Левит 4
4
Мунагь чуриялъул къурбан
1БЕТӀЕРГЬАНАС Мусада абуна:
2«Дуца гӀизраилазда абе: „Щив вукӀаниги тохлъукье мунагьалъукье ккани ва, бегьулареб ишги гьабун, гьес лъачӀого БЕТӀЕРГЬАНАСУЛ цогӀаги амру хвезабуни, гьале гьес гьабизе кколеб жо. 3Гьев КӀудияв кашиш ватани ва, жив сабаблъун халкъалда тӀаде гӀайибги бачун, гьев мунагьалъукье ккани, биччай гьес кинабгӀаги жагъаллъи гьечӀеб баси бачун бачӀине БЕТӀЕРГЬАНАСУЛ Чадиралда цебе, жиндирго мунагьал чуриялъул къурбанлъун хъвезе букӀине. 4Биччанте гьес баси ДандчӀваялъул Чадиралъухъе БЕТӀЕРГЬАНАСДА цебе бачине, цин гьелъул бетӀералда квер лъезе, цинги БЕТӀЕРГЬАНАСДА цебе гьеб хъвезе. 5Хадуб КӀудияв кашишас гьеб къурбаналъул цодагьаб би босизе ккола ДандчӀваялъул Чадиралда жанибе, 6ва, бидулъ килищги ччун, гьеб би анкьго нухалъ пунхъизе ккола Мукъадасаб бакӀалъул хасаб пардавалда цебе, ай БЕТӀЕРГЬАНАСДА цебе. 7Хадуб гьеб би бахине ккола ДандчӀваялъул Чадиралда жаниб БЕТӀЕРГЬАНАСДА цебе бугеб гьуинмахӀал тӀад рухӀулеб къурбан-бакӀалъул бокӀназда чӀварал лълъурдуздаги. ХутӀараб би Чадиралъул кӀалтӀа бугеб къурбанал тӀад рухӀулеб къурбан-бакӀалда цебе тӀезе ккола. 8Хадуб биччанте кашишас батӀа гьабизе мунагь чурулеб къурбаналъе хъураб басидул тӀолабго кьаралъи: ургьимесалъул тӀолабго тӀатӀиги, 9ургьисалабигун цадахъ гьезда тӀад букӀунеб тӀатӀиги, тӀулал халасеб бутӀаги. Гьеб кинабго батӀа гьабизе ккола ургьисалабигун цадахъ, 10ай ракълил къурбаналъе хъурал жалазе гьабулебго гӀадин. Цинги кашишас гьеб кинабго цӀадул къурбаназул къурбан-бакӀалда тӀад бухӀила. 11Басидул тӀомги, кинабго гьелъул гьанги, бетӀергун, хӀатӀалгун, ургьимесгун цадахъ, 12халкъалъ гӀумру гьабулеб бакӀалдаса къватӀибехун бацӀцӀадаб бакӀалде босизе ккола, ва рохъо балеб бакӀалда, цӀулги бакун, бухӀизе ккола. Гьеб кинабго бухӀизе ккола рохъо балеб бакӀалда.
13ТӀолабго жамагӀаталъ лъачӀого мекъаб жо гьабуни ва, бегьулареб ишги гьабун, тохлъукье БЕТӀЕРГЬАНАСУЛ цогӀаги амру хвезабуни, гьебмехалъ халкъалда гӀайиб ккола. 14Жидеца мунагь гьабун букӀин гӀадамазда бичӀчӀидал, тӀолабго жамагӀаталъул рахъалдасан мунагь чурулеб къурбаналъе цо баси кьезе ккола. Биччанте ДандчӀваялъул Чадиралъул кӀалтӀе бачине гьеб, 15БЕТӀЕРГЬАНАСДА цебе жамагӀаталъул кӀудияз гьелъул бетӀералда кверал лъезе, ва гьениб гьеб баси хъвезе. 16Хадуб КӀудияв кашишас гьелъул цодагьаб би босила ДандчӀваялъул Чадиралда жанибе 17ва, бидулъ килищги ччун, гьеб би анкьго нухалъ пунхъила Мукъадасаб бакӀалъул хасаб пардавалда цебе, ай БЕТӀЕРГЬАНАСДА цебе. 18Гьеб би бахине ккола, ДандчӀваялъул Чадиралда жаниб БЕТӀЕРГЬАНАСДА цебе бугеб, гьуинмахӀал тӀад рухӀулеб къурбан-бакӀалъул бокӀназда чӀварал лълъурдуздаги. ХутӀараб би Чадиралъул кӀалтӀа бугеб къурбанал тӀад рухӀулеб къурбан-бакӀалда цебе тӀезе ккола. 19Хадуб басидул ургьимесалъул тӀолабго тӀатӀи батӀа гьабила ва къурбан-бакӀалда тӀад бухӀила. 20Гьеб кинабго гьабизе ккола мунагь чурулеб къурбаналъе бихьизабураб низамалда. Гьедин кашишас халкъалдаса мунагьал чуриялъул къурбан тӀобитӀила, ва Аллагь халкъалъул мунагьазда тӀаса лъугьина. 21Кашишасдаса тӀобитӀараб къурбаналъулго гӀадин, хъураб басидул хутӀарабщинаб жо бухӀизе ккола халкъалъ гӀумру гьабулеб бакӀалдаса къватӀибехун рахъалда. Гьеб ккола тӀолабго жамагӀаталъул мунагь чурулеб къурбан.
22КинабгӀаги къавмалъул яги тухумалъул бетӀерас лъачӀого мунагь гьабуни, ва, бегьулареб ишги гьабун, тохлъукье БЕТӀЕРГЬАНАСУЛ цогӀаги амру хвезабуни, ва гьелдалъун живго гӀайибалъукье ккезавуни, 23живго мунагьалъукье ккун вукӀин бичӀчӀидал, биччанте гьес къурбаналъе щибго жагъаллъи гьечӀеб дегӀен бачӀине. 24Биччанте гьес цин дагӀнил бетӀералда квер лъезе ва, БЕТӀЕРГЬАНАСДА цебе, тӀубан рухӀулел къурбанал хъолеб бакӀалда гьеб хъвезе. Гьеб буго мунагь чурулеб къурбан. 25Кашишас гьелъул бидулъ килищги ччун, гьеб би бахина къурбанал тӀад рухӀулеб къурбан-бакӀалъул бокӀназда чӀварал лълъурдузда ва хутӀараб би къурбан-бакӀалда цебе тӀела. 26Хадуб дагӀнил тӀолабго тӀатӀи къурбан-бакӀалда тӀад бухӀила, ракълил къурбаналъулго гӀадин. Гьедин кашишас гьев чиясдаса мунагь чуриялъул къурбан тӀобитӀила, ва Аллагь гьесул мунагьалда тӀаса лъугьина.
27Халкъалда гьоркьоса кинав вукӀаниги гӀадатияв чияс лъачӀого мунагь гьабуни, ва, бегьулареб ишги гьабун, тохлъукье БЕТӀЕРГЬАНАСУЛ цогӀаги амру хвезабуни, ва гьелдалъун живго гӀайибалъукье ккезавуни, 28живго мунагьалъукье ккун вукӀин бичӀчӀидал, биччанте гьес къурбаналъе щибго жагъаллъи гьечӀеб цӀцӀе бачун бачӀине. 29Биччанте гьес цин цӀцӀел бетӀералда квер лъезе ва тӀубан рухӀулел къурбанал хъолеб бакӀалда гьеб хъвезе. 30Кашишас гьелъул бидулъ килищги ччун, гьеб би бахина къурбанал тӀад рухӀулеб къурбан-бакӀалъул бокӀназда чӀварал лълъурдузда ва хутӀараб би къурбан-бакӀалда цебе тӀела. 31Хадуб кашишас цӀцӀел тӀолабго тӀатӀи батӀа гьабила, ракълил къурбаналъулго гӀадин, ва БЕТӀЕРГЬАНАСЕ бокьулеб гьуинаб махӀ бахъинабизелъун къурбан-бакӀалда тӀад бухӀила. Гьедин кашишас гьев чиясдаса мунагь чуриялъул къурбан тӀобитӀила ва Аллагь тӀаса лъугьина гьесул мунагьалдаса.
32Мунагь чуриялъул къурбаналъе хъвезе пуланав чияс гӀиялъажо бачӀунеб бугони, гьеб букӀине ккола щибго жагъаллъи гьечӀеб чахъу. 33Биччанте гьес цин чахъдал бетӀералда квер лъезе, цинги тӀубан рухӀулел къурбанал хъолеб бакӀалда гьеб хъвезе. 34Кашишас гьелъул бидулъ килищги ччун, гьеб би бахина къурбанал тӀад рухӀулеб къурбан-бакӀалъул бокӀназда чӀварал лълъурдузда ва хутӀараб би къурбан-бакӀалда цебе тӀела. 35Хадуб кашишас гьелъул тӀолабго тӀатӀи батӀа гьабила, ракълил къурбаналъе хъолеб чахъдал гьабулебго гӀадин. Цинги гьеб тӀатӀи къурбан-бакӀалда тӀад бухӀила, БЕТӀЕРГЬАНАСЕ рухӀулел цогидал цӀадул къурбаназулго гӀадин. Гьедин кашишас гьев чиясдаса мунагь чуриялъул къурбан тӀобитӀила, ва Аллагь гьесул мунагьалда тӀаса лъугьина.
Currently Selected:
Левит 4: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
