Къанун 20

Рагъ гьабиялъул къагӀидаби

1Тушбабигун рагъ ккани ва нужеда бихьани гьезул нужедаса гӀемер цӀикӀкӀарал чуялги, чолгьакалги, рагъухъабиги рукӀин, нуж гьезукьа хӀинкъуге, щайгурелъул нуж Мисриялдаса къватӀире рачарав БЕТӀЕРГЬАН Аллагь вукӀине вугелъул нужеда цадахъ. 2Биччанте рагъ байбихьилалде, рагъухъабазда цевеги вахъун, кашиш кӀалъазе. 3Гьес абизе биччай: ‘ГӀизраилил халкъ, гӀенекке! Нуж жакъа тушбабигун рагъизе руго. Нуж къвакӀун чӀа, гьезукьа хӀинкъуге, нахъе къаге ва гьезда цебе ракӀ тӀуркӀизе биччаге. 4БЕТӀЕРГЬАН Аллагь вукӀине вуго нужеда цадахъ, нужер тушбабазда данде вагъизе ва нужее бергьенлъи кьезе мурадалда’.

5Хадуб биччанте церехъабаз рагъухъабазда абизе: ‘Нужер лъицаниги цӀияб мина бан батани, амма жеги гьениве вахъун ватичӀони, виччанте гьев рокъове тӀадвуссине. Гурони, гьев рагъда чӀвазе бегьула, цинги гьесул минаялъуве цогидав вахъина ва цогидас тӀобитӀила цӀияб минаялде рахъиналъул сухӀматги. 6Лъицаниги цӀолбол ах гӀезабун батани, амма жеги гьениса пихъалъул пайда босун батичӀони, виччанте гьев рокъове тӀадвуссине. Гурони, гьев рагъда чӀвазе бегьула, цинги гьесул ахил пихъалдаса цогидас пайда босила. 7Нужеда гьоркьоса лъиениги яс абун ятани, амма жеги бертин гьабун батичӀони, виччанте гьев рокъове тӀадвуссине. Гурони, гьев рагъда чӀвазе бегьула ва гьесул абурайги чияца ячина’. 8Хадуб халкъалъул церехъабаз абизе ккола: ‘Нужеда гьоркьов ватани ракӀ хӀинкъарав яги тамахав чи, виччанте гьединав чи рокъове тӀадвуссине, цогидазулги ракӀал тамахлъичӀого рукӀине’, – ян.

9Гьелдаса хадуб биччанте гьез аскаразда тӀад рагъул церехъаби тезе.

10Шагьаралде тӀаде гьужум гьабилалде цебе, цин нужергун ракълил къотӀи-къай гьабизе рес кье гьезие. 11Шагьаралъул жамагӀат гьелда разилъани ва гьез нужее каваби рагьани, риччанте гьел нужеда цере хӀалтӀизе. 12Амма гьез нужергун ракълил къотӀи-къай гьабичӀони, гьеб шагьар сверун ккве. 13БЕТӀЕРГЬАН Аллагьас гьеб шагьар нужер кверде кьун хадуб, гьенир ратарал тӀолалго бихьинал чӀвай. 14Руччабиги, лъималги, гӀи-боцӀиги нужеего давлалъун босе. Гьеб кинабго тушбабазул буголъиялдаса пайда босе, БЕТӀЕРГЬАН Аллагьас нужее кьун бугелъул гьеб. 15Гьедин гьабе нужедаса рикӀкӀада ругел, батӀиял ракьазул халкъазул шагьаразе.

16Амма БЕТӀЕРГЬАН Аллагьас нужее ирсалъе кьураб ракьалъул шагьаразда цониги инсан чӀаго тоге. 17ТӀуран тӀагӀинаре гьел – хитиялги, амориялги, ханааниялги, перизиялги, хивиялги, евусиялги – БЕТӀЕРГЬАН Аллагьасул рагӀуда рекъон. 18Гурони гьез нужги куцазе руго жидерго аллагьзабазе гьез гьарулел хъубал ишазде ва БЕТӀЕРГЬАН Аллагьасда цере нуж мунагьалъукье ккезе руго.

19Шагьар гӀемераб мехалъ сверун ккун бугони, гьенир ругел гъутӀбузе зарал гьабуге, гьезда гӀащтӀи хъваге. Гьездасан пихъ кванай, амма гъутӀби къотӀуге. Авлахъалда ругел гъутӀби гӀадамал гурелъул, гьезда данде рагъ гьабизе ккани. 20Пихъ бижуларел гъутӀби къотӀизе бегьула ва шагьар сверун кквезе щулалъаби разе хӀалтӀизаризе бегьула, дуда данде чӀараб шагьар кверде босизегӀан.

Currently Selected:

Къанун 20: АварАК

Highlight

Copy