Тархал 18
18
Кашишзабаздаги левитаздаги тӀадал ишал
1БЕТӀЕРГЬАНАС Гьарунида абуна:
«Дуцаги, дур васазги, тӀолабго дур гӀагарлъиялъги жаваб кьезе буго Мукъадасаб бакӀалда щибгӀаги мунагь ккеялъул. Гьелда тӀадеги, кашишзабазул хъулухъалда жаниб щибгӀаги мунагь-хатӀа ккани, гьелъулги жаваб кьезе буго дуцаги дур васазги. 2Левийил, ай дур умумузул къавмалдаса дурго вацалги ахӀе духъего, дуцаги дур васазги КъотӀиялъул Чадиралда цебе тӀагӀат гьабулеб мехалда, гьел кидаго дуе кумекалъе рукӀине. 3Гьел рукӀине руго дур нухмалъиялда гъоркь ва Чадиралда жаниб хӀажатаб кинабго хӀалтӀи гьабизе буго гьез, амма гьезие гьукъун буго я мукъадасаб цӀарагӀалда, я къурбан-бакӀалда квер хъвазе, гурони хвезе руго гьелги гьезда цадахъ нужгоги. 4ГӀицӀго левитал рукӀине руго дуда цадахъ ДандчӀваялъул Чадиралъуб дуе кумек гьабиялъе, ва гьенир гьаризе кколелщинал хӀалтӀабиги гьез тӀуразаризе руго. Амма цоги батӀиял чагӀи нужеда аскӀоре къазецин бегьуларо.
5Нужеца Мукъадасаб Чадиралъулги къурбан-бакӀалъулги тӀалаб гьабизе ккола, хадубккунги гӀизраилазда Дир ццин бахъинчӀого букӀине. 6ГӀизраилил халкъалда гьоркьосаги рачун, Дицаго кьуна нужее кумекалъе левитал – гьел рукӀине руго нужее Дир сайгъатлъун. Гьел БЕТӀЕРГЬАНАСЕ ратӀа гьарураллъун ккола, ДандчӀваялъул Чадиралда хӀалтӀизе рукӀине. 7Амма гӀицӀго дуцаги дур васазги гурони тӀубазе бегьуларо къурбан-бакӀалда ва Чадиралда жанибехун, пардавалда нахъа бугеб бакӀалда хурхараб кинабгӀаги кашишзабазул хъулухъ. Гьеб нужеда тӀадаб хъулухъ ккола. Дица нужее сайгъатлъун кьолеб буго кашишлъи; гьеб тӀаде босизе лъугьарав щивав батӀияв чи чӀвазе ккола».
Кашишзабазеги левитазеги кколел садакъаби
8БЕТӀЕРГЬАНАС Гьарунида абуна:
«Дица дур ихтияралде кьуна халкъалъ Дир Мукъадасаб бакӀалде рачӀунел тӀолалго хириял садакъаби: гӀизраилаз Дие гӀоло бачӀунебщинаб хирияб садакъа Дица кьолеб буго дуе ва дур наслабазе, даим нужее букӀине кколеб бутӀа хӀисабалда. 9Халкъалъ гьарулел бищунго хириял къурбанал ва хириял садакъаби – ролъул хириял садакъаби, мунагь чурулеб къурбан ва гӀайиб бецӀулеб къурбан – гьел ккола кутакалда хириял жал ва гьезул рухӀуларел бутӀаби дуе рукӀине ккола. Гьеб ккола дурги дур наслабазулги бутӀа. 10Гьеб кванай тӀадегӀанаб хиралъиялъул садакъа хӀисабалда; гьеб кваназе бегьула дур наслуялъул щивав бихьинчияс; гьеб хирияб жо букӀин кӀочонге.
11Гьале жеги дуе букӀине кколеб жо: гӀизраилаз рачӀунел киналго хьвагӀезарулел къурбанал Дица дуеги дур васал-ясазеги, даим нужее букӀине кколеб бутӀалъун кьолел руго. Дур рукъалъул щивав вацӀцӀадав чияс кваназе бегьула гьеб бутӀа.
12Лъилъариялъул авалалда БЕТӀЕРГЬАНАСЕ хирияб садакъа хӀисабалда бачӀунеб бищун лъикӀаб зайтуналъул нахги, цӀияб чагъирги, тӀорщелги Дица дуе кьолеб буго. 13Ракьалдаса щвараб ва Дир Мукъадасаб бакӀалде бачӀунеб кинабниги тӀоцебесеб нигӀмат букӀине буго дурлъун. Дур рукъалъул щивав вацӀцӀадав чияс кваназе бегьула гьеб.
14ГӀизраилалда лъицаниги БЕТӀЕРГЬАНАСЕ назру гьабураб кинабниги жо дуе букӀине буго. 15БЕТӀЕРГЬАНАСЕ кьезе кколеб, эбелалъул тӀоцебесеб бихьинтӀинчӀги – инсанасулги, хӀайваналъулги – гьебги дур ккола. Амма гӀадамазул тӀоцере гьарурал бихьинлъимал, гьезухъ хӀакъги босун, эркен гьаризе ккола, ва бацӀцӀадаб гуреб хӀайваналъ гьабураб тӀинчӀалъухъги хӀакъ кьезе ккола. 16ТӀоцересел бихьинлъималазухъ хӀакъ босе гьез моцӀ бараб заманалда – щуго шекел гӀарцул#18:16 ГӀага-шагарго 55 грамм. (Чадиралда хӀалтӀизабулеб шекел, ай къого гера бугеб шекел хӀисабалде босун).
17Амма гӀачиязул, гӀиязул яги цӀцӀаназул тӀоцебесеб къинлъи БетӀергьанасул ккола, гьезухъ хӀакъ кьоларо. Гьезул би пунхъизабе къурбан-бакӀалде ва гьениб гьезул тӀатӀиги бухӀе БЕТӀЕРГЬАНАСЕ цӀадул къурбанлъун, Гьев разияб кӀкӀуйдул махӀ бахъинабизелъун. 18Гьезул гьан дуе букӀина, хьвагӀезабулеб къурбаналъул мегьедги кваранаб бохги гӀадин. 19ГӀизраилаз БЕТӀЕРГЬАНАСЕ рачӀунел киналго хириял садакъаби Дица дуеги дур лъималазеги кьолел руго, нужер даимаб бутӀа хӀисабалда. Гьеб буго даимаб, БЕТӀЕРГЬАНАСДАГИ дургун дур наслуялдаги гьоркьоб гьабураб, киданиги биххулареб абадияб ЦӀамул#18:19 Абадияб ЦӀамул КъотӀи – киналго къурбаназулъе ва хириял садакъабазулъе цӀам базе кколаан, гьел махӀцинчӀого рукӀиналъе гӀоло гуребги, БетӀергьанасул КъотӀи абадияб ва хиси гьечӀеб букӀиналъул гӀаламат хӀисабалдаги. КъотӀи».
20БЕТӀЕРГЬАНАС Гьарунида абуна:
«ГӀизраилалда дур букӀине гьечӀо кинабгӀаги ирс ва ракьалъул кинабгӀаги бутӀа; Дунго вукӀина ГӀизраилил халкъалда гьоркьов дур бутӀалъунги дур ирслъунги.
21ДандчӀваялъул Чадиралда хъулухъ гьабиялъухъ Левийил наслабазе ирсалъе Дица кьола гӀизраилазул киналго анцӀил бутӀаби#18:21 АнцӀил бутӀа – Аллагьасул Къануналда рекъон, щварабщинаб боцӀи-рикъзиялъул анцӀго бутӀа гьабун цо бутӀа гӀизраилаз левитазе кьолаан.. 22ГӀизраилал тӀокӀалъ ДандчӀваялъул Чадиралде гӀагарлъизе бегьуларо – нагагь гӀагарлъани, гьел мунагьалъукье ккезе руго ва гьеб сабаблъун гьезие жаза гьабизе буго. 23Биччанте ДандчӀваялъул Чадиралъуб хӀалтӀи гьабизе гӀицӀго левитаз ва хъублъиялдаса гьеб цӀуниялъул жавабги гьездаса тӀалаб гьабизе. Гьеб буго даимаб тӀадкъай, нужер тӀолалго наслабаз чара гьечӀого тӀубазабизе кколеб. Амма ГӀизраилил халкъалда гьоркьоб гьезие ракьалъул ирс букӀине гьечӀо. 24Гьелъул бакӀалда Дица левитазе ирслъун кьолел руго гӀизраилаз БЕТӀЕРГЬАНАСЕ рачӀунел гьезул боцӀи-рикъзиялъул анцӀил бутӀаби. Гьединлъидалин Дица абураб, ГӀизраилазул халкъалда гьоркьоб гьезие ракьалъул бутӀа букӀине гьечӀин абун».
25БЕТӀЕРГЬАНАС Мусада абуна:
26«Левийилазда абе: „Дица нужее ирслъун кьурал анцӀил бутӀаби гӀизраилаз нужехъе росун рачӀараб мехалда, нужеца Дие батӀа гьабун кьезе ккола гьезулги анцӀил бутӀа – анцӀил бутӀаялъул анцӀил бутӀа. 27Гьеб нужер садакъа рикӀкӀине буго цогидал гӀадамаз рачӀарал садакъабазда бащадаблъун – гьоцӀиса тӀорщелалда яги чаналъуса босараб цӀияб бахъараб чагъиралда бащадаблъун. 28Нужеца БЕТӀЕРГЬАНАСЕ гьединал анцӀил бутӀаби кье гӀизраилаз рачӀарал киналго анцӀил бутӀабаздаса. Гьеб БЕТӀЕРГЬАНАСУЛ бутӀа ккола – кашиш Гьаруние кьезе ккола гьеб. 29Нужее бачӀараб бутӀаялдаса бищунго лъикӀаб ва бищунго хирияб тӀаса бищун, БЕТӀЕРГЬАНАСЕ гӀоло хирияб садакъалъун кье“.
30Гьединго левийилазда абе: „Нужеца анцӀил бутӀабаздаса бищунго лъикӀаб бутӀа Аллагьасе кьураб мехалда, хутӀараб нужер ккола – нужерго гьоцӀиса щвараб бугӀа-ролъ, ялъуни нужерго чаналда жаниб цӀцӀураб цӀияб чагъир кинигин. 31Нужецаги нужер рукъалъул агьлуялъги гьеб бокьараб бакӀалда кваназе бегьула, щайгурелъул гьеб буго ДандчӀваялъул Чадиралъуб нужеца гьабураб хъулухъалъухъ нужее хӀалалаб мухь. 32Гьеб квананилан нужеда гӀайиб букӀине гьечӀо, гьелдаса батӀаги гьабун, бищунго лъикӀаб бутӀа нужеца Аллагьасе кьун бугелъул. КӀочонге гьеб гӀизраилазул хирияб садакъа букӀин, нужго хвечӀого рукӀине“».
Currently Selected:
Тархал 18: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
