Тархал 11
11
ГӀизраилазул разигьечӀолъи
1ЗахӀмалъи хӀехьезе бокьичӀого зигардизе лъугьана халкъ цо къоялъ, ва гьезул разигьечӀолъиялъул къулкъудиги рагӀун, БЕТӀЕРГЬАНАСУЛ кутакалда ццин бахъана. Гьебмехалъ БЕТӀЕРГЬАНАСУЛ цӀа рещтӀана гьезде ва гьелъ бухӀизе байбихьана халкъалъ чӀел гьабураб бакӀалъул рагӀал. 2Халкъ кумекалъе Мусаде ахӀи базе лъугьана; Мусаца БЕТӀЕРГЬАНАСДЕ дугӀа гьабун хадуб, цӀа свана. 3Гьеб бакӀалда Тавера#11:3 Тавера – «ЦӀа ккей». абураб цӀар лъуна, щайгурелъул гьениб БЕТӀЕРГЬАНАСУЛ цӀа рекӀун букӀун.
4Цо заманалда гӀизраилазда гьоркьор рукӀарал батӀиял халкъазул гӀадамаз тӀалаб гьабизе байбихьана лъикӀа-лъикӀаб квен. Гьездаго цадахъ зигардизе лъугьана гӀизраилалги. Гьез абулеб букӀана:
«Нижее гьан кьолев чи киса щолев!
5РакӀалда бугищ Мисриялда чӀобого кваналеб букӀараб ччугӀаги, охцерги, пастӀанги, пурччги, перги, ражиги! 6Гьанжеян абуни, черхалда рухӀцин хутӀун гьечӀо. Щибниги гьечӀелъул кваназе, гӀицӀго манна гурони! Бадисан баккун буго гьебги».
7Манна букӀана гъаранхералъул хьоналда релълъараб, хъахӀаб кьералъул зобалазул нигӀмат. 8Халкъалъ гьеб бакӀарулаан ва хадуб кверзул гьабида ххенолаан яги чухӀулаан. Хадуб гьеб хъабаялъуб белъунаан яги гьелъул бакараби режулаан. Зайтуналъул нахулъ буцун бежараб чадил гӀадинаб тӀагӀамги букӀана гьелъул. 9Къаси щуб ккараб мехалда, гьелда цадахъ рещтӀунаан маннаги.
10Мусада рагӀана халкъалъул гӀоди – щибаб хъизан-къай гӀодулеб букӀана, жидерго чадиралъул кӀалтӀаги чӀун. Гьебмехалда БЕТӀЕРГЬАНАСУЛ ццин гьелегьана, Мусалги гьелъ кутакалда ракӀбакъвана. 11Гьес БЕТӀЕРГЬАНАСДА абуна:
«Щай Дуца дие гьаб гӀазаб кьолеб бугеб? Щиб гьабун дица Дур ццин бахъинабураб, гьаб тӀолабго халкъ дида баччизабизе ккани?
12Дун гьазул эменищ вугев? Дидасан бижараб халкъищ гьаб бугеб? Щай Дуца, жиб хьихьулей гӀаданалъ лъимер кинигин дида карандаги лъун, гьезие кьелин абун гьезул умумузе Дуца рагӀи кьураб ракьалде щвезегӀан, дида баччизабулеб бугеб гьаб халкъ? 13Киса дица гьаб гӀаламалъе гӀураб гьан балагьилеб: „Гьан кье нижее кваназе!“ – ян гӀодулел ругелъул гьел дида цере! 14ЦохӀо дида бажаруларо гьаб халкъ баччун; гьеб цӀакъго захӀматаб иш буго дие! 15Хадубккунги дие гьадинабго къисмат Дуца хъван батани, Дур цӀобалъе мустахӀикъавги дун ватани, гьарула гьабсагӀатго чӀвай дун, гьаб балагьалъукьа ворчӀизе вукӀине!»
16Гьебмехалъ БЕТӀЕРГЬАНАС Мусада абуна:
«ГӀизраилазул кӀудиязда гьоркьоса гӀакълу-гьунар бугел бутӀрул хӀисабалда дуда лъикӀ лъалел чагӀи ракӀаре Дида цере – кинавниги лъабкъоялда анцӀго чи. Риччанте гьел рачӀине ДандчӀваялъул Чадиралъул кӀалтӀе ва дуда аскӀор чӀезе.
17Гьенив Дун кӀалъазе вуго дуда. Дуда лъураб РухӀалдасаги босун, гьездаги лъела Дица Гьеб. Гьел хӀалае рахъина дуе гьеб бакӀаб гьир баччиялъе, цохӀо дуцаго баччичӀого букӀине.
18Халкъалда абе: „РацӀцӀалъи гьабе, метералде хӀадурлъун рукӀине. Метер нужеца гьан кваназе буго, БЕТӀЕРГЬАНАСДА рагӀун бугелъул нужер гӀодиги, ‘Нижее гьан кьолев чи киса щолев! Мисриялдаго лъикӀ букӀана!’ абураб нужер къулкъудиги. БЕТӀЕРГЬАНАС кьезе буго нужее гьан. 19Нужеца гьеб кваназе буго цо, кӀиго, щуго, анцӀго, къого къоялъ гуреб! 20Нужеца гьеб кваназе буго тӀубараб моцӀалъ, нужер магӀарзухъан бачӀинегӀан ва нужеда гьеб рихинегӀан, нужеца нужедаго гьоркьовги вугев БЕТӀЕРГЬАНАСДЕ мугъги рехун, Гьесда цере ‘Щай ниж Мисриялдаса нахъе арал?!’ – ин абун, нуж зигардаралъухъ“».
21Мусаца абуна:
«Гьанив цин анлънусазарго рагъухъан вуго, ва Дуца абулеб буго: „ТӀубараб моцӀалъ Дица гьезда гьан кваназабизе буго!“ – ян.
22Бугебщинаб гӀи-боцӀи хъуниги, гӀолебищ гьезие киназего гьан? Ялъуни ралъдалъ бугеб тӀолго ччугӀа ккуниги, киназего гӀелищ гьеб?»
23БЕТӀЕРГЬАНАС Мусада абуна:
«БЕТӀЕРГЬАНАСУЛ хӀал дагьлъунищ бугеб? ГьабсагӀат дудаго бихьила, Дица дуе кьураб рагӀи тӀубалищали».
24Муса халкъалъухъе вилълъана ва БЕТӀЕРГЬАНАС абураб жо бицана. Гьес халкъалъул кӀудиязул лъабкъоялда анцӀго чи аскӀове ахӀана ва гьел Чадиралда сверухъ чӀезаруна. 25Гьебмехалда БЕТӀЕРГЬАН накӀкӀул парчадулъ рещтӀана ва Мусагун кӀалъана; Мусада тӀад лъураб РухӀалдаса босун, гьенире ракӀарарал кӀудияздеги рещтӀинабуна гьеб РухӀ. Гьезда тӀаде РухӀ рещтӀиндал гьез байбихьана ахӀунго ахӀун шавкъалда Аллагьасул амраби загьир гьаризе, амма хадубккун тӀокӀалъ гьедин гьабичӀо.
26КӀигоял рукӀана гьенире рачӀинчӀого, халкъалда гьоркьорго чӀун; цоясда цӀар букӀана Элдад, кӀиабилесда – Медад. Амма гьездеги рещтӀана РухӀ, гьелги рукӀиндал кьолбол кӀудиязул сияхӀалда рехсон, Чадиралъул кӀалтӀе инчӀониги. Гьединлъидал гьелги лъугьана Аллагьасул амраби загьир гьарун кӀалъазе. 27Цо гӀолохъанчи векерун вачӀана Мусахъе ва гьес абуна:
«Элдадицаги Медадицаги Аллагьасул амраби рицунел руго», – ян.
28ГьитӀинаб къоялдасаго Мусал кумекчилъун вукӀарав Нунил вас Егьошуаца абуна:
«Муса, бетӀерчӀахъад, чӀезаре гьел!» – ин.
29Амма Мусаца жаваб кьуна:
«Дун цӀунизейищ мун вахъарав? Дие бокьилаан БЕТӀЕРГЬАНАСУЛ халкъалда гьоркьоса киназего аварагзабазул карамалъи щвезе ва БЕТӀЕРГЬАНАС гьезул щивасде Жиндирго Иллагьияб РухӀ рещтӀинабизе!» – ян.
30Цинги Мусаги кьолбол кӀудиялги жиде-жидер чадразухъе тӀадруссана.
ЧӀоролаби
31Цинги БЕТӀЕРГЬАНАСУЛ хӀалкӀолъиялдалъун кутакаб гьури бахъана ва гьелъ ралъдахъан чӀоролаби рачун рачӀана. Халкъ чӀараб бакӀалда сверухъ киса-кибего цо къоялъул сапаралъул манзилалда гьез ракь бахчизабуна кӀиго натӀалъул борхалъиялда. 32Халкъ чӀоролаби ракӀаризе лъугьана: тӀубараб къоялъги, къаси рогьинегӀанги ва хадусеб къоялъги ракӀарана гьел ва щивас бакӀарана цо хомералдаса#11:32 Хомер – гӀага-шагарго 220 литра жанибе унеб роцен. дагь гьечӀеб къадар хӀанчӀазул. Гьез гьел сверухълъиго цӀезабун тӀиритӀана. 33Жеги гьезул кӀалдиб гьан букӀаго, БЕТӀЕРГЬАНАСУЛ ццин рещтӀана халкъалде ва Гьес гьезде кутакаб унти биччана. 34Гьединлъидал гьеб бакӀалда Киврот-Гьатаава#11:34 Киврот-Гьатаава – «Гогьлъиялъул хабал». абураб цӀар лъуна: гьениб букъана чехьги квешаб яхӀги гьечӀеб халкъ.
35Киврот-Гьатааваялдаса халкъ багъарана Хацероталде ва гьениб лъалхъана.
Currently Selected:
Тархал 11: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
Тархал 11
11
ГӀизраилазул разигьечӀолъи
1ЗахӀмалъи хӀехьезе бокьичӀого зигардизе лъугьана халкъ цо къоялъ, ва гьезул разигьечӀолъиялъул къулкъудиги рагӀун, БЕТӀЕРГЬАНАСУЛ кутакалда ццин бахъана. Гьебмехалъ БЕТӀЕРГЬАНАСУЛ цӀа рещтӀана гьезде ва гьелъ бухӀизе байбихьана халкъалъ чӀел гьабураб бакӀалъул рагӀал. 2Халкъ кумекалъе Мусаде ахӀи базе лъугьана; Мусаца БЕТӀЕРГЬАНАСДЕ дугӀа гьабун хадуб, цӀа свана. 3Гьеб бакӀалда Тавера#11:3 Тавера – «ЦӀа ккей». абураб цӀар лъуна, щайгурелъул гьениб БЕТӀЕРГЬАНАСУЛ цӀа рекӀун букӀун.
4Цо заманалда гӀизраилазда гьоркьор рукӀарал батӀиял халкъазул гӀадамаз тӀалаб гьабизе байбихьана лъикӀа-лъикӀаб квен. Гьездаго цадахъ зигардизе лъугьана гӀизраилалги. Гьез абулеб букӀана:
«Нижее гьан кьолев чи киса щолев!
5РакӀалда бугищ Мисриялда чӀобого кваналеб букӀараб ччугӀаги, охцерги, пастӀанги, пурччги, перги, ражиги! 6Гьанжеян абуни, черхалда рухӀцин хутӀун гьечӀо. Щибниги гьечӀелъул кваназе, гӀицӀго манна гурони! Бадисан баккун буго гьебги».
7Манна букӀана гъаранхералъул хьоналда релълъараб, хъахӀаб кьералъул зобалазул нигӀмат. 8Халкъалъ гьеб бакӀарулаан ва хадуб кверзул гьабида ххенолаан яги чухӀулаан. Хадуб гьеб хъабаялъуб белъунаан яги гьелъул бакараби режулаан. Зайтуналъул нахулъ буцун бежараб чадил гӀадинаб тӀагӀамги букӀана гьелъул. 9Къаси щуб ккараб мехалда, гьелда цадахъ рещтӀунаан маннаги.
10Мусада рагӀана халкъалъул гӀоди – щибаб хъизан-къай гӀодулеб букӀана, жидерго чадиралъул кӀалтӀаги чӀун. Гьебмехалда БЕТӀЕРГЬАНАСУЛ ццин гьелегьана, Мусалги гьелъ кутакалда ракӀбакъвана. 11Гьес БЕТӀЕРГЬАНАСДА абуна:
«Щай Дуца дие гьаб гӀазаб кьолеб бугеб? Щиб гьабун дица Дур ццин бахъинабураб, гьаб тӀолабго халкъ дида баччизабизе ккани?
12Дун гьазул эменищ вугев? Дидасан бижараб халкъищ гьаб бугеб? Щай Дуца, жиб хьихьулей гӀаданалъ лъимер кинигин дида карандаги лъун, гьезие кьелин абун гьезул умумузе Дуца рагӀи кьураб ракьалде щвезегӀан, дида баччизабулеб бугеб гьаб халкъ? 13Киса дица гьаб гӀаламалъе гӀураб гьан балагьилеб: „Гьан кье нижее кваназе!“ – ян гӀодулел ругелъул гьел дида цере! 14ЦохӀо дида бажаруларо гьаб халкъ баччун; гьеб цӀакъго захӀматаб иш буго дие! 15Хадубккунги дие гьадинабго къисмат Дуца хъван батани, Дур цӀобалъе мустахӀикъавги дун ватани, гьарула гьабсагӀатго чӀвай дун, гьаб балагьалъукьа ворчӀизе вукӀине!»
16Гьебмехалъ БЕТӀЕРГЬАНАС Мусада абуна:
«ГӀизраилазул кӀудиязда гьоркьоса гӀакълу-гьунар бугел бутӀрул хӀисабалда дуда лъикӀ лъалел чагӀи ракӀаре Дида цере – кинавниги лъабкъоялда анцӀго чи. Риччанте гьел рачӀине ДандчӀваялъул Чадиралъул кӀалтӀе ва дуда аскӀор чӀезе.
17Гьенив Дун кӀалъазе вуго дуда. Дуда лъураб РухӀалдасаги босун, гьездаги лъела Дица Гьеб. Гьел хӀалае рахъина дуе гьеб бакӀаб гьир баччиялъе, цохӀо дуцаго баччичӀого букӀине.
18Халкъалда абе: „РацӀцӀалъи гьабе, метералде хӀадурлъун рукӀине. Метер нужеца гьан кваназе буго, БЕТӀЕРГЬАНАСДА рагӀун бугелъул нужер гӀодиги, ‘Нижее гьан кьолев чи киса щолев! Мисриялдаго лъикӀ букӀана!’ абураб нужер къулкъудиги. БЕТӀЕРГЬАНАС кьезе буго нужее гьан. 19Нужеца гьеб кваназе буго цо, кӀиго, щуго, анцӀго, къого къоялъ гуреб! 20Нужеца гьеб кваназе буго тӀубараб моцӀалъ, нужер магӀарзухъан бачӀинегӀан ва нужеда гьеб рихинегӀан, нужеца нужедаго гьоркьовги вугев БЕТӀЕРГЬАНАСДЕ мугъги рехун, Гьесда цере ‘Щай ниж Мисриялдаса нахъе арал?!’ – ин абун, нуж зигардаралъухъ“».
21Мусаца абуна:
«Гьанив цин анлънусазарго рагъухъан вуго, ва Дуца абулеб буго: „ТӀубараб моцӀалъ Дица гьезда гьан кваназабизе буго!“ – ян.
22Бугебщинаб гӀи-боцӀи хъуниги, гӀолебищ гьезие киназего гьан? Ялъуни ралъдалъ бугеб тӀолго ччугӀа ккуниги, киназего гӀелищ гьеб?»
23БЕТӀЕРГЬАНАС Мусада абуна:
«БЕТӀЕРГЬАНАСУЛ хӀал дагьлъунищ бугеб? ГьабсагӀат дудаго бихьила, Дица дуе кьураб рагӀи тӀубалищали».
24Муса халкъалъухъе вилълъана ва БЕТӀЕРГЬАНАС абураб жо бицана. Гьес халкъалъул кӀудиязул лъабкъоялда анцӀго чи аскӀове ахӀана ва гьел Чадиралда сверухъ чӀезаруна. 25Гьебмехалда БЕТӀЕРГЬАН накӀкӀул парчадулъ рещтӀана ва Мусагун кӀалъана; Мусада тӀад лъураб РухӀалдаса босун, гьенире ракӀарарал кӀудияздеги рещтӀинабуна гьеб РухӀ. Гьезда тӀаде РухӀ рещтӀиндал гьез байбихьана ахӀунго ахӀун шавкъалда Аллагьасул амраби загьир гьаризе, амма хадубккун тӀокӀалъ гьедин гьабичӀо.
26КӀигоял рукӀана гьенире рачӀинчӀого, халкъалда гьоркьорго чӀун; цоясда цӀар букӀана Элдад, кӀиабилесда – Медад. Амма гьездеги рещтӀана РухӀ, гьелги рукӀиндал кьолбол кӀудиязул сияхӀалда рехсон, Чадиралъул кӀалтӀе инчӀониги. Гьединлъидал гьелги лъугьана Аллагьасул амраби загьир гьарун кӀалъазе. 27Цо гӀолохъанчи векерун вачӀана Мусахъе ва гьес абуна:
«Элдадицаги Медадицаги Аллагьасул амраби рицунел руго», – ян.
28ГьитӀинаб къоялдасаго Мусал кумекчилъун вукӀарав Нунил вас Егьошуаца абуна:
«Муса, бетӀерчӀахъад, чӀезаре гьел!» – ин.
29Амма Мусаца жаваб кьуна:
«Дун цӀунизейищ мун вахъарав? Дие бокьилаан БЕТӀЕРГЬАНАСУЛ халкъалда гьоркьоса киназего аварагзабазул карамалъи щвезе ва БЕТӀЕРГЬАНАС гьезул щивасде Жиндирго Иллагьияб РухӀ рещтӀинабизе!» – ян.
30Цинги Мусаги кьолбол кӀудиялги жиде-жидер чадразухъе тӀадруссана.
ЧӀоролаби
31Цинги БЕТӀЕРГЬАНАСУЛ хӀалкӀолъиялдалъун кутакаб гьури бахъана ва гьелъ ралъдахъан чӀоролаби рачун рачӀана. Халкъ чӀараб бакӀалда сверухъ киса-кибего цо къоялъул сапаралъул манзилалда гьез ракь бахчизабуна кӀиго натӀалъул борхалъиялда. 32Халкъ чӀоролаби ракӀаризе лъугьана: тӀубараб къоялъги, къаси рогьинегӀанги ва хадусеб къоялъги ракӀарана гьел ва щивас бакӀарана цо хомералдаса#11:32 Хомер – гӀага-шагарго 220 литра жанибе унеб роцен. дагь гьечӀеб къадар хӀанчӀазул. Гьез гьел сверухълъиго цӀезабун тӀиритӀана. 33Жеги гьезул кӀалдиб гьан букӀаго, БЕТӀЕРГЬАНАСУЛ ццин рещтӀана халкъалде ва Гьес гьезде кутакаб унти биччана. 34Гьединлъидал гьеб бакӀалда Киврот-Гьатаава#11:34 Киврот-Гьатаава – «Гогьлъиялъул хабал». абураб цӀар лъуна: гьениб букъана чехьги квешаб яхӀги гьечӀеб халкъ.
35Киврот-Гьатааваялдаса халкъ багъарана Хацероталде ва гьениб лъалхъана.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023