Тархъанлъи 13

1БЕТӀЕРГЬАНАС Мусада абуна:

2«ГӀизраилазе гьабураб щибаб тӀоцебесеб бихьинлъимер Дие батӀа гьабе: инсанасул лъимер букӀа, боцӀул тӀинчӀ букӀа – эбелалъул тӀоцебесеб рижи».

Бугьурго Чадазул байрам

3Мусаца халкъалда абуна: «Нужеда кидаго ракӀалда букӀа нуж Мисриялдаса – лагълъиялъул ракьалдаса – къватӀире рачараб къо; Жиндирго щулияб квералдалъун рачана нуж БЕТӀЕРГЬАНАС гьениса къватӀире – гьеб къоялъ нужеца кванаге реччеб жубараб чед.

4Жакъа, Авив моцӀалда, нужеца гьаб ракь толеб буго. 5Нужер умумузе БЕТӀЕРГЬАНАС гьа бан букӀана ханааниязул, хитиязул, амориязул, евусиязул ва хивиязул ракь – рахьги гьоцӀоги чвахулеб ракь – нужее кьелилан. Дос рачун нуж гьенире щвараб мехалда, гьадинаб гӀадат цӀуне Авив моцӀалъ: 6анкьго къоялъ кванай реччеб гъорлъ гьечӀеб чед; анкьабилеб къоялъ БЕТӀЕРГЬАНАСЕ байрам гьабе. 7ПалхӀасил, анкьго къоялъ кваназе ккола реччеб жубачӀеб чед. Нужер къавулъ щибниги реччеб лъураб жо букӀине бегьуларо; нуж чӀараб бакӀалдаги букӀине бегьуларо реччебалъул къатӀрацин. 8Гьеб къоялъ щивас жиндирго лъималазда абизе ккола: „Дица гьадин гьабулеб буго Мисриялдаса нахъе унелъул БЕТӀЕРГЬАНАС дие гьабурабщиналъе гӀоло“, – ян. 9Гьаб гӀадат нужее букӀина квералда лъураб гӀужлъун ва нодоялда хъвараб ракӀалдещвеялъул гӀаламатлъун – БЕТӀЕРГЬАНАСУЛ Къанун кидаго нужер мацӀалда букӀиналъе гӀоло. БЕТӀЕРГЬАНАСУЛ къуватаб квералдалъунлъидал нуж Мисриялдаса къватӀире рачарал. 10Гьаб гӀадат тӀубазабе щибаб соналъ, гьелъие бихьизабураб заманалда.

ТӀоцере гьарурал лъималазул хӀакъалъулъ амру

11БЕТӀЕРГЬАНАС нужее ва нужер умумузе гьа бан букӀараб къагӀидаялъ нуж ханааниязул ракьалдеги рачун, гьеб нужее кьун хадуса, 12БЕТӀЕРГЬАНАСЕ батӀа гьабе щибаб тӀоцебесеб бихьинлъимер. Гьединго нужер боцӀул щибаб тӀоцебесеб бихьинтӀинчӀги БЕТӀЕРГЬАНАСУЛ ккола. 13ТӀоцебе гьабураб кӀартихъ хисун кьегӀер кье, хисизе бокьичӀони, кӀерт габур кьурун хвезабе. Щивав нужер тӀоцеве гьавурав васасухъ хӀакъ кьезе ккола.

14Хадубккун дур наслуялъ: „Гьелъул магӀна щиб?“ – абун цӀехани, гьезда абе: „БЕТӀЕРГЬАНАС Жиндирго къуваталдалъун нилъ Мисриялдаса – лагълъиялъул ракьалдаса – къватӀире рачана. 15ПиргӀавн тӀирун чӀана, нилъ нахъе риччазе бокьичӀого; гьединлъидал, Мисриялда гьабунщинаб инсанасулги хӀайваналъулги тӀоцебесеб рижи хвезабуна БЕТӀЕРГЬАНАС. Гьеле гьединлъидалин щибаб хӀайваналъул тӀоцебесеб тӀинчӀ дица БЕТӀЕРГЬАНАСЕ къурбаналъе кьолеб; нилъер тӀоцере гьарурал васазухъин абуни, хӀакъ кьола“. 16Гьеб букӀине ккола дур кверда лъураб гӀуж гӀадин ва дур надалда бухьараб чалма гӀадин, Жиндирго Къуваталдалъун БЕТӀЕРГЬАНАС нилъ Мисриялдаса къватӀире рачиналъул жинца бицунеб нугӀлъун».

Аллагьас Жиндирго халкъ нухда бачин

17ПиргӀавнас халкъ нахъе биччараб мехалда, Аллагьас гьеб бачинчӀо пилистимазул ракьалдасан, кигӀанго гьенисан нух къокъаб букӀаниги. Аллагьас пикру гьабуна:

«Гьел нухда рагъизе ккани, гьезул пикру хисизе бегьула ва гьел Мисриялде тӀадруссине бегьула», – ян.

18Аллагьас халкъ бачана халатаб авлахъалъул нухккун, БагӀараб ралъдахъе#13:18 БагӀараб ралъад – ялъуни «МуцӀидул ралъад». Гьединго бал. Тархъ. 14:9, 16, 21, 30; 3 Пач. 9:26. балагьун. ГӀизраилал Мисриялдаса къватӀире рахъана рагъде къачӀарал аскарал кинигин. 19Мусаца Юсупил жаназаги цадахъ босана, щайгурелъул Юсупица гӀизраилал гьедизарун рукӀана:

«Аллагь чара гьечӀого нужее кумекалъе вахъине вуго. Гьеб мехалда дир жаназаги гьаниса нахъе босе нужедаго цадахъ», – иланги абун.

20Суккоталдаса рахъун, салул авлахъалда аскӀоб бугеб Этамалде щвана гӀизраилал ва гьенир лъалхъана. 21Къад хӀубилъун эхетараб накӀкӀул парчадулъ гьезда цеве, гьезие нухги бихьизабулаго, унаан БЕТӀЕРГЬАН; къаси, гьезие канлъи букӀине, Гьев цӀадул парчадул хӀубиялъулъ вукӀунаан. Гьединлъидал къасиги къадги ине рес букӀана гьезие. 22Къад накӀкӀул хӀуби, къаси цӀадул хӀуби – кӀиябго цониги нухалъ халкъалдаса батӀалъичӀо.

Currently Selected:

Тархъанлъи 13: АварАК

Highlight

Copy