Эстер 9
9
Ягьудиязул бергьенлъи
1АнцӀила кӀиабилеб моцӀрол, ай, адар моцӀрол, анцӀила лъабалилеб къо – парччахӀасул буюрухъ тӀубазе чӀезабураб къо тӀаде щведал, ягьудиял рихаразул, гьел гъурун тӀагӀинаризе букӀараб къасд гӀаксалда ккана ва ягьудияз гьезда тӀад бергьенлъи босана. 2ПарччахӀ Ахашверошил тӀолалго вилаятазул щибаб шагьаралда данделъана ягьудиял, жинда данде квешлъи гьабизе къачӀаразда тӀаде кӀанцӀизе. Амма лъидаго кӀвечӀо ягьудиязда данде рахъине, щайин абуни, киналго халкъал гьездаса хӀинкъидал. 3ТӀолалго вилаятазул чӀухӀбуз, сардараз ва парччахӀасул вазирзабаз, Мардохайикьа хӀинкъиялъ, ягьудиязул рахъ ккуна. 4ПарччахӀасул кӀалгӀаялда Мардохайил къадру цӀикӀкӀиндал, гьесул цӀар тӀолалго вилаятазда машгьурлъана. Гьесул къуват къоялдаса къоялде жеги цӀикӀкӀунеб букӀана.
5Ягьудиязин абуни киналго тушбаби гъурана, хвалчаца къотӀана, ва чӀван тӀагӀинаруна – жидеего бокьараб гьабуна гьез тушбабазе. 6Шушаналъул хъалаялда ягьудияз чӀвана ва гъурун тӀагӀинавуна щунусго чи. 7Гьенир чӀвана Паршандад, Далфон, Аспатав, 8Поратав, Адальят, Аридад, 9Пармаштад, Арисав, Аридав ва Вайзатад – 10анцӀалго ягьудиязул тушман Гьаммедатил вас Гьаманил васал. Амма гьезул боцӀи-рикъзиялде квер бегьичӀо ягьудияз.
11Гьебго къоялъ парччахӀасда лъазабуна Шушан хъалаялда чӀваразул къадар. 12«Шушан шагьаралъул хъалаялда ягьудияз щунусго чиги, Гьаманил анцӀго васги чӀван вуго. Цогидал парччахӀасул ракьазда щибдай гьез гьабураб? Цоги щиб бугеб дур рекӀел мурад? Кинабго тӀубазабила. Кинаб бугеб дур гьари? Щиб бокьаниги къабул гьабила», – ян кӀалъана парччахӀ Эстерида.
13«ПарччахӀасе къабуллъани, биччанте жакъаго гӀадинаб амру метерги тӀубазе ягьудияз Шушаналда, Гьаманил анцӀалго васалги хӀобода рай абе», – ян кӀалъана Эстер.
14ПарччахӀас гьедин тӀубазабеян буюрухъ кьуна, Гьаманил васазул къаркъалабиги хӀобода рана. 15Шушаналдаса ягьудиял нахъеги данделъана – адар моцӀрол анцӀила ункъабилеб къоялъ – ва жеги лъабнусго чи чӀвана Шушаналда, амма гьезул боцӀи-рикъзиялде квер бегьичӀо.
16Гьединго цогидал парччахӀасул ракьаздаги ягьудиял данделъана жалго цӀунизе ва тушбабаздаса жалго хвасар гьаризе, ва лъабкъоялда анцӀила щуазарго тушман чӀвана, амма гьезул боцӀи-рикъзиялде квер бегьичӀо. 17Гьеб ккана адар моцӀрол анцӀила лъабабилеб къоялъ, анцӀила ункъабилеб къоялъин абуни гьел парахалъана ва гьеб къо букӀана рохалил, сухӀмат-кепалъул къо.
18Шушан шагьаралда ругел ягьудиял анцӀила лъабабилеб къоялъги, анцӀила ункъабилеб къоялъги данделъана ва анцӀила щуабилеб къоялъ парахалъана – гьеб къо букӀана рохалил ва сухӀмат-кепалъул къо. 19Гьединлъидалин росабалъ, сверун къачӀел шагьаразда гӀумру гьабун чӀарал ягьудияз, адар моцӀрол анцӀила ункъабилеб къоялъ, байрамкъоялъ гӀадин, сухӀмат ва квана-гьекъей гьабулеб, цоцае квен-тӀехалъул сайгъаталги ритӀулел.
Пурим байрам
20Гьеб киналъулго хъвай-хъвагӀай гьабуна Мардохайица ва гьеб тӀад хъварал кагътал ритӀана парччахӀ Ахашверошил киналго вилаятазде, тӀолалго ягьудиязухъе, гӀагарав-чиярав батӀа гьавичӀого. 21Гьениб хъван букӀана, щибаб соналъ адар моцӀрол анцӀила лъабабилеб ва анцӀила ункъабилеб къо байрамкъояллъун чӀезареян, 22гьел къояз ягьудиял тушбабаздаса хвасарлъун рукӀиндал, ва гьеб моцӀалъ гьезул къварилъи рохалиде ва магӀу сухӀматалде сверидал – гьел къоял квана-гьекъеялъул ва байрамалъул къояллъун чӀезареян ва цоцае сайигъатал кьеян ва мискиназе садакъаги бикьеян.
23Гьелдаса нахъе, Мардохайица гьеб къоялъ аманат гьабурабщинаб жо, ягьудиязул гӀадатлъун лъугьана. 24АгагӀияв Гьаммедатил вас, киналго ягьудиязул тушман Гьаманица, ягьудиял чӀвазе къваригӀун, рехана «пур», ай, можоро, гьел гъуриялъе ва тӀагӀинариялъе гӀоло. 25Амма Эстер парччахӀасухъе ячӀиндал, гьес буюрухъ кьуна ва Гьаманица ягьудиязда данде ургъараб гӀасияб макру гьесде жиндего тӀаде буссана. Гьаман ва гьесул васал хӀободаги ран чӀвана. 26Гьединлъидал гьел къоязда «Пурим» абула, «пур» абураб рагӀудасан.
Гьеб кагътида хъварабщиналъул, гьезда жидедаго бихьаралъул ва гьел киналго лъугьа-бахъиназул хӀасилалда, 27ягьудияз хӀукму къотӀана жидеего, жидерго рукӀинесел гӀелазе ва киналго гьезул диналде руссарал чагӀазе хисулареб гӀадат чӀезабуна: гьеб хъвай-хъвагӀаялда ва гьабураб хӀукмуялда рекъон, гьелъие бихьизабураб къагӀидаялда ва заманалда, лъагӀалидаса лъагӀалиде гьеб кӀиябго къо тӀобитӀизе. 28Гьел къоял ракӀалде щвезе ва тӀоритӀизе ккола щибаб гӀелалъ, щибаб хъизан-къаялъ, щибаб вилаяталда ва щибаб шагьаралда. Гьел Пурималъул къоял кидаго я хисизе, я кӀочене бегьуларо ягьудиязда ва гьезул наслабазда.
29Абихалилил яс Эстер бикаца ва ягьудияв Мардохайица, тӀолабго жидерго кверщелалдалъун ва хъвай-хъвагӀаялдалъун тасдикъ гьабуна гьеб Пурим-байрамалъул хӀакъалъулъ хъвараб кӀиабилеб кагъат. 30Ва Ахашверошил улкаялъул нусиялда къоло анкьго вилаятазул ягьудиязде битӀана гьеб саламалъул кагъат – 31Пурим байрам, ягьудияв Мардохайица ва Эстер бикаца малъухъе, гьелъие бихьизабураб заманалда, жалго ягьудияз дол магӀил ва кӀалкквеялъул къояз, жидеего ва жидерго наслабазе чӀезабураб къагӀидаялъ тӀобитӀеян. 32Эстерил буюрухъалдалъун тасдикъ гьабуна Пурим-байрам ва гьелъул хъвай-хъвагӀайги гьабуна.
Currently Selected:
Эстер 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
