Тархъанлъи 15

Мусалги Марямилги кечӀ

1Гьебмехалъ Мусацаги ГӀизраилил халкъалъги БЕТӀЕРГЬАНАСЕ реццалъул кечӀ ахӀана:

«БЕТӀЕРГЬАНАСЕ ахӀила дица дирго кечӀ –

Гьесул хӀалкӀолъи, Гьесул тӀадегӀанлъи!

Чуги чотӀахъанги

ралъдалъе рехана Гьес.

2БЕТӀЕРГЬАН – Гьес кьола дие къуват, Гьесие ахӀила кечӀ;

Гьесдасан буго хвасарлъи!

Гьев – дир Аллагь, Гьесие рецц гьабила!

Дир инсулги Аллагь! Дица кӀодо гьавила Гьев!

3БЕТӀЕРГЬАН – гучав рагъухъанги Гьев;

БЕТӀЕРГЬАН – гьеле Гьесул цӀар!

4ПиргӀавнасул чолгьакалги, гьесул аскарги

ралъдалъе рана Гьес,

мисриязул бищун лебалал рагъухъаби

БагӀараб ралъдалъ гъанкъана.

5Ралъдал карачелал гьулчана гьезда тӀаде,

ва тӀину гьечӀеб кӀкӀалахъ гамачӀ кинигин рилана гьел.

6Дур кваранаб квер, БЕТӀЕРГЬАН,

къуват-гучалъул цӀураб;

Дур кваранаб квералъ, БЕТӀЕРГЬАН,

тушман щущахъ виххизавуна.

7Дурго къудраталъул хӀалкӀолъиялъ

Дуца къезаруна Дудаго данде рахъарал.

Дур ццин гьалаглъана –

гьелъ гьел сумало кинигин къулчӀана.

8Дуца лъадада тӀаде пуна –

лъим квачӀид бахъана,

лъим къедлъун эхетана,

ралъдал тӀину къвакӀана.

9Тушман чӀухӀун кӀалъалев вукӀана:

„Хадур лъугьина, гьел кквела.

Давла бикьа-къотӀила,

гьелдаса кеп босила.

Дирго яргъидалъун

гьезул бугебщинаб бахъила!“ – ян

10Амма Дурго хӀухьел пуна Дуца

ва ралъад гьезда тӀаде бегана.

Къуватал карачелазулъ тӀерхьана гьел,

тӀухьи кинигин.

11Дуда ващадав цоги гьечӀо аллагьзабазда гьоркьов, БЕТӀЕРГЬАН!

Мун гӀадав тӀокӀав гьечӀо –

МунгӀан Хирияв, МунгӀан ТӀадегӀанав!

Мун – реццалъе мустахӀикъав,

мугӀжизатал гьарулев!

12Дуца кваранаб квер хьвагӀана –

дол ракьулъе тӀерхьана!

13Дурго свин гьечӀеб рахӀмуялдалъун

Дуца цебе бачина Дуцаго хвасар гьабураб халкъ.

Дурго къудраталдалъун Дуца гьеб бачина

Дурго Мукъадасаб бакӀалде.

14Халкъазда гьеб кинабго рагӀила ва гьел сородила;

хӀинкъиялъ кодор росила Пилистималъул гӀадамал.

15Эдомалъул кӀудиял сородила,

МогӀавалъул церехъабазда гъаргъар бала,

Ханааналъул гӀадамал хӀинкъиялъ тамахлъун ккела.

16ХӀинкъиялъги чарахвеялъги кодор росила гьел,

Дур къуват бихьидал чӀаралъурго ганчӀиде сверила,

Дур халкъ аскӀосан ун лъугӀизегӀан, дир БЕТӀЕРГЬАН –

Дуца Дуего тӀаса бищараб халкъ!

17Дуца Дур халкъ Хирияб магӀарде бачина,

гьениб, Дуего рукълъун тӀаса бищараб бакӀалда,

я дир БЕТӀЕРГЬАН,

Дуцаго кьучӀ лъураб Мукъадасаб бакӀалда

гьел чӀезе рукӀине,

дир БетӀергьан!

18БЕТӀЕРГЬАН вукӀина Пачалъун абадул абадиялъего!»

19ПиргӀавнасул чуялгун чолгьакал ва чотӀахъаби ралъдалъе лъугьараб мехалда, БЕТӀЕРГЬАНАС гьезда тӀаде риччана ралъдал карачелал. ГӀизраилил халкъин абуни, ралъад къотӀун ана ракъдадасан гӀадин. 20Гьарунил яц Марям аварагалъ жергъен кодобе босана, ва тӀолалго руччабиги, кодор жергъабиги ккун, гьелда хадур рилълъун кьурдизе лъугьана. 21Марямицаги кечӀ ахӀана:

«БЕТӀЕРГЬАНАСЕ кечӀ ахӀе –

Гьесул хӀалкӀолъи, Гьесул тӀадегӀанлъи!

Чуги чотӀахъанги

ралъдалъе рехана Гьес!» – иланги абун.

Мараялъул ва Элималъул лъим

22Мусаца ГӀизраилил халкъ бачана БагӀараб ралъдал рагӀалалдаса Шур абураб салул авлахъалде. Лъабго къо бана гьез авлахъалда хьвадулел, кибго лъимги батуларого. 23Мара абулеб бакӀалде щвана гьел, амма гьенибги лъим гьекъезе кӀолеб букӀинчӀо, щайгурелъул гьеб кьогӀаб букӀун. (Гьеле гьединлъидалин гьеб бакӀалда цӀарги Мара#15:23 Мара – жугьутӀазул мацӀалда гьеб рагӀул магӀна буго «кьогӀаб» абураб. абун лъураб.) 24Нахъеги Мусадаса рази гьечӀого лъугьана халкъ:

«Нижеца щиб гьекъезе бугеб?» – абун къулкъудана гьел.

25Цинги Мусаца БЕТӀЕРГЬАНАСДЕ ахӀи бана, ва БЕТӀЕРГЬАНАС гьесда гъветӀ бихьизабуна. Мусаца гьелъул гӀаркьел лъадалъе рехана ва лъим гьуинаблъун лъугьана.

Гьеб бакӀалда БЕТӀЕРГЬАНАС гьезул божиялъул хӀалбихьана ва гьезие къануналги ахӀкамалги кьуна.

26Гьес абуна:

«Нужер БЕТӀЕРГЬАН Аллагьасул рагӀухъ нуж кӀваркьун гӀенеккани ва Гьесие бокьараб гьабуни, нужеца Гьесул буюрухъал тӀуразарулел ругони ва Гьесул амрабазда рекъон гӀумру гьабуни, Дица нужеда тӀаде биччазе гьечӀо мисриязде риччарал унтабазул цонигияб. Дун нуж сах гьарулев БЕТӀЕРГЬАН вуго».

27Гьениса гьел ана Элималде. Гьениб букӀана анцӀила кӀиго иццги лъабкъоялда анцӀго чамасдакил гъветӀги. Гьел иццазда аскӀор лъалхъана гӀизраилал.

Currently Selected:

Тархъанлъи 15: АварАК

Highlight

Copy