Тархъанлъи 26

Мукъадасаб Чадир

(Тархъ. 36:8-38)

1Мукъадасаб Чадиралъе анцӀго пардав гьабе. Гьел пардавал рессе тӀеренаб хӀебетги босун, канчӀхъахӀилаб, бецӀбагӀараб ва канчӀбагӀараб квасул кунги хӀалтӀизабун ва тӀад берцинго херувимазул сипаталги угьун. 2Риччанте киналго пардавал цоцазда ращадал рукӀине: къоло микьго натӀ халалъиги ункъго натӀ гӀеблъиги бугел. 3Цинги щуго пардав цоцада букъун цо гьабе ва хутӀараб щуго пардавалъеги гьединго гьабе. 4Щугоцадахъаб пардавалъул рагӀалккун эхеде гьаре канчӀхъахӀилаб ххамил гъанцӀакӀичӀал, гьединго гьабе кӀиабилеб щугоцадахъаб пардавалъул рагӀалккун эхедеги. 5ТӀоцебесеб пардавалъул рагӀалда гьабе кӀикъоялда анцӀго гъанцӀакӀичӀ ва кӀиабилеб щугоцадахъаб пардавалдаги гьабе гьезда данде рекъон кколедухъ кӀикъоялда анцӀго гъанцӀакӀичӀ. 6Хадуб кӀикъоялда анцӀго меседил гъанцӀа гьабе ва гьездалъун кӀиябго пардав цоцада рекӀинабе, Чадир цокӀалаб букӀине.

7Чадиралда тӀасан тӀамизе цӀцӀел квасул анцӀила цо пардавги гьабе. 8АнцӀила цоябго пардав цоцада бащадаб букӀине ккола: лъеберго натӀалъул халалъиги ункъго натӀалъул гӀеблъиги бугеб. 9Гьезул щугояб цоцада букъе ва хутӀараб анлъгоябги цоцада букъе. Анлъабилеб пардав Чадиралъул кӀалтӀуялда цебесан кӀичӀвай – гьеб букӀина кӀалтӀуялда цебе бигъун. 10Цояб щугоцадахъаб пардавалъул рагӀалккун гьабе кӀикъоялда анцӀго гъанцӀакӀичӀ ва анлъгоцадахъаб пардавалъул рагӀалккунги гьабе кӀикъоялда анцӀго гъанцӀакӀичӀ. 11Хадуб гьабе кӀикъоялда анцӀго мазгарул гъанцӀа ва гьездалъун гьеб кӀиябго пардавги цолъизабе, цо пардав ккезабизе. 12Пардавалъул тӀокӀлъараб бутӀа дализабизе ккола Чадиралда нахъасан гӀодобе. 13Пардавалъул халалъиялъул тӀокӀлъараб бутӀаги кӀиябго хьибилалдаса гӀодобе цо-цо натӀ дализабизе ккола, Чадир бацунеб куцалъ. 14Чадиралда тӀад базе багӀаркьералъ релъарал гӀиял къухьдузул пардав гьабе, ва гьездаги тӀасан базе тӀеренал цӀаказул пардавги гьабе.

15Хадуб Чадиралъе акациялъул цӀулал рамаби гьаре. 16Гьел рамаби рукӀине ккола анцӀго натӀалъул халалъиги натӀгун бащдаб гӀеблъиги бугел, 17цоцада дандбитӀараб бакӀалда кӀиго цӀутӀелги бугел. Гьединаллъун гьаре Чадиралъе киналго рамаби. 18Чадиралъул къилбаялъул рахъалъе гьабе къого рама 19ва гьезие гӀарцул кӀикъого гъоркьчӀелги гьабе – щибаб рамаялъе кӀи-кӀи гъоркьчӀел, щибаб цӀутӀелалда гъоркь цо-цо. 20Чадиралъул шималияб рахъалдасанги гьабе къого рама 21ва гьезие кӀикъого гъоркьчӀелги – щибаб рамаялда гъоркь кӀи-кӀи. 22Жеги анлъго рама гьабе Чадиралъул нахъисеб рахъалъе, ай, бакътӀерхьул рахъалъе, 23ва жеги кӀиго рама гьелъул нахъехунисел бокӀназеги гьабе. 24Гьел бокӀназул рамаби ахадаса кӀирикьарал, тӀогьирехун цо горалъ данде рачарал рукӀине ккола; гьедин гьабе бокӀназул кӀиябго рама. 25Кинабниги гьениб букӀина микьго рама ва анцӀила анлъго гӀарцул гъоркьчӀел – щибаб рамаялда гъоркь – кӀи-кӀи гъоркьчӀел.

26Жеги гьаре акациялъул цӀулал рахал: Чадиралъул цо рахъалда ругел рамабазда тӀад – щуго рахи, 27цогидаб рахъалда ругел рамабаздаги – щуго рахи ва нахъисеб рахъалда, ай, бакътӀерхьул рахъалда ругел рамабаздаги – щуго рахи. 28Чадиралъул мокърукь бакьулъан цояб рагӀалдаса цогидаб рагӀалде щун лъураб рахиялъул кумекалдалъун цоцалъ рухьина киналго рамаби. 29Рамабазда тӀад месед бекье ва меседалъул горал гьаре рахал кквезе; рахазда тӀадги месед бекье.

30Мукъадасаб Чадир гьабе магӀарда дуда бихьизабураб сипаталда рекъон.

31Хасаб пардав бессе тӀеренаб хӀебетги, канчӀхъахӀилаб, бецӀбагӀараб ва канчӀбагӀараб квасул кунги босун ва тӀад берцинго херувимазул сипаталги угьун. 32Ункъго хӀуби гьабе акациялъул цӀулал ва гьезда тӀад месед бекье. Гьел хӀубазда рай меседалъул гьарурал гъунцӀби ва хӀубазе гӀарцул гъоркьчӀелал лъе, меседил гъунцӀбузда гьеб хасаб пардавги бай. 33Гьеб пардавалда нахъа лъе КъотӀиялъул гъамас. Гьеб пардавалъ батӀа тӀезабизе буго Бищунго Мукъадасаб бакӀ. 34Бищунго Мукъадасаб бакӀалда лъураб КъотӀиялъул гъамасалда тӀалъел лъе. 35Пардавалдаса къватӀибехун рахъалда, гьелда цебе лъе стол, столалда дандбитӀун лъе нахучирахъ. Стол шималияб рахъалдехун лъезе ккола, нахучирахъин абуни – къилбаялъул рахъалдехун.

36Чадиралъул кӀалтӀуялда базеги тӀеренаб хӀебтил, канчӀхъахӀилабги, бецӀбагӀарабги, канчӀбагӀарабги квасул куназдалъун бессараб чараб пардав гьабе. 37Гьеб пардавалъеги акациялъул цӀулал, месед тӀад бекьараб ва меседил гъунцӀбиги ругеб щуго хӀуби гьабе. Гьел хӀубазе мазгарул биун тӀураб щуго гъоркьчӀелги гьабе.

Currently Selected:

Тархъанлъи 26: АварАК

Highlight

Copy