Тархъанлъи 16
16
Манна ва чӀоролаби
1ГӀизраилалъул халкъ Элималдасаги ана ва Элималдаги Синаялдаги гьоркьоб бугеб Син абулеб салул авлахъалде щвана. Гьеб букӀана Мисриялдаса къватӀире гӀизраилал рахъун хадусеб кӀиабилеб моцӀалъул анцӀила щуабилеб къо. 2Гьеб авлахъалда рукӀаго гӀизраилал нахъеги Мусадеги Гьарунидеги гӀайибал гӀунтӀизарун къулкъудана. 3ГӀизраилаз гьезда абулеб букӀана:
«БЕТӀЕРГЬАНАСУЛ квердасан Мисриялдаго хвезе лъикӀаб букӀана нижее! Доба нижее хьагал цӀун белъизе гьанги гӀорцӀизегӀан кваназе чедги букӀана. Нужецайин абуни, тӀолабго халкъ бакъуца хвезабизе, ниж бакъвараб авлахъалде рачана».
4Гьебмехалъ БЕТӀЕРГЬАНАС Мусада абуна: «Дица зодиса гъоркье нужеда тӀаде цӀадлъун чвахизабизе буго чед. Биччанте халкъалъ, щибаб къоялъ авлахъалдеги ун, жидеего цо къоялъе гӀураб чед бакӀаризе. Гьедин Дица хӀалбихьизе буго гьезул, гьел Дир къануназда нахърилълъунищали балагьизе.
5Анлъабилеб къоялъ, рузман къоялъ, цоги къояз бакӀарулелда данде ккун, биччанте гьез кӀиго нухалъ цӀикӀкӀун бакӀаризе гьеб».
6Мусацаги Гьаруницаги тӀолалго гӀизраилазда абуна: «Къаси нужеда лъазе буго нуж БЕТӀЕРГЬАНАС рачун рукӀин Мисриялдаса къватӀире.
7Метер радал нужеда бихьила БЕТӀЕРГЬАНАСУЛ хӀалкӀолъи, щайгурелъул БЕТӀЕРГЬАНАСДА рагӀана нужер Гьесдехун бугеб рази гьечӀолъи. Нижгун дагӀбадизе ккани, ниж щал чагӀи?»
8Хадубги Мусаца абуна:
«Къаси БЕТӀЕРГЬАНАС гьан кьезе буго нужее кваназе, радал гӀорцӀизегӀан чед кьезе буго. Гьесда рагӀун бугелъул нужер Гьесдехун бугеб рази гьечӀолъи. Нижер бицани, щал ниж кколел? Нижеда гӀайибал чӀвалел чагӀи гуро нуж, БЕТӀЕРГЬАНАСДА гӀайибал чӀвалел чагӀи руго!»
9Цинги Мусаца Гьарунида абуна:
«ГӀизраилазул жамагӀаталда абе: „БЕТӀЕРГЬАНАСДА цере чӀезе рахъа, Гьесда нужер рази гьечӀолъи рагӀун бугелъул“».
10Гьарун ГӀизраилил халкъгун кӀалъалеб мехалъ, гьел авлахъалдехун ралагьана, ва гьезие загьирлъана накӀкӀул парчадулъ чӀараб БЕТӀЕРГЬАНАСУЛ нур ва Гьесул къудрат.
11Гьебмехалъ БЕТӀЕРГЬАН кӀалъана Мусада:
12«Дида рагӀана гӀизраилазул гӀарзал. Гьезда абе: „МаркӀачӀул гӀужалда нужеца гьан кваназе буго, рогьалил гӀужалъ нужер чахьал чадица гӀорцӀизе руго. Гьебмехалда лъазе буго нужеда нужер БЕТӀЕРГЬАН Аллагь Дун вукӀин“».
13Гьебго къоялъул маркӀачӀул гӀужалъ роржун рачӀана чӀоролаби ва гьез цӀезабуна тӀолабго гьезул къайи чӀвараб бакӀ. Рогьалидейин абуни, сверухълъиго щубица бахчун батана. 14Щуб тӀаса араб мехалда авлахъалъул гьумералда загьирлъана гӀисинаб, крупаялда релълъараб жо. 15Гьеб бихьидал, гӀизраилаз цоцазда цӀехолеб букӀана:
«Гьаб щиб?» – ин.
Гьезда лъалеб букӀинчӀо гьеб киса-щиб жо кколебали. Мусаца гьезда абуна: «Гьеб буго нужее БЕТӀЕРГЬАНАС кьураб чед.
16БЕТӀЕРГЬАНАС амру гьабуна: „Биччанте щивав чияс гьеб бакӀаризе жиндиего гӀураб къадаралда. Хъизаналъул щивав чи рикӀкӀун цо-цо омер#16:16 Омер – 2,2 литра. бакӀаре“».
17Гьедин гьабуна гӀизраилаз. Цояз цӀикӀкӀун, цояз дагь бакӀарана, 18амма гьез омералдалъун гьеб борцараб мехалда, гӀемер бакӀараразул тӀокӀлъиги дагьаб бакӀараразул камиги батичӀо; щивас бакӀарун батана битӀун гьесул хъизамалъе гӀураб къадар.
19Мусаца гьезда лъазабуна:
«Метералде гьелъул лъицаниги щибниги жо нахъе тоге», – ян.
20Амма гьел Мусахъ гӀенеккичӀо, ва гьез цо-цо бутӀа радалалде нахъе тана – гьелда хӀапара бана, квешаб махӀги бахъана. Гьелъ Мусал цӀакъ ццин бахъана гьезда.
21Радалго вахъун щивас бакӀарулаан жиндие хӀажалъулеб къадар; гӀодоб хутӀараб, бакъул хинлъи чӀвайдал, биун тӀагӀунаан. 22Анлъабилеб къоялъ, рузман къоялъ, гьез бакӀарана кӀиго нухалъ цӀикӀкӀун – цо чи рикӀкӀун кӀиго омер. Халкъалъул церехъаби рачӀана Мусахъе ва гьеб гьесда бицана.
23Гьес гьезда абуна:
«Гьединин БЕТӀЕРГЬАНАС лъазабун букӀараб: метер буго хӀалхьиялъул къо, БЕТӀЕРГЬАНАСУЛ хирияб шаматкъо#16:23 Шамат – жугьутӀазул мацӀалда, «Шаббат». Гьеб рагӀул магӀна ккола «хӀалхьи гьабизе» ялъуни «лъалхъизе» абураб.. Жакъа нужеего бокьараб беже, бокьараб белъе, хутӀарабин абуни, нахъе лъе метер радаллъизегӀан».
24Мусаца абураб къагӀидаялъ гьез хутӀараб нахъе цӀунана хадусеб къо щвезегӀан, амма гьаб нухалда гьелда хӀапара бачӀо, махӀги бахъинчӀо.
25«Жакъа гьеб кванай, – ин абуна Мусаца, – щайгурелъул жакъа буго БЕТӀЕРГЬАНАСУЛ шаматкъо. Жакъа нужеда авлахъалда щибго батизе гьечӀо. 26Нужеца гьеб бакӀаризе буго анлъго къоялъ, амма анкьабилеб къоялъ – шаматкъоялъ – авлахъалда нужеда щибго батизе гьечӀо».
27Халкъалда гьоркьоса цо-цоял анкьабилеб къоялъги гьеб бакӀаризе къватӀире рахъана, амма гьезда щибго батичӀо. 28БЕТӀЕРГЬАНАС Мусада абуна: «КидаллъизегӀан нуж Дир амрабазухъги Дир къануназухъги гӀенеккиларел?
29Нужеда лъан букӀа: БЕТӀЕРГЬАНАС нужее кьун буго шаматкъо, гьединлъидал анлъабилеб къоялъ Гьес нужее кьолеб буго кӀиго къоялъе гӀураб чед. Анкьабилеб къоялъ щивав чи жиндирго рокъов чӀезе ккола, кивениги къватӀиве вахъинчӀого».
30Анкьабилеб къоялъ халкъ хӀалхьиялда чӀана.
31ГӀизраилалъул халкъалъ гьеб кванда цӀар тана «манна» абун. Гьеб букӀана гъаранхералъул хьоналда релълъараб, хъахӀаб кьералъул, гьацӀул бакарабазул гӀадаб тӀагӀам бугеб нигӀмат. 32Мусаца абуна:
«Гьадинаб буго БЕТӀЕРГЬАНАСУЛ амру: „Маннаялъул цо омер босе ва гьеб нахъе цӀунун те хадусел гӀелазе – Мисриялдаса къватӀире рачараб мехалда авлахъалда Дица нужее кваназе кьолеб букӀараб чед гьезда бихьун букӀине“».
33Цинги Мусаца Гьарунида абуна:
«Хъабаги босун, гьенибе жанибе маннаялъул цо омер бай. Хадусел гӀелазе цӀунун букӀинелъун, гьеб БЕТӀЕРГЬАНАСДА цебе лъе».
34Мусадасан загьирлъараб БЕТӀЕРГЬАНАСУЛ амруялда рекъон, маннаялъул цӀураб хъаба КъотӀиялъул гъансида цебе лъуна Гьаруница. 35Гьезие хъвараб Ханааналъул ракьалъул гӀорхъабазде щвезегӀан, гӀизраилаз кӀикъого соналъ манна кваналеб букӀана.
36(Омер ккола ефаялъул#16:36 Ефа – 22 литра. анцӀго бутӀа гьабун цо бутӀа.)
Currently Selected:
Тархъанлъи 16: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023