Юнус 1
1
Юнус БетӀергьанасухъа лъути
1Амиттавил вас Юнусихъе БетӀергьанасул калам рещтӀана: 2«Нухде вахъа! Мун кӀудияб шагьар Ниневиялде а. Гьелъул жамагӀаталъе вагӀза гьабе ва гьезда Дие гьезул квешлъаби тӀатун ругин лъазабе».
3Юнус нухде вахъана. БетӀергьанасдаса Таршишалде#1:3 Испаниялда бугеб шагьар. лъутизе хӀукмуги гьабун, гьев ана Яффаялде, гьениб гьес балагьана Таршишалде унеб гама, кколеб мухьги кьун, гьеб гамида рекӀана, гьедин БетӀергьанасдаса Таршишалде тӀуризе къасдалда.
4Амма БетӀергьанас ралъдаде гьалагаб гьури битӀана ва гьеб гьороца ралъад багъаризабуна. Гама щущахъ бан гъанкъизехъин букӀана. 5Гамихъабазул рекӀелъе хӀинкъи ккана. Гьезул жив-жив чи жиндирго аллагьзабазде ахӀи базе ва жал хвасар гьареян гьардезе лъугьана. Гамаялъе бигьалъи ккезелъун, гьез гамида букӀараб къайи ралъдалъе бана.
Юнусин абуни, гамида жанивеги лъугьун, парахат кьижун вукӀана. 6Гамихъабазул бетӀер вачӀана гъоркье Юнусида аскӀове ва гьес гьикъана: «Щай мун кьижун вугев? ТӀаде вахъа, ва дурго Аллагьасде ахӀи бай! Щиб лъалеб, Гьесда нилъер ахӀи рагӀун, нилъ чӀаго хутӀизе бегьула».
7Киналго цоцада гаргадизе лъугьана ва гьез цоцазда абуна: «Нилъеца можоро рехизе ккола, щив сабаблъун нилъеца гьаб балагь хӀехьезе кколеб бугебали лъазабизе!» Можоро рехана – ва можороялъ Юнус вихьизавуна.
8«Лъил гӀайибалдалъун нижеде гьаб балагь рещтӀараб? Жаваб кье, мун щив кколев?» – ин гьикъана гьез гьесда. «Дур иш-пиша щиб? Киса мун? Киб бугеб дур улка-ракь? Щиб халкъалъул чи мун кколев?» 9«Дун вуго жугьутӀав, – ин абуна гьес. – Дица ралъадги ракьги бижарав БетӀергьанасе, Зобалазул Аллагьасе гӀибадат гьабула».
10КӀудияб хӀинкъи речӀчӀана гамихъабазда. «Дуца гьабураб жо щиб!» – ан абуна гьез гьесда, жив БетӀергьанасдаса тӀурун унев вугилан гьес бициндал. 11«Щиб гьанже нижеца дуда гьабизе кколеб, гьаб ралъад гӀодобе биччаялъе? Ралъдал багъари тӀадеялдаса тӀаде жеги кутаклъулеб бугелъулха». 12«Дун восун ралъдалъе рехе, ралъад гӀодобе биччазе букӀине. Дида лъалелъул, дун сабаблъун ккун ругеблъи нуж гьаб ралъдал гьалаглъиялъукье», – ян жаваб кьуна гьес.
13Ралъдахъаби, расадул раххназ хан бачун, ралъдал рагӀалде гама сверизабизе лъугьана, амма гьезухъа гьеб бажаричӀо. Ралъад жегиги цӀикӀкӀун гьалаглъулеб букӀана. 14Гьебмехалда гьез БетӀергьанасде ахӀи бана: «БетӀергьан! – ин гьарана гьез. – Гьав чи сабаблъун нижее тамихӀ гьабуге! Щибго гӀайиб гьечӀого гӀодобе тӀураб гьаб би нижедаса тӀалаб гьабуге! Мун вугелъул БетӀергьан ва гьадинаб бугелъул Дур хӀукму».
15Восизеги восун гьез Юнус ралъдалъе рехана ва ралъдал гьалаглъи къотӀана. 16Гамихъаби БетӀергьанасдаса кутакалда хӀинкъана. Гьез Бетергьанасе къурбан ва назру гьабуна.
Currently Selected:
Юнус 1: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
