Якъубил кагъат 2

2 бетӀер

Чи ватӀа гьавизе бегьуларо

1Я дир вацал, нилъер машгьурлъарав ТӀадегӀанасде – ГӀиса МасихӀиде иман лъурал нужеца чи ватӀа гьавизе бегьуларо. 2Масала, нужер данделъиялде вачӀана лъикӀго ретӀа-къарав, меседил баргъичалги рарав чи ва басриябго ратӀлилъ мискинчиги вачӀана. 3Нужеца адаб-хъатир гьабула чӀухӀараб ратӀлилъ вугесул, гьале гьанив рахӀаталда гӀодов чӀайилан абула гьесда. Мискинасда абула доле дова гӀодов чӀайилан яги гьанив дир хӀатӀазда цеве гӀодов чӀайилан. 4Гьедин нужедаго гьоркьоб рикьи ккезабулеб гьечӀищ нужеца? ЦӀахъа-рахъай гьабулев къадиясда релълъунел гьечӀищ нуж? 5ГӀенеккея, дир хириял вацал! ГӀаламалъго мискиналлъун рикӀкӀунелал гурищ Аллагьас тӀаса рищун ругел, иманалъ гьел бечелъизе ва жиндие рокьулезе рагӀи кьураб ПарччахӀлъи гьезие насиблъизе? 6Нужецайин абуни мискинал рикӀкӀунел гьечӀо! Бечедаз гуребищ нужеда тӀад зулму гьабулеб бугеб? Гьез гурелищ нуж суд гьабулел рокъоре рехъерхъулел? 7Гьез гуребищ какулеб нужеда лъураб лъикӀаб цӀар? 8«Мунго гӀадин вокьа дуе дуда аскӀов вугевги», – ТӀехьалда ругел амруязул парччахӀлъун рикӀкӀунеб гьеб амру нужеца хӀакъикъаталдаги тӀубазабулеб бугони, гьеб лъикӀаб иш буго. 9Амма нужеца гӀадамал ратӀа гьарулел ругони, гьеб буго мунагь, ва, Къануналда рекъон, нуж ккола такъсирчагӀи. 10Къануналъул тӀолалго рихьизариял цӀунулел ругониги, амма цониги амруялдаса чи тарани, кинабго гӀайиб гьесде тӀаде ккола. 11ХъахӀбалъи гьабугейилан лъазабурас лъазабун буго чи чӀвагейиланги. Масала, дуца хъахӀбалъи гьабулеб гьечӀо, амма чи чӀвана, гьедин мун лъугьана къанун хвезабурав такъсирчилъун. 12Инсанасе эркенлъи кьолеб къануналда рекъон Аллагьас жидее суд гьабизе бугел гӀадамазда релълъун кӀалъай ва хьваде. 13ГурхӀел гьечӀесе Аллагьасул судалъулги гурхӀел букӀине гьечӀо. РитӀухъаб хӀукмуялдасаги тӀадегӀанаб буго гурхӀел!

Иман лъейги ишалги

14Дица иман лъунилан абиялъул пайда щиб бугеб, вацал, лъикӀал ишал гьарулел гьечӀони? Гьединаб иманалъ хвасар гьавиладай гьев? 15Нужер вацасул яги яцалъул тӀад ретӀине ретӀел гьечӀони, яги жакъаялде кваназе жо гьечӀони, 16масала, нужер цояс гьезие гӀакълу кьола, рекере, хинлъизе айилан, кваназе айилан, амма гьезие къваригӀараб кьоларо, – лъикӀлъийищ гьес гьабулеб бугеб? 17Гьедин, лъикӀал ишал цадахъ гьечӀеб иманалъул пайда букӀунаро. 18Цо лъицаниги абуни, цоясулъ божи-иман бугин, цогидас лъикӀал ишал гьарулин, – дица абила лъикӀал ишал гьечӀеб божи-иман лъил бугебали дида бихьизабейилан; цинги дица дуда бихьизабила лъикӀал ишазулъ бугеб дир божи-иман. 19Аллагь цо вукӀиналда божулевищ мун? ЦӀакъ лъикӀ! Амма жундулги божулагури хӀинкъун сородилаго! 20ЛъикӀал ишал цадахъ гьечӀеб иманалъул пайда букӀунарилан чӀезабилищ дуе, ле, бичӀчӀи гьечӀев чи? 21Къурбаналъе хъвезе жиндирго вас ИсхӀакъ вегизавун вукӀана нилъер эмен Ибрагьимица. Гьеб ишалъулъ гурищ Аллагьасда гьесул ритӀухълъи бихьараб? 22Бихьулищ – гьесул иманги ишги цолъун букӀана, гьес гьарурал лъикӀал ишаз квербакъана иман камиллъизе. 23Гьедин ритӀухълъана ТӀехьалда бугеб гьадинаб калима: «Ибрагьим Аллагьасда божана, гьединлъидал гьес гьевги жиндие ритӀухъав чилъун рикӀкӀана». Гьедин «Аллагьасул гьудул» абураб цӀарги щвана Ибрагьимие. 24Нужеда бихьулеб буго цохӀо иманалъ гуребги, лъикӀал ишазги инсан ритӀухълъизавулев вукӀин. 25Тушманасул рахъалде цӀех-рехалъе ритӀарал рагъухъаби рокъоре рачана хъахӀбалъиялдалъун бетӀербахъи гьабулей йикӀарай РахӀабица ва гьеб шагьаралдаса къватӀире рорчӀизе нух бихьизабуна#2:25 Гьелдаса азаргоялдасаги цӀикӀкӀун соналъ цебе жугьутӀазда ракӀалда букӀана Иерихон шагьар бахъизе. Гьаниб бицунеб буго гьеб заманалда ккараб лъугьа-бахъиналъул. . Гьеб лъикӀаб иш сабаблъун гьей гӀадан Аллагьасда цее ритӀухълъана. 26РухӀ гьечӀони, чорхолъ чӀаголъи букӀунареб гӀадин, лъикӀал ишал цадахъ гьечӀони, иманалъулги пайда букӀунаро.

Currently Selected:

Якъубил кагъат 2: АварАК

Highlight

Copy