Левит 26
26
Аллагьасул амраби тӀуразаруразе щолеб баракат
(Къан. 7:12-16; 28:1-14)
1Нужеего гьересиаллагьзаби гьаруге. Жидее сужда гьабизелъун, киналгӀаги суратал, мукъадасал хӀубал, ялъуни рекӀкӀарал ганчӀазул сипатал нужерго ракьалда эхетуге, ва гьезие лагълъи гьабуге. Дун вуго БЕТӀЕРГЬАН, нужер Аллагь.
2Дир шаматкъоял тӀуразаре ва Дир Мукъадасаб Рукъалъул адаб гьабе. Дун вуго БЕТӀЕРГЬАН.
3Дир къанунал тӀуразаруни ва Дир амрабазда рекъон хьвадани, 4Дица нужее жиндир заманалда цӀад базабила – ракьалъ хӀалухъенги гьарзаго кьела, гъутӀбузда пихъги гӀемераб бижила: 5цӀибил барщулеб заманалдаги лал тӀами лъугӀиларо, рекьари байбихьизегӀанги бакӀаризе цӀибил букӀина. Гьебмехалъ гьарзаго кваназе квенги хӀинкъи гьечӀеб парахатаб гӀумруги букӀина нужее.
6Дица ракълилаб гӀумру кьела нужер улкаялъе: нуж парахатго кьижила ва сардил хӀинкъи нужее букӀинаро. Дица нужер ракьалдаса гӀалхул жанаварал нахъе рачахъила, ва тушманасул хеч нужер ракьалде гӀунтӀиларо. 7Тушбаби нужехъа лъутила ва нужер хвалчабаздалъун щапила. 8Щугояс нусго чӀвала, нусгояс анцӀазарго чӀвала: нужер хвалчабаз чӀван гӀодор лъела нужер тушбаби.
9Цинги Дун нужехъ валагьила лъикӀлъиялъе, лъимал гӀемерал кьела ва нужергун гьабураб Дирго КъотӀи тӀубазабила. 10ЦӀияб хӀалухъен бакӀаризе мех щвела, амма араб соналъ бижараб жеги гӀорцӀизегӀан кваназе гӀураб букӀина нужее; гӀемерлъиялъ гьеб нахъе базе ккезе буго. 11Дица Дирго Мукъадасаб Рукъ бала нуж ругеб бакӀалда ва нуж рехун теларо. 12Дун нужгун вукӀина – нужер Аллагьлъун; нуж Дир халкълъун рукӀина. 13Дун вуго БЕТӀЕРГЬАН, Мисриялъул лагълъиялдаса тархъан гьарун, гьениса нуж нахъе рачарав нужер Аллагь. Нужер горбода бан букӀараб бакӀаб лагълъиялъул рукь бекана Дица ва нуж борхатго бетӀерги ккун хьвадулеллъун гьаруна.
МутӀигӀлъуларезе нагӀана
(Къан. 28:15-68)
14Амма нуж Дихъ гӀенеккичӀони ва киналго гьел амраби тӀуразаричӀони, 15нужеца Дир къанунал нахъ чӀвани ва Дир тӀадкъаял гӀадахъ росичӀони, нужеца Дир тӀолалго амраби тӀуразаричӀони ва Дир КъотӀи хвезабуни, 16– гьебмехалъ Дица нужее гьабулебги лъай. Гьебмехалъ Дица нужеда тӀаде кӀудияб хӀинкъи рещтӀинабила: берзул канлъи босулеб ва чорхое гӀазаб кьолеб каранзул унтиги цӀадул унтиги биччала. Нужеца хур бекьила, амма гьеб гӀадада ккела – гьениса хӀалухъен нужер тушбабаз кванала. 17Дица диван къотӀила нужее, ва тушбабаз нужеда тӀад бергьенлъи босила. Нуж рихараз нужеда тӀад кверщел гьабила, ва хӀинкъи гьечӀеб бакӀалдагицин лъутанхъилел рукӀина нуж.
18Гьебмехалдаги нуж Дие мутӀигӀлъичӀони, Дица жеги анкьго нухалъ цӀикӀкӀун жаза гьабила нужее. 19Дица нужер чӀухӀиялъул габур бекила. Дица нужеда тӀад зобал пахьуде сверизарила, ракь мазгаралде сверизабила: 20тӀолабго нужер къуватги гьородахъ ина – нужер хурзабахъ щибго бижиларо, гъутӀбуз пихъги кьеларо.
21Гьебмехалъги Дида данде чӀани ва Дие мукӀурлъизе бокьичӀони, Дица жеги анкьго нухалъ цӀикӀкӀун жаза гьабила нужее. 22Дица гӀалхул жанаварал риччала нужеда тӀаде ва гьез чӀвала нужер лъималги гӀи-боцӀиги; нужги тӀадеялдаса тӀаде дагьлъила, нужер нухалги чӀунтила.
23Гьебмехалъги нуж кантӀичӀони ва Дида данде чӀун хьвадани, 24Дунги чӀела нужеда данде: Дица жеги анкьго нухалъ цӀикӀкӀун жаза гьабила нужее. 25Дир КъотӀи хвезабуралъухъ Дица къисасалъул хвалчен биччала нужеда тӀаде. Шагьаразда жанир рахчилин нуж лъугьани, Дица квешаб хвалил унти биччала нужеда тӀаде ва тушманас кверде росила нуж. 26Дица нужее чед мукъсанлъизабила – анцӀго чӀужугӀаданалъе цо кор гӀезе буго кинабго чед бежизе; цӀадирабаздаги цӀан кьела нужее чадил кескал. Нужеца чед кванала, амма нуж гьелъ гӀорцӀиларо.
27Гьебмехалъги нуж Дихъ гӀенеккичӀони ва Дида данде чӀун хьвадани, 28Дунги чӀела нужеда данде гьалагаб ццидалъ, ва жеги анкьго нухалъ цӀикӀкӀун жаза гьабила Дица нужее. 29Нужерго лъималазул гьан кваназе буго нужеца.
30Дица нужер рорхалъабазул мукъадасал бакӀал риххизарила, ясикӀо-аллагьзабазе гьуинмахӀал рухӀулел бакӀал гъурила ва рекарал ясикӀо-аллагьзабазда тӀаде нужер жаназабиги рехила, нужедаса Дир ракӀги буссина. 31Дица щущахъ рала нужер шагьарал, нужер мукъадасал бакӀал чӀунтизарила ва нужер цӀадул къурбаназул гьуинаб махӀ тӀокӀалъ къабул гьабиларо. 32Дица чӀобоголъизабила нужер ракь, гьениб гӀумру гьабизе рачӀарал нужер тушбабицин риххун хутӀулеб хӀалалъ. 33Дица халкъазда гьоркьор рикь-рикьизарила ва Дирго хвалчадалъун цере къотӀила нуж. Нужер улка чӀобоголъила, шагьаралги чӀвадназде сверила. 34Гьебмехалъ ракьалъ шаматалъул соназул лазат босила. Нуж тушбабазул ракьалда ругебгӀан заманалъ, чӀобоголъараб нужер ракьалъе хӀалхьи щвела, ва гьелъ шаматалъул соназул лазат босила. 35Нужеца гьениб гӀумру гьабулеб букӀараб мехалда тӀуразаричӀелщинал шаматазул сонал рикӀкӀун, хӀалхьиялда букӀина ракь чӀобого хутӀарабгӀан мехалъ.
36Чияр ракьалде ккарал нужер чӀаго хутӀаразул рекӀелъе Дица бачӀинабураб хӀинкъиялъ, гьури пураб мехалъ шурараб тӀанхил гьаркьихъацин тӀурила гьел. Хвалчакьа кинигин лъутила гьел ва гӀодор ккела, гьезда хадув щивго лъугьун гьечӀеб мехалъги. 37Цоцада тенкелаго лъутила гьел, хвалчакьа хвасарлъизе лъутулел чагӀи кинигин, вихьуда тушман гьечӀониги. Тушбабазда данде чӀезе гӀураб къуват нужелъ букӀине гьечӀо. 38Гьедин хвела нуж чияр халкъазда гьоркьор; нужер тушбабазул ракьалда тӀагӀина нуж. 39Нахъе хутӀаразул дагьабго къадар тушбабазул ракьалда чӀагого турила жидергоги умумузулги мунагьал сабаблъун.
40БукӀаниги, жидергоги умумузулги мунагьазе ва жидецаго Дида данде гьарурал такъсиразегун тӀекълъабазе гьел мукӀурлъизе бегьула. 41Гьеб сабаблъунлъидал Дир гьезда ццин бахъараб ва гьел тушбабазул ракьалде тӀуризарурал. Гьезул риццатал ракӀал#26:41 Риццатал ракӀал – жугьутӀ мацӀалда, «суннат гьабичӀел ракӀал». мутӀигӀлъани ва жидерго гӀайиб гьез бецӀани, 42гьебмехалъ Дица ракӀалде щвезабила Якъубилгун гьабураб Дирго КъотӀи, ИсхӀакъилгун гьабураб Дирго КъотӀи ва Ибрагьимилгун гьабураб Дирго КъотӀи, ва гьаб ракьги ракӀалде щвезабила. 43Гьаб ракь чӀобоголъараб ва халкъ гьаниса нахъе къотӀараб мехалъ, ракьалъ лазат босизе буго гьоркьор риччан рукӀаралщинал шаматалъул соназул хӀухь бахъиялдаса. ЧӀаго хутӀарал гӀадамаз жидерго гӀайиб баччизе буго Дир амраби нахъчӀваралъухъ ва Дир къанунал гӀадахъ росичӀолъиялъухъ. 44Амма гьеб мехалдаги тушбабазул ракьалда Дица гьел рехун теларо, тӀуран нахъчӀваларо ва тӀагӀинариларо; гьезулгун гьабураб Дирго КъотӀи хвезе теларо. Дун вуго БЕТӀЕРГЬАН, гьезул Аллагь. 45Дирго халкълъун рукӀине, батӀиял халкъаздаги рихьулаго Мисриялдаса Дица нахъе рачарал гьезул умумузулгун гьабураб КъотӀи ракӀалде бачӀина Дида. Дун вуго БЕТӀЕРГЬАН».
46Гьеле БЕТӀЕРГЬАНАС Жиндидагоги ГӀизраилил халкъалдаги гьоркьор гьарурал ва Синай магӀарда Мусадасан рещтӀарал къануналги, амрабиги, малъа-хъваялги.
Currently Selected:
Левит 26: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
