Тархал 35
35
Левийилазул шагьарал
1Ерихон шагьаралда дандбитӀун Иордан гӀурул рагӀалда МогӀавалъул гӀатӀиракьалда БЕТӀЕРГЬАНАС Мусада абуна:
2«ГӀизраилил къавмазда лъазабе, жидеего щварал ракьаздаса левитазе чанго шагьар кьеян абун. ГӀи-боцӀи хьихьизе гьел шагьаразда сверухъ ракьалги кье левитазе. 3Цинги гӀумру гьабизе шагьаралги рукӀина гьезул, тӀолабго боцӀи-панз хьихьизе мегъ-ракьги букӀина. 4Нужеца левитазе кьезе ккола шагьаразул къадаздаса щибаб рахъалде азарго натӀалъул#35:4 ГӀага-шагарго 450 метр. манзилалда мегъ-ракь. 5Шагьаралъул ракьазул гӀорхъабазул халалъи букӀине ккола: бакъбаккул рахъалда кӀиазарго натӀ#35:5 ГӀага-шагарго 900 метр., къилбаялъул рахъалда кӀиазарго натӀ, бакътӀерхьул рахъалда кӀиазарго натӀ, шималалъул рахъалда кӀиазарго натӀ ва бакьулъ – шагьарги. Гьеб ракь букӀине буго шагьаралъул боцӀи-панз кваналеб мегъ-ракьлъун.
Лъутуншагьарал
(Къан. 4:41-43; 19:1-14; Егьош. 20:1-9)
6Нужеца левитазе кьурал шагьаразул анлъгояб биччанте букӀине лъутуншагьарлъун: гьенире лъутизе руго лъачӀого чи чӀварал гӀадамал. Гьезде тӀадеги левитазе кье жеги кӀикъоялда кӀиго шагьар. 7Кинабниги нужеца левитазе кье кӀикъоялда микьго шагьарги гьезда сверухъ бугеб мегъ-ракьги. 8ГӀизраилазул мулкалдаса шагьарал левитазе кьолаго, гӀемерал шагьарал ругеб къавмалъухъа цӀикӀкӀун росе, дагьал шагьарал ругеб къавмалъухъа дагьал росе шагьарал».
9БЕТӀЕРГЬАНАС Мусада абуна:
10«ГӀизраилазда абе: „Иорданги бахун, нуж Ханааналде щвараб мехалъ, 11нужеего лъутуншагьарал тӀаса рище, нагагь лъицаниги тохлъукьего чи чӀвани, гьенире лъутизе рукӀине. 12Гьел шагьарал рукӀина бидухъ къисас босизе бокьарав чиясдаса вахчизе инсанасе рес кьолел бакӀаллъун: чӀвадарухъанлъун рикӀкӀунев чи, диваналда цеве ахӀичӀого хвезавизе бегьуларо. 13Гьединаб букӀине ккола анлъго шагьар: 14лъабго шагьар Иорданалъул гьаб рагӀалда ва лъабго Ханааналда. Гьел рукӀина лъутуншагьараллъун. 15Гьеб анлъабго шагьаралъул цоялда вахчизе рес букӀина тохлъукье чи чӀварав чиясе – гӀизраиласеги, чияр халкъалъул чиясеги, нужеда гьоркьоб гӀумру гьабулев бокьарав цоги чиясеги.
16Амма цо чияс цогидав чиясда маххул алат кьабуни ва гьев хвани, хварасда кьабурав чи чӀвадарухъан ккола – гьевги чӀвазе ккола. 17Яги цо чиясухъ кодоб чи чӀвазе гӀураб гамачӀги букӀун, гьес гьеб цогидав чиясда кьабуни ва гьев чи хвани, гамачӀ кьабурав чи ккола чӀвадарухъан, гьединлъидал гьевги чӀвазе ккола. 18Яги цо чиясухъ кодоб чи чӀвазе гӀураб цӀулал алатги букӀун, гьес гьеб цогидав чиясда кьабуни ва гьев хвани, гьев ккола чӀвадарухъан, гьединлъидал гьевги чӀвазе ккола. 19Гьединав чи, кив ватаниги, чӀвазе бегьула хварасул бидухъ къисас босулев чияс; гьесул ихтияр буго ватараб бакӀалдаго гьев чӀвазе. 20Нагагь цо чияс рекӀелъ квешаб къасдгун цогидав чиясда тункани, яги ургъунго гьесда цо щиб бугониги речӀчӀани ва гьев хвани, 21яги ццидалъ гьев холедухъ гьесда зар бани ва гьев хвани, гьев унго-унгояв чӀвадарухъан ккола, гьединлъидал гьевги чӀвазе ккола. Хварасул бидухъ къисас босулес, кив ватаниги, ватараб бакӀалда чӀвазе ккола гьев.
22Амма цо чияс цогидав чиясда тохлъукьего, кинабгӀаги рокьукълъи гьечӀого тункани яги гьес речӀчӀараб жо цогидасда тохлъукьего щвани, 23ялъуни гьевги вихьичӀого гьесде тӀаде гамачӀ бортизабуни ва гьев чи хвани, рекӀелъ кинабгӀаги ццинги букӀинчӀого ва гьесдехун тушманлъиги букӀинчӀого, 24гьебмехалда тохлъукьего чи чӀварасеги гьесдаса къисас босулесеги хӀукму къотӀизе ккола жамагӀаталъ, гьал къануналги хӀисабалде росун. 25Гьединав чӀвадарухъан жамагӀаталъ бидул къисасалдаса хвасар гьавизе ккола ва гьев витӀизе ккола лъутуншагьаралде, гьенив вахчун вукӀине. Гьев гьенив чӀезе ккола КӀудияв кашиш хвезегӀан.
26Амма жив вахчараб лъутуншагьаралдаса чӀвадарухъан къватӀиве ани, 27ва бидухъ къисас босулесда шагьар тун къватӀивехун гьев ватани, гьебмехалда къисас босулесул ихтияр буго гьев чӀвазе, ва гьесда гьев чӀваялъул гӀайибги букӀунаро. 28Жив вахчизе араб шагьаралда чӀвадарухъан вукӀине ккола КӀудияв кашиш хвезегӀан. ГӀицӀго КӀудияв кашиш хун хадуб гурони гьесие ихтияр гьечӀо рокъове тӀадвуссине.
29Киб гӀумру гьабун ругониги, гьал къанунал тӀуразаре нужецаги нужер наслабазги.
30ЧӀвадарухъан чӀвазе ккани нугӀзал рукӀине ккола; гьез бицараб жоги кьочӀое босун гурони чӀваларо гьев. Гьев чӀвазе хӀукму гьабиялъе цохӀо чиясул нугӀлъиги гӀоларо.
31ЧӀвазе мустахӀикъав чӀвадарухъанас жиндирго гӀумру гӀарцухъ бичун босизе тоге; гьесда гӀайиб батани, чӀвадарухъан чара гьечӀого чӀвазе ккола.
32Лъутуншагьаралда вахчарав чиги, КӀудияв кашиш хвезегӀан жиндирго ракьалде гӀарцухъ тӀадвуссине виччан тезе бегьуларо.
33Нужецаго гӀумру гьабулеб ракь хъублъизабуге. ГӀодобе тӀураб инсанасул биялъ хъублъизабула ракь ва гьеб биялдаса ракь бацӀцӀалъуларо, ракьалде гьеб би тӀурасул биялъ гурони. 34Хъублъизабуге нужецаго гӀумру гьабулеб ва Дун вукӀунеб ракь; Дун вугелъул ГӀизраилил халкъгун вукӀунев БЕТӀЕРГЬАН“».
Currently Selected:
Тархал 35: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
