Эстер 2

Эстер бикалъун яхъин

1Пуланаб заман ун хадуб парччахӀ Ахашверошил ццин чучана ва гьесда ракӀалде щвана Вашти, гьелъ гьабураб жо ва гьелъие гьабураб тамихӀ. 2Гьебмехалда чукъбуз абуна парччахӀасда: «Риччанте берцинал гӀолохъанал ясал ралагьизе парччахӀасе. 3Жиндирго божарал чагӀи ритӀе абе парччахӀас парччахӀлъиялъул тӀолалго вилаятазде, киналго берцинал ясал Шушан хъалаялде парччахӀасул руччабазул рокъоре ракӀаризе. ПарччахӀасул ахта ва гьесул руччабазул тадбирчи Хегайида тӀадкъазе биччай гьезул тӀалаб гьабизе ва махӀ гьуинал нахалги кье абе гьезие черхалда рахине. 4Биччанте парччахӀасул берда бищун берцин йихьарай яс Ваштил бакӀалда бикалъун тезе». Гьеб рагӀи парччахӀасе рекӀее гӀуна ва гьедин гьабизеги разилъана гьев.

5Доб заманалда Шушан шагьаралъул хъалаялда вукӀана Мардохай абун цӀар бугев ягьудияв. Гьесул инсуда цӀар Яир, Яирил инсуда цӀар Шими, Шимил инсуда цӀар Киша букӀана ва гьевги вукӀана Буняминил кьибилалъул чи. 6Цо кидаялиго Вавилоналъул парччахӀ Навуходоносорица Иерусалималдаса гочинавун вукӀана гьев Ягьудиялъул парччахӀ Иехониягьида цадахъ асир гьабураб халкъгун. 7Мардохайица хьихьулей йикӀана жиндирго бесдал хутӀарай яцгӀал Хадасса, гьейги – Эстер. Гьей йикӀана берцинай, гьайбатаб лага-черхалъул яс. Гьелъул эбел-эмен хун хадуб Мардохайица жиндирго ясалъул бакӀалда тун хьихьана гьей.

8Гьеб парччахӀасул аманат къватӀибе загьир гьабун хадуб, гӀемерал ясал ракӀарун Шушан хъалаялде щвезаруна ва гьел Гьегайида тӀадкъана. Эстерги ячана парччахӀасул кӀалгӀаялде Гьегайихъе, гьев вукӀиндал руччабазул рукъалъул тадбирчи. 9Гьей яс рекӀее гӀуна Гьегайие ва гьесул ракӀ рекъана гьелда; гьес хехлъи гьабун гьелъие чӀезаруна махӀ берцинал нахалги ва гьелъие кколеб квен-тӀехги. Гьес гьелда аскӀор рахъун чӀезаруна парччахӀасул рокъоса тӀаса рищарал анкьго гъаравашал ва гьелгун цадахъ руччабазул рокъоб бищун лъикӀаб бакӀалде яхъинаюна.

10Эстерица гьезда бицинчӀо, я жиндирго халкъалъул, я гӀагарлъиялъул, щайгурелъул Мардохайица гьеб бицунгеян лъазабун букӀиндал. 11Щибаб къоялъ вачӀунаан Мардохай руччабазул рукъалда цеве, Эстерил сахлъи цӀехезе ва гьелъул ахӀвал-хӀал лъазабизе.

12Щияй яс анцӀила кӀиго моцӀалъ хӀадуризе кколаан, руччабазе бихьизабураб къагӀидаялда, парччахӀ Ахашверошихъе ине жинде ирга щвезегӀан. Гьеб букӀана нах бахун черх лъухьизе чӀезабураб заман: анлъго моцӀалъ кутакалда хирияб мирралъул нах бахунаан, цоги анлъго моцӀалъ батӀи-батӀиял махӀ гьуинал нахал рахунаан. 13Хадуй яс унаан парччахӀасда аскӀое. Гьей парччахӀасул кӀалгӀаялъуе гьесда цее ине къачӀалаго, гьелъ гьарараб бокьараб жо тӀаса бищун кьолаан гьей ясалъе. 14Къаси гьей парччахӀасда аскӀое унаан, нахъисеб къоялъул радал цогидаб, ахта Шаашгазил тадбиралда гъоркь бугеб парччахӀасул лъудбузул рокъое юссунаан. Шаашгаз вукӀана гьезул тадбирчи. ТӀокӀай гьей парччахӀасухъе унароан – парччахӀасе жиндиего бокьун гьес цӀар ахӀун гурони.

15Мардохайица жиндирго яс гӀадин хьихьарай гьесул яцгӀал, Абихалилил яс Эстериде парччахӀасухъе ине ирга щведал, гьелъ ясазул тадбирчи Гьегайица малъараб жо тун, тӀокӀаб щибго тӀалаб гьабичӀо. Эстер йихьаралщиназе рекӀее гӀолей йикӀана.

16ПарччахӀ Ахашверошил кӀалгӀаялде Эстер ячана ичӀабилеб моцӀалъ, гьеб ккола тевет#2:16 ГӀага-шагарго декабрь-январь моцӀ. моцӀ. Гьеб букӀана Ахашверош парччахӀлъун вахъун анкьабилеб сон. 17ПарччахӀасе тӀолалго гьесул лъудбуздаса Эстер хиралъана; киналго ясазда гьоркьобги бищунго гьелда ракӀ рекъана гьесул. Гьес гьелъул ботӀрода парччахӀлъиялъул таж лъуна ва Ваштил бакӀалда бикалъун гьаюна. 18Хадуб парччахӀас, Эстер кӀодо гьаюн, тӀолалго жиндирго чӀухӀбузе ва чукъбузе гьабуна кӀудияб сухӀмат; щибаб вилаят рази гьабуна ва сахаватго парччахӀасул рахъалъ сайигъатал рикьана.

Мардохайил ритӀухълъи

19КӀиабилеб нухалъ ясал данде ахӀулаго, Мардохай вукӀана гӀодов чӀун парччахӀасул кавабахъ. 20Эстерица бицун букӀинчӀо жеги жиндирго халкъалъул ва гӀагарлъиялъул, щайин абуни Мардохайица гьедин лъазабун букӀиндал гьелда. Мардохайица малъараб гьабулеб букӀана Эстерица гьанжеги, гьесул рокъой гьес хьихьун жий йикӀараб мехалъго гӀадин.

21Цо пуланаб къоялъ парччахӀасул кавабахъ Мардохай гӀодов чӀун вукӀаго, парччахӀасул кавудал хъаравулзабилъун тарал кӀиго ахтаби – Бигътан ва Тереш кутакалда ццидахун рукӀана ва парччахӀ чӀвазе гъоркьанго къотӀи гьабуна. 22Мардохайида лъана гьеб иш ва парччахӀ Эстерида бицана, Эстерицайин абуни парччахӀасда лъазабуна гьеб Мардохайил цӀаралдасан. 23Гьеб ишалъул мухӀканго хал-шал гьабуна, хӀилла-рекӀкӀ тӀатана ва хиянатчагӀи хӀободаги ран чӀвана. Гьеб кинабго парччахӀасда цебе гьесул къойил лъугьа-бахъиназул тӀад хъвай-хъвагӀай гьабулеб, парччахӀлъиялъул тарихалъул тӀехьалда хъвана.

Currently Selected:

Эстер 2: АварАК

Highlight

Copy