Левит 2
2
Ролъул хирияб садакъа
1БЕТӀЕРГЬАНАСЕ гӀоло ролъул хирияб садакъа кьолеб мехалъ, гьеб букӀине ккола тӀаса бищараб ролъ. Хирияб садакъа кьолев чияс ролъулъе зайтуналъул нахги тӀела ва тӀасан ладанги#2:1 Ладан – махӀ берцинаб пицӀ. лъела 2ва гьеб кашишзабазухъе, ай Гьарунил васазухъе босила. Кашишас гьелда тӀаса, нахгун ва кинабго ладангун цадахъ, цо дангъура ролъул босила, ва гьеб бухӀила къурбан-бакӀалда тӀад – тӀолабго хирияб садакъаялъул бакӀалда чӀолеб бутӀа хӀисабалда. Гьеб буго БЕТӀЕРГЬАНАСЕ бокьулеб махӀалъул цӀадул къурбан. 3Ролъул хирияб садакъаялъул хутӀараб Гьаруниеги гьесул васазеги букӀине ккола; БЕТӀЕРГЬАНАСУЛ цӀадул садакъаялъул бутӀа букӀиналъ, гьеб буго кӀудияб хиралъи.
4Ролъул хирияб садакъаялъе корохъ режарал чадал кьолел ругони, гьел рукӀине ккола лъикӀаб ролъул руцарал – зайтуналъул нахуда руцарал, ялъуни тӀад зайтуналъул нах бахарал бугьурго чадал. 5Ролъул хирияб садакъаялъе къанида тӀад бежараб чед кьолеб бугони, гьебги букӀине ккола лъикӀаб ролъул буцараб, зайтуналъул нахги жубараб, реччебги гъорлъ гьечӀеб. 6Гьелъул гӀисинал мочӀаби гьаре ва гьелда тӀаде зайтуналъул нах тӀе; гьеб ккола ролъул хирияб садакъа. 7Ролъул садакъаялъе гелалда жаниб бежараб чед кьолеб бугони, гьебги букӀине ккола лъикӀаб ролъул, зайтуналъул нахуда буцун гьабураб. 8Гьедин хӀадурараб ролъул хирияб садакъа босизе ккола БЕТӀЕРГЬАНАСУЛ Чадиралда цебе. Цинги гьеб кашишасухъе кьела ва гьес къурбан-бакӀалде босила. 9Кашишас гьелъул цо бутӀа, тӀолабго хирияб садакъаялъул бакӀалда чӀолеб бутӀа хӀисабалда, къурбан-бакӀалда тӀад бухӀила. Гьеб буго БЕТӀЕРГЬАНАСЕ хириял махӀал рахъинариялъе тӀубанго бухӀулеб цӀадул къурбан. 10Хирияб садакъаялъул хутӀараб Гьаруниеги гьесул васазеги букӀине ккола; БЕТӀЕРГЬАНАСУЛ цӀадул садакъаялъул бутӀа букӀиналъ, гьеб буго кӀудияб хиралъи.
11ТӀолалго БЕТӀЕРГЬАНАСЕ гӀоло кьолел ролъул хириял садакъабазда цадахъ кинабгӀаги реччеб букӀине бегьуларо; я реччеб, я гьоцӀо БЕТӀЕРГЬАНАСЕ гӀоло кьолеб хирияб садакъа хӀисабалда бухӀуге. 12Дуца гьеб БЕТӀЕРГЬАНАСЕ гӀоло хирияб садакъалъун кьезе бегьула, цӀияб хӀалухъеналъул бутӀа хӀисабалда, амма къурбан-бакӀалда БЕТӀЕРГЬАНАСЕ хирияб махӀ бахъинабулаго, гьеб гьениб букӀине бегьуларо. 13Киналго ролъул хириял садакъабазулъе цӀам бай. Гьенибе цӀам бачӀого тезе бегьуларо, щайгурелъул гьеб ккола Аллагьасул КъотӀиялъул цӀам#2:13 КъотӀиялъул цӀам – киналго къурбаназулъе ва хириял садакъабазулъе цӀам базе кколаан, гьел махӀцинчӀого рукӀиналъе ва тӀагӀамалъе гӀоло гуребги, БетӀергьанасул КъотӀи абадияб ва хиси гьечӀеб букӀиналъул гӀаламат хӀисабалдаги. – щибаб хирияб садакъаялда гъорлъе цӀам бай.
14БЕТӀЕРГЬАНАСЕ ролъул хирияб садакъаялъе лъилъариялъул байбихьуда цӀияб бугӀа-ролъ кьолеб мехалъ, тӀоралдаса бацӀцӀадги гьабун, хъуризеги хъурун, гьеб барсизе ккола. 15Гьелда тӀаде зайтуналъул нахги тӀе, тӀасан ладанги лъе – гьеб ккола ролъул хирияб садакъа. 16Биччанте кашишас нахгун ва кинабго ладангун цадахъ гьеб гъурараб бугӀа-ролъул цо бутӀа босизе ва гьеб бухӀизе, тӀолабго хирияб садакъаялъул бакӀалда чӀолеб бутӀа хӀисабалда. Гьеб буго БЕТӀЕРГЬАНАСЕ кьолеб цӀадул садакъа.
Currently Selected:
Левит 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
