Левит 7
7
ГӀайиб бецӀулеб къурбаналъул хӀакъалъулъ жеги къанунал
1Гьале гӀайиб бецӀулеб къурбаналъул рахъалъ къанун. Гьеб буго кӀудияб хиралъи. 2ТӀубан бухӀулеб къурбан хъолеб бакӀалда хъвезе ккола гӀайиб бецӀулеб къурбанги. Гьелъул би пунхъизе ккола къурбан-бакӀалъул ункъабго рахъалде. 3Гьелъул тӀолабго кьаралъи къурбан-бакӀалда тӀад лъела: мох-мохги, ургьимесалъул тӀатӀиги, 4ургьисалабигун цадахъ гьезда тӀад букӀунеб тӀатӀиги, рачӀалда тӀадехун букӀунеб тӀатӀиги, тӀулал халасеб бутӀаги. Гьеб тӀатӀи батӀа гьабизе ккола ургьисалабигун цадахъ. 5Кашишас гьеб кинабго къурбан-бакӀалда тӀад бухӀила БЕТӀЕРГЬАНАСУЛ цӀадул къурбан хӀисабалда. Гьеб буго гӀайиб бецӀулеб къурбан. 6Кашишзабазул хъизамазул бокьарав бихьинчияс кваназе бегьула гьелъул гьан. Гьеб кваназе ккола мукъадасаб бакӀалда, щайгурелъул гьеб кӀудияб хиралъи ккола.
7Мунагь чуриялъул къурбаналъулги гӀайиб бецӀулеб къурбаналъулги рахъалъ цого къанун буго: къурбаналъул гьан гьел къурбанал тӀоритӀулев кашишасе букӀина. 8Гьединго, пуланав чиясул рахъалъ тӀубан бухӀулеб къурбан тӀобитӀарав кашишасе хутӀула гьелъул тӀомги. 9Корониб чед бежун, ялъуни къанида тӀад, яги къанида жаниб квен гьабун кьолеб бокьараб ролъул хирияб садакъаги къурбан-бакӀалда гьелъул низам тӀобитӀарав кашишасе щола. 10Кинабниги ролъул садакъа, зайтуналъул нахгун жубараб букӀаниги, яги щибго жубачӀеб букӀаниги, Гьарунил наслуялъул тӀолалго кашишзабазе бащад щвезе ккола.
Ракълил къурбан
11Гьале БЕТӀЕРГЬАНАСЕ ракълил къурбан#7:11 Ракълил къурбаналда гьоркьобе унаан лъабго батӀияб къурбан: баркалаялъул къурбан, назруялъул къурбан ва суннатаб къурбан. гьабизе кколеб къагӀида.
12Ракълил къурбан баркала кьеялъул къурбан хӀисабалда хъолеб бугони, гьелда цадахъ рукӀине ккола зайтуналъул нахуда руцун гьаруралги, тӀеренал тӀад зайтуналъул нах бахаралги, тӀаса бищараб ханждал зайтуналъул нахуда руцун гьаруралги бугьурго чадал. 13Баркалаялъул къурбаналда цадахъ беччараб чедги букӀине ккола. 14Гьел хириял садакъабаздаса босун цо-цо чед БЕТӀЕРГЬАНАСЕ хирияб садакъалъун кьела. Ракълил къурбанги, гьелъул би пунхъиялъул гӀадатги тӀобитӀарав кашишасул бутӀа ккола гьеб. 15Баркалаялъул ракълил къурбаналъул гьан гьебго къоялъ кваназе ккола – рогьинегӀан къатӀрацин нахъе тезе бегьуларо.
16Назруялъул яги суннатаб къурбан хӀисабалда ракълил къурбан хъолеб бугони, биччанте гьелъул гьан гьебго къоялъ кваназе, хутӀараб нахъисеб къоялъги кваназе бегьула. 17Амма лъабабилеб къоялъги гьан нахъе хутӀани, гьеб бухӀизе ккола. 18Лъабабилеб къоялъги гьединаб ракълил къурбаналъул гьан квани, гьеб хӀарамлъула, ва Аллагьас гьеб къурбан къабул гьабуларо, щайгурелъул гьеб гьан хъублъун букӀуна ва гьеб хъубаб иш гьабурав чиясе мунагь букӀуна.
19ЩибгӀаги хъубаб жо хъвараб гьанги хъублъула – гьеб кваназе бегьуларо, бухӀизе ккола. Хъублъиялда хъвачӀел, рацӀцӀадал бокьарал чагӀаца кваназе бегьула ракълил къурбаналъул гьан. 20Амма, хъублъун вукӀинги лъалаго, БЕТӀЕРГЬАНАСЕ гӀоло хъураб ракълил къурбаналъул гьан кванарав чи халкъалда гьоркьоса нахъе къотӀизе#7:20 Халкъалда гьоркьоса нахъе къотӀи – Аллагьасул жазаялдалъун хвей, ялъуни жиндирго халкъалъулгун бухьеналдасаги умумузул ирсалдасаги тӀуван махӀрум гьави. Гьелъул цоги магӀнаги букӀана: умумузул хабалазулъ вукъизеги бегьуларин ва хваразул цӀаразда гьоркьобгицин гьесул цӀар рехсезе бегьуларин абураб. ккола. 21Инсанасдаса бачӀараб букӀа, хӀайваналдаса бачӀараб букӀа, хъубаб жоялда хъван, ялъуни кинаб букӀаниги хъубаб рухӀчӀаголъиялда хъван жив хъублъун вукӀинги лъалаго, БЕТӀЕРГЬАНАСЕ гӀоло хъураб ракълил къурбаналъул гьан кванарав чи халкъалда гьоркьоса нахъе къотӀизе ккола.
ТӀатӀиги биги кваназе гьукъи
22БЕТӀЕРГЬАНАС Мусада абуна:
23«ГӀизраилил халкъалда абе: „БоцӀул, гӀиял ва цӀаназул кинабгӀаги тӀатӀи кванаге. 24Хварал ялъуни гӀалхул жанаваралъ чӀварал хӀайваназул тӀатӀи хӀалтӀизабизе бегьула бокьараб бакӀалда, амма квание хӀалтӀизабизе бегьуларо. 25БЕТӀЕРГЬАНАСЕ тӀубан бухӀулеб къурбанлъун хъураб хӀайваналъул тӀатӀи кванарав чи халкъалда гьоркьоса нахъе къотӀизе ккола. 26Нужеца киб гӀумру гьабулеб бугониги, хӀайваназул яги хӀанчӀазул би киданиги квание хӀалтӀизабуге. 27Квание кинабгӀаги би хӀалтӀизабулев чи, гьев щив ватаниги, халкъалда гьоркьоса нахъе вачахъизе ккола“».
Кашишзабазул бутӀа
28БЕТӀЕРГЬАНАС Мусада абуна:
29«ГӀизраилил халкъалда абе: „Ракълил къурбан хъолев чияс, гьелъул цо бутӀа БЕТӀЕРГЬАНАСЕ гӀоло хирияб садакъалъун кьезе ккола. 30Гьес жиндицаго босизе ккола цӀадулъ бухӀизе кколеб бутӀа къурбан-бакӀалда аскӀобе, ай БЕТӀЕРГЬАНАСДА цебе. ТӀатӀиги мегьедги гьес БЕТӀЕРГЬАНАСДА цебе босила, хьвагӀезабулеб къурбан хӀисабалда, эхедеги борхун хьвагӀезабизе. 31ТӀатӀи кашишас къурбан-бакӀалда тӀад бухӀила, мегьед Гьаруниеги гьесул наслабазеги букӀина. 32Нужер ракълил къурбаназул кваранаб бох кашишасе кьезе ккола хирияб садакъа хӀисабалда. 33Ракълил къурбаналъул биги тӀатӀиги къурбан-бакӀалда тӀад жинца бухӀулев кашишасе букӀина гьеб бох. 34Щайгурелъул ГӀизраилазул халкъалъухъа Дица тӀалаб гьарула гьезул ракълил къурбаназул хасал бутӀаби – хьвагӀезабулеб къурбаналъул мегьедги, бохги – ва гьел Гьаруниеги гьесул васазеги кьола. ГӀизраилазул халкъалъ даим тӀубазабизе ккола гьеб къанун“».
35Гьединаб буго БЕТӀЕРГЬАНАСЕ гьарулел къурбаназдаса Гьаруниеги гьесул наслабазеги кколеб бутӀа – БЕТӀЕРГЬАНАСУЛ кашишзабилъун гьел тӀамураб къоялдаса нахъе. 36Хирияб нахги бахун гьел кашишлъиялде тӀамураб къоялдаса нахъего, БЕТӀЕРГЬАНАС амру гьабуна гӀизраилазде гьеб гьезие кьеян. Абадул абадиялъ хисизабичӀого тӀубазабизе ккола гьеб амру.
37Гьеле къурбаназул къанун: тӀубан бухӀулеб къурбаналъулги, ролъул хириял садакъабазулги, мунагь чуриялъул къурбаналъулги, гӀайиб бецӀулеб къурбаналъулги, кашишлъиялде тӀамиялъул къурбаназулги, ракълил къурбаназулги. 38Синай салул авлахъалда рукӀаго, къурбанал хъвеян ГӀизраилил халкъалде амру гьабураб къоялъ, Мусае гьел киналго къануналги загьир гьаруна БЕТӀЕРГЬАНАС.
Currently Selected:
Левит 7: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
