагӀиги гьениса лъугӀизаризе руго.
Currently Selected:
ГӀакъилал рагӀаби 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
