Тархал 23
23
1БилгӀамица Балакида абуна:
«Гьаниб анкьго къурбан-бакӀ бай дие ва къурбаналъе хъвезе анкьго оцги анкьго куйги хӀадуре», – ян.
2БилгӀамица малъухъе гьабуна Балакица ва гьез кӀиязго цо-цо оцги цо-цо куйги бухӀана щибаб къурбан-бакӀалда тӀад. 3БилгӀамица Балакида абуна:
«Мун гьанив дуцаго рухӀарал къурбаназда аскӀов чӀа, дун довегӀан ина. Щиб лъалеб, БЕТӀЕРГЬАН вачӀине бегьула дунгун дандчӀвазе. Дица дуда бицина Дос дие загьир гьабураб кинабго жо».
Ва гьев цо гӀицӀаб борхалъиялде вахана.
БилгӀамил тӀоцебесеб калам
4Гьенив Аллагь вачӀана гьесда данде ва БилгӀамица абуна:
«Дица анкьго къурбан-бакӀ бана ва щибалда тӀад цо-цо къурбаналъул оцги куйги къурбаналъе бухӀана», – ян.
5Цинги БЕТӀЕРГЬАНАС БилгӀамида малъана Балакида абизе кколеб рагӀи.
«Балакихъе тӀадвусса ва гьедин абе досда», – ян абуна Гьес.
6Гьев Балакихъе тӀадвуссана; Балак жинцаго рухӀарал къурбаназда аскӀов чӀун вукӀана, ва гьесда аскӀор МогӀавалъул киналго церехъабиги рукӀана. 7Цинги БилгӀамица абуна:
«Сириялдаса вачана дун гьаниве Балакица,
МогӀавалъул пачаяс вачана дун бакъбаккул мугӀруздаса:
„ВачӀа, дие гӀоло нагӀана кье Якъубие;
ВачӀа, балагь баче ГӀизраилил халкъалде“, – янги абун.
8Кин дица нагӀана кьелеб Аллагьас нагӀана кьолареб халкъалъе?
Кин дица балагь бачинеб БЕТӀЕРГЬАНАС балагь бачунареб халкъалде?
9Дида бихьула гьеб кьурабазул борхалъиялдасан,
Дун валагьула гьелъухъ гохӀал-щобаздасан:
дида бихьула халкъ – киназдасаго батӀа чӀун гӀумру гьабулеб,
цогидал халкъазда гьоркьоб жиб хасаблъун кколеб.
10Лъихъа рикӀкӀун бажарулеб ралъдал сали –
гьедигӀан гӀемераб Якъубил наслу?
Лъихъа рикӀкӀун бажарулеб ГӀизраилалъул ункъил бутӀацин?
Биччанте Аллагьасул агьлуялъул хвел диеги насиблъизе
ва дир гӀумрудул ахирги гьезул гӀадинаб букӀине!»
11Балакица БилгӀамида абуна:
«Дуца дие гьабулеб щиб? Дица мун вачана дир тушбабазе нагӀана кьезеян абун, дуцайин абуни гьезие баракатаб дугӀа гьабулеб буго!»
12Гьес жаваб кьуна:
«БЕТӀЕРГЬАНАС дир мацӀалда лъураб рагӀи абизе тӀадаб гьечӀищ дида?» – ян.
БилгӀамил кӀиабилеб калам
13Цинги Балакица гьесда абуна:
«Вилълъа дида цадахъ цоги бакӀалде. Гьенисан дуда киналго рихьизе гьечӀо, гьел чӀараб бакӀалъул цо гьитӀинабго рагӀал гурони. Гьеле гьенисан кье гьезие нагӀана, тӀубазабе дир гьари».
14Балакица БилгӀам вачана Фасга абураб мегӀералъул тӀогьиб бугеб Хъаравулзабазул Расалъиялде, гьениб бана анкьго къурбан-бакӀ ва щибалда тӀад цо-цо къурбаналъул оцги куйги бухӀана. 15БилгӀамица Балакида абуна:
«Мун гьанив, дурго къурбаназда аскӀов вукӀа, дун Довгун дандчӀвазе ина», – ян.
16БЕТӀЕРГЬАН вачӀана БилгӀамида данде ва абизе кколеб жо гьесда малъана.
«ТӀадвусса Балакихъе ва гьадин абе досда», – ян абуна Гьес.
17Гьев Балакихъе тӀадвуссана; Балак жинцаго рухӀарал къурбаназда аскӀов чӀун вукӀана ва гьесда аскӀор МогӀавалъул тӀолго церехъабиги рукӀана.
«Щиб абураб БЕТӀЕРГЬАНАС?» – ин цӀехана Балакица.
18Цинги БилгӀамица абуна:
«ТӀаде вахъа Балак, гӀенекке дихъ! ГӀинтӀаме дуца, Ципорил вас!
19Аллагь инсан гуро, гьерсал рицине;
ГӀадамаз гӀадин, цин бицараб амру хисизабуларо Гьес.
Абураб жо Гьес гьабичӀого толебдай?
Кьураб рагӀи Гьес тӀубачӀого хутӀулебдай?
20Дихъе амру бачӀана гьезие баракатаб дугӀа гьабеян;
Досин баракат лъолеб – дун гьеб хисизабулев чи гуро!
21ГьечӀо Якъубил халкъалъе балагь!
ГӀизраилил халкъалъе къварилъи гьечӀо бихьулеб!
Гьелгун вуго БЕТӀЕРГЬАН, гьезул Аллагь,
гьез жидерго Пачалъун лъазавурав.
22Мисриялдаса гьел нахъе рачана Аллагьас;
гӀалхул бугъил гӀадаб къуват-гучги гьезулъ!
23Якъубил халкъалда данде хӀалтӀулеб хӀилла-макру балагьун бажаруларо,
гьечӀо ГӀизраилил халкъалда данде хӀалтӀулеб сихӀруги!
Гьанже Якъубилги ГӀизраилалъулги хӀакъалъулъ бицине буго:
„Балагьея, БЕТӀЕРГЬАНАСУЛ хӀалкӀолъи бихьизе!“ – янги абун.
24Эбелаб гъалбацӀ гӀадин къуватаб буго гьеб халкъ;
Бихьинаб гъалбацӀ гӀадин багъула гьеб!
Гьелъ хӀухьбахъуларо давла кваначӀого
ва гӀорцӀизегӀан тушманасул би гьекъечӀого».
25Гьебмехалда Балакица БилгӀамида абуна:
«Я нагӀана кьоге гьезие, я баракат лъоге гьезда!» – ян.
26БилгӀамица жаваб кьуна:
«Дица дуда абун букӀинчӀищ БЕТӀЕРГЬАНАС абураб гьабизе буго дицаян?»
БилгӀамил лъабабилеб калам
27Цинги Балакица БилгӀамида абуна:
«Вилълъа, дица мун батӀияб бакӀалде вачина. Щиб лъалеб, БЕТӀЕРГЬАНАС дуе изну кьезе бегьула гьенисангӀаги, дир мурадги тӀубан, гьезие нагӀана кьезе», – ян.
28Балакица БилгӀам вачана салул авлахъалда тӀаде балагьараб Пеор магӀарде. 29Гьениб нахъеги БилгӀамица Балакида абуна:
«Гьаниб анкьго къурбан-бакӀ бай дие ва къурбаналъе хъвезе анкьго оцги анкьго куйги хӀадуре», – ян.
30Балакица БилгӀамица малъухъе гьабуна ва щибаб къурбан-бакӀалда цо-цо къурбаналъул оцги куйги къурбаналъе бухӀана.
Currently Selected:
Тархал 23: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
