Байбихьи 45

Юсупица вацазе живго загьир гьави

1Юсупида тӀокӀалъ яхӀ гьабун бажарулеб букӀинчӀо, гьединлъидал:

«Киналго къватӀире а!» – ян буюрана Юсупица жиндирго чагӀазе.

Вацалгун живго цохӀо хутӀараб мехалъ, гьес гьезда бицана живго щив кколевали, 2ва биччан гьаракьгун гӀодана Юсуп. Гьесул гӀоди рагӀана мисрияздаги ва пиргӀавнасул кӀалгӀаялъул агьлуялдаги.

3«Дун Юсуп вуго, – ян абуна гьес вацазда. – Унго, дир эмен чӀаго вугевищ?»

Амма, гьеб рагӀидал, гӀунун, цӀорон хутӀун, рагӀи абизе кӀолеб хӀалалда рукӀинчӀо вацал.

4«АскӀорегӀан рачӀа», – ян абуна Юсупица. Цинги вацал гьесда аскӀорегӀан рилълъана.

«Гьале дун, Юсуп, нужеца Мисриялде вичарав нужер вац, – ин абуна гьезда Юсупица. 5– Амма гьеб сабаблъун гьанже нужеего гӀазаб кьоге, нужедаго гӀайибги чӀваге. Аллагьаслъидал дун гьаниве витӀарав нужер гӀумру хвасар гьабизе. 6Гьале кӀиябго лъагӀел ана ракъи бачӀаралдаса. Жеги щугоги соналъ я рекьи, я лъилъи букӀине гьечӀо. 7Аллагьас нужедаса цеве дун гьаниве витӀана, ракьалдаса нужер наслу тӀагӀинчӀого букӀине ва кӀудияб тархъанлъиялдалъун нужер гӀумру хвасарлъизе. 8Нужеца гурев, Аллагьасин дун гьаниве витӀарав ва пиргӀавнасул эменлъунги, гьесул бугебщиналда тӀад бетӀергьанлъунги, Мисриялъул тӀолабго ракьалда кверщелчилъунги гьавурав.

9Гьанже хехго инсухъе тӀадрусса ва гьесда бице гьадин абунин Юсупица: „Аллагьас дун тӀолабго Мисриялъул кверщелчилъун гьавуна. КӀванагӀан хехго дихъе вачӀа! 10Лъималгун ва лъималазул лъималгун, кинабго гӀи-боцӀигун ва буголъигун цадахъ мун чӀела дида гӀагарлъухъ Гошеналъул ракьалда. 11Гьениб дур тӀалаб гьабила дица – мунги, дур тӀолабго хъизан-къайги, дур гӀи-боцӀиги язихълъичӀого букӀине. Жеги щуго соналъ ракъи букӀине бугелъулха“.

12Гьале, нужеда ва дир вац Буняминида бихьулеб буго нужеда кӀалъалев чи дун – Юсуп вукӀин. 13Инсуда бице Мисриялда дир бугеб кӀудияб адаб-хӀурматалъулги, нужеда бихьарабщиналъулги. Эмен хехго гьаниве ваче!»

14Ва жиндирго вац Буняминида къвалги бан, гӀодана Юсуп; гьесда къвалги бан, Буняминги гӀодана. 15Гьединго цогидал вацаздаги къвалалги ран гӀодана Юсуп. Гьебмехалъ гьелги ригьа-ричун Юсупгун хабаралде журана.

16Юсупихъе вацал рачӀун ругилан хабар щвана пиргӀавнасул кӀалгӀаялдеги. ПиргӀавнги гьесул цересел гӀадамалги гьеб хабаралдаса рохана, 17ва пиргӀавнас Юсупида абуна:

«Вацазда абе хӀамузда гьиралги къан, Ханааналде тӀадруссайилан, 18гьениса эменги хъизамалги гьанире рачине. Мисриялъул бищунго лъикӀабщинаб кьела дица гьезие; биччанте гьез гьаб нилъер улкаялъул гьарзалъиялдаса лазат босизе! 19Гьезда абе лъималги руччабиги рекӀине Мисриялдаса чуялгун чолгьакал рачейилан ва, эменги цадахъ вачун, гьанире нахъ руссайилан. 20Гьениб хутӀараб жидерго мал-мулкалъул ургъел гьабизе ккеларо гьез: Мисриялда бугелдаса лъикӀаб тӀаса бищун кьела гьезие!»

21Гьедин гьабизеги гьабуна ГӀизраилил васаз. ПиргӀавнас амру гьабураб къагӀидаялда, чуялгун чолгьакалги кьуна гьезие Юсупица, нухда квенги лъуна, 22гьезул щивасе цӀияб ретӀелги кьуна. Буняминиейин абуни, гьес гӀарцул лъабнусго шекелги кьуна, щуго цӀияб ретӀелги кьуна. 23Гьединго инсуе гьес ритӀана: анцӀго бихьинхӀамида къарал Мисриялъул ракьалъул бечелъиялдасан хири-хириял сайгъатал ва анцӀго цӀухӀамида къараб тӀорщел, чед ва цогидабги нухда кваназе жо.

24«Нухда квешал пикраби ботӀролъе риччаге#45:24 Ялъуни «нухда цоцалъ рагъуге».», – ян абуна къолъикӀ гьабулаго гьес вацазда.

25Гьедин гьел Мисриялдаса къватӀире рахъана ва Ханааналде инсухъе тӀадруссана.

26«Юсуп чӀаго вуго ва гьесда кодоб буго кинабго Мисриялъул ракь», – ин гьез абураб мехалъ, Якъубил ракӀ чӀун хутӀанилан ккана. Гьелда божизе кӀоларого вукӀана эмен. 27Амма васаз гьесда щвалде щун бицана Юсупица абурабщинаб, ва гьесда жиндирго беразда бихьана жив вачине Юсупица ритӀун рачӀарал чолгьакалги чуялги. Гьебмехалъ гьезул эмен Якъуб рухӀ-хӀал бачӀун лъугьана.

28«ТӀокӀалъги щибха дие къваригӀараб! – ин абуна ГӀизраилица (Якъубица). – Дир вас Юсуп чӀаго вуго! Гьанже дунго хвелалде цеве гьев вихьизе ина!»

Currently Selected:

Байбихьи 45: АварАК

Highlight

Copy