Байбихьи 48

Ефраимги Манассги

1Цо заманалдасан эмен унтун вугин хабар бачӀана Юсупихъе. Гьебмехалъ цадахъ жиндирго васал Манассги Ефраимги рачун, инсухъе вилълъана Юсуп.

2«Дур вас Юсуп вачӀун вуго духъе», – ян абулеб рагӀараб мехалъ, чорхол рухӀ-жанги бакӀарун, Якъуб бусада гӀодов чӀана. 3Цинги гьес Юсупида абуна:

«Цебего Лузалда, Ханааналъул ракьалда, ХӀалкӀолев Аллагь#48:3 ХӀалкӀолев Аллагь – жугьутӀ мацӀалда «Эль-Шадай». Гьелъул магӀна – хӀалкӀолъи цӀикӀкӀарав, Бечедав, Гьарзаяв Аллагь. загьирлъана дие. Дида баракатги лъун, 4Гьес абуна: „Дица дур наслу цӀикӀкӀинабила, лъимал гӀемерал кьела, ва дудасан халкъазул тӀубараб читӀир лъугьинабила. Гьаб ракьги абадиялъего дур наслабазе кьела“, – ян.

5Гьале, жакъа дица дирго васаллъун гьарулел руго, дун гьаниве вачӀиналдего Мисриялда дуе гьарурал, дур васал. Рувимги Шимеонги гӀадин, Ефраимги Манассги дир васаллъун рукӀина. 6Хадур гьарурал васал дур рукӀина, амма жиндирго кӀудиял вацазул наслабазда гьоркьоре рачина ва гьезул бутӀаялдаса ирсги букӀина гьезие.

7Падданалдаса тӀадвуссун вачӀунаго, Ханааналда, Эфратаялда гӀагарлъухъ нухда хвана дир Рахел. Доя, Эфратаялде (Бет-Лехемалде) унеб нухда юкъана дица гьей».

8Цинги Юсупил лъималазда бер чӀвана ГӀизраилил ва гьес гьикъана:

«Гьал щал?» – абун.

9«Гьал руго гьанир Мисриялда Аллагьас дие кьурал дир васал», – абун жаваб кьуна Юсупица.

«Гьанире дида аскӀорегӀан раче гьел, дица гьезие дугӀа гьабизе», – ян абуна Якъубица.

10Херлъиялъ берзул канлъи сун букӀана ГӀизраилил – цӀакъго мукъсанго гурони щибго бихьулароан. Юсупица лъимал гьесда аскӀорегӀан рачана. ГӀизраилица гьезда убачал гьаруна, каранде къана, 11цинги Юсупида абуна:

«Мун вихьилиланцин хьул букӀинчӀо дир, гьале Аллагьас дур лъималгицин рихьизаруна».

12Юсупица лъимал инсул накабаздаса нахъе рачана ва гӀодоб бетӀер цузегӀан инсуе сужда гьабуна.

13Жиндирго кваранаб рахъалда (ГӀизраилил квегӀаб рахъалда) Ефраим чӀезавуна гьес, квегӀаб рахъалда (ГӀизраилил кваранаб рахъалда) Манасс чӀезавуна, ва гьел ГӀизраилида аскӀорегӀан рачана. 14Амма ГӀизраилица, кваранаб квер цебе битӀун, гьеб Ефраимил – гьитӀинасул бетӀералда лъуна, квегӀаб квер гьес Манассил – кӀудиясул бетӀералда лъуна. Гьедин хъанчил сураталда лъуна гьес кверал лъималазул бутӀрузда. 15Цинги Юсупиеги гьесул лъималазеги баракаталъул дугӀа гьабуна Якъубица:

«Дир умумул Ибрагьимицаги ИсхӀакъицаги Жиндир нух ккурав Аллагь!

Гьавураб къоялдаса нахъе гьанжелъизегӀан дун хьихьарав дир Вехь!

16Щибаб квешлъиялдаса дун хвасарлъизавурав дир Малаик! Гьарула баракат лъе гьал лъималазда! Дирги дир умумул Ибрагьимилги ИсхӀакъилги цӀар хутӀаги гьазулъ. Гьазул наслу-къедги гӀемерлъаги гьаб ракьалда».

17Ефраимил бетӀералда инсуца кваранаб квер лъун бихьидал, гьеб инсуца лъачӀого гьабураб жо бугин ккун, Юсупица гьесул квер Ефраимил бетӀералдасаги босун, Манассил бетӀералда лъезехъин букӀана. 18Ва гьес абуна:

«Гьедин гуро, дада. Гьале дие тӀоцеве гьавурав – гьасул бетӀералда лъе кваранаб квер».

19Амма инсуца абуна:

«Дида лъала, дир вас. Дида лъала гьесдасанги кӀудияб халкъ лъугьине букӀин. Амма гьитӀинав вац гьесдасаги тӀадегӀанлъила ва гьесул хьоналдасан гӀемерал халкъал лъугьина».

20Гьале доб къоялъ, гьезие баракат гьарун, ГӀизраилица абурал рагӀаби:

«ГӀизраилил халкъалъе баракаталлъун лъугьина нуж.

Гьез цоцае гьара-рахьи гьабулелъул абила:

„Ефраимидаги досул вац Манассидаги

релълъинавеги Аллагьас мун!“ – ин».

Гьедин Ефраим Манассидаса тӀадегӀанлъизавуна гьес.

21Цинги ГӀизраилица Юсупида абуна:

«КватӀичӀого дун хвела. Амма Аллагьас нуж рехун теларо ва нужерго умумузул ракьалде тӀадруссун рачина. 22Вацаздаса тӀокӀ гьавун, дуе кьолеб буго дица, дунго вагъун амориязухъа бахъараб, рорхатал щобазул мегӀералъул гъвелги#48:22 Гьеб ккола Шехем шагьар.».

Currently Selected:

Байбихьи 48: АварАК

Highlight

Copy