Якъубил кагъат 4

4 бетӀер

Аллагьасде мутӀигӀлъе нуж

1Нужеда гьоркьоб кьалги дагӀба-рагӀиги кин бижулеб? Чорхолъ бухъардилеб бугеб гьаваялъ гурищ гьел рижизарулел? 2Нужее бокьун бугониги, кьолеб гьечӀелъулин нужго нужецаго чӀвалел ругел. ХъантӀун руго нуж, мурадалдеги щолел гьечӀо. ДагӀбадулел руго, къацандулел руго, амма нужеца Аллагьасда гьарулеб гьечӀелъул, пайда бахунеб гьечӀо. 3Гьараниги, кьолеб гьечӀо, лъикӀлъиялъе гурелъул гьарулеб бугеб, – нужерго гьаваялда нахърилълъун хвезабизелъидал гьарулеб бугеб. 4Божизе бегьиялдаса ун руго нуж! Нужеда лъаларебищ дуниялалъул гьудул Аллагьасул тушман вугевлъи? Дуниялалъулгун гьудуллъи гьабизе бокьарав Аллагьасул тушманлъун лъугьуна. 5«Нилъехъе рещтӀараб РухӀалъ тӀалаб гьабулеб буго цохӀо Аллагь вокьизе», – ян гӀадада хъван бугин ТӀехьалдайиланищ нужеда ракӀалде кколеб? 6Аллагьасул баркат цӀикӀкӀунебго-цӀикӀкӀунеб букӀуна. «Аллагь чӀухӀаразда дандечӀола, хӀалимазда гьесул баркат лъола», – ян абиялъе гӀиллаги гьеб буго. 7Аллагьасде мутӀигӀлъе, илбисалда дандечӀа, гьеб нужеда аскӀоса лъутун ина гьебмехалъ. 8Аллагьасде гӀагарлъе, гьев нужедеги гӀагарлъила. Нужго рацӀцӀад гьаре, ле мунагьчагӀи! Ле цо хӀал кколарел чагӀи, нужерго ракӀалги рацӀцӀад гьаре! 9Гьабураб квешлъиялдаса ракӀ бухӀа, гӀоде, чӀчӀичӀчӀиде! Нужер релъи гӀодиялде буссине биччанте, нужер рохел пашманлъиялде буссине биччанте! 10БетӀергьанасде мутӀигӀлъе, гьес нуж тӀадегӀанлъизарила. 11Цоцазда тӀасан квешаб рагӀи абуге, вацал. Вацасул хӀакъалъулъ квешаб рагӀи абурав яги гьесда гӀайиб чӀварав чияс Къануналъул хӀакъалъулъги абила квешаб рагӀи, Къануналда гӀайиб чӀвалеб бугони, мун вукӀине ккола гьелдасаги тӀадегӀанавлъун, – мун вуго гьеб тӀубазабизе кколев чи. 12Къанун бахъаравги гьеб тӀубазабизе тӀамулевги цохӀо Аллагь вуго. Гьесда кӀола нилъ хвасарлъизаризеги хвалде рачинеги. Гьедин бугелъул, мунго гӀадинасда гӀайиб чӀвазе ккани, мун щив чи?

Нужедаго ракӀги чӀун, чӀухӀдаризе лъугьунге

13«Жакъа-метер нилъ пуланаб шагьаралде ине къватӀире рахъина, гьениб цо лъагӀел бала, даран-базар гьабила ва нилъее хайир бахина», – ян абулел чагӀи, гьанже нуж гӀенекке дихъ! 14Метер щиб нужее ккелебали лъаларо нужеда. Щиб жо кколеб нужер гӀумру? ТӀаде борхун бачӀун цо дагьабго мехалдасан тӀагӀун унеб гӀодобнакӀкӀалда релълъуна гьеб. 15«Аллагьасе бокьани, чӀагоги хутӀани, пуланабги гьабила, пуланабги гьабила», – ян абуни лъикӀаб букӀина нужее. 16Нужин абуни, нужедаго ракӀги чӀун, чӀухӀдарилел руго. Гьединаб чӀухӀи квешаб жо буго.

17ЛъикӀлъи кин гьабилебалиги лъалев, жинца гьебги гьабуларев чиясе мунагь букӀуна.

Currently Selected:

Якъубил кагъат 4: АварАК

Highlight

Copy