Къанун 10

ЦӀиял къанал

(Тархъ. 34:1-9)

1Гьебмехалъ БЕТӀЕРГЬАНАС дида абуна: „КӀиго къоно бекӀкӀе дол цере рукӀарал къаназда релълъараб ва Дихъе магӀарде тӀаде вачӀа. Гьединго цӀулал гъамасги гьабе. 2Дица гьел къаназда хъвала дол дуца рекарал тӀоцересел къаназда рукӀарал рагӀаби ва дуца гьел КъотӀиялъул гъансида жанир лъела“.

3Дица акациялъул цӀулал гъамасги гьабуна, цере рукӀаразда релълъарал къаналги рекӀкӀана, ва гьелги росун магӀарде тӀаде вахана. 4БЕТӀЕРГЬАНАС, цебехунго гӀадин, гьезда тӀадги хъвана нужер жамагӀаталъе магӀарда тӀад цӀадуда гьоркьоса кьун букӀараб АнцӀго амру. Ва БЕТӀЕРГЬАНАС гьел дихъе кьуна. 5Цинги дун магӀардаса гъоркье вилълъана ва гьел дицаго гьабураб гъансида жанир лъуна. Гьанжеги гьенир руго гьел – гьедин амру гьабуна диде БЕТӀЕРГЬАНАС».

Гьарун хвей ва левитазул хъулухъ

6Беэрот-Бене-Яаканалдаса гӀизраилал ана Мосераялде. Гьенив Гьарун хвана ва гьенивго хабалъги вукъана; Гьарунил бакӀалда гьесул вас Элеазар тана кашишлъун. 7Гьениса гьел ана Гудгодалде, Гудгодалдаса иццал гӀемераб Йотбатаялде. 8Доб заманалда БЕТӀЕРГЬАНАС киналго къавмазда гьоркьоса Левийил къавм батӀа гьабуна ва гьезда тӀад къана БЕТӀЕРГЬАНАСУЛ КъотӀиялъул гъамас баччизе, гьединго БЕТӀЕРГЬАНАСДА цере чӀун кашишлъи гьабизе ва Гьесул цӀаралдалъун халкъалъе дугӀа гьабизе. Жакъа къоялъги гьеб гьедин буго. 9Гьединлъидалин левитазе, цогидал къавмазе гӀадин, ракьазул бутӀаби кьечӀел. БЕТӀЕРГЬАН Аллагьас абуралда рекъон, БЕТӀЕРГЬАН Живго вуго гьезул бутӀаги гьезул ирсги.

10«Цебесеб нухалъ гӀадин, кӀикъого къоги кӀикъого сордоги бана дица магӀарда ва БЕТӀЕРГЬАНАС дир гьари къабул гьабуна – гьаб нухалъги БЕТӀЕРГЬАНАС нуж хвезаричӀого тана. 11БЕТӀЕРГЬАНАС дида абуна: „Вахъа, халкъ цебе баче! Биччанте гьезул умумузе Дун гьедараб ракь гьез кверде босизе“.

Аллагьасул Къануналъул аслияб магӀна

12ГӀизраилил халкъ! Дур БЕТӀЕРГЬАН Аллагьас щиб дудаса тӀалаб гьабулеб бугеб? Гьес тӀалаб гьабулеб буго: мун БЕТӀЕРГЬАН Аллагьасукьа хӀинкъи, Гьесул нухда битӀун хьвади, Гьев дуе хиралъи, Гьесие дуца ракӀ-ракӀалъго, тӀолабго рухӀалдалъун ва къуват-жаналдалъун тӀагӀат-гӀибадат гьаби ва, 13дуего лъикӀ букӀиналъе гӀоло, жакъа дица кьурал Гьесул амрабиги къануналги дуца цӀуни.

14Дур БЕТӀЕРГЬАН Аллагьасул ккола зобалги, зобалазул зобалги, гьаб дунялги, дунялалда бугебщинабги. 15Амма БЕТӀЕРГЬАНАСЕ нужер умумул хиралъана ва тӀолалго халкъазда гьоркьоса нуж – гьезул наслаби – тӀаса рищана (гьедин буго жакъаги). 16Нужерго ракӀал тӀерен гьаре#10:16 РакӀал тӀерен гьаре – жугьутӀ мацӀалда «ракӀазе суннат гьабеян» хъван буго. ва малъараб босуларел согӀал чагӀилъун рукӀунге. 17Щайгурелъул нужер БЕТӀЕРГЬАН Аллагь вугелъул аллагьзабазулги Аллагь, бетӀергьанзабазулги БетӀергьан – хӀалкӀолъи цӀикӀкӀарав, къудратав, хӀинкъун рухӀ босизабулев, гьурмахъ-цӀарухъ балагьуларев, ришват босуларев! 18Бесдалазеги къоролзабазеги хӀалае вахъуна Гьев, апарагзаби рокьула Гьесие ва гьезие квенги ретӀелги кьола. 19Гьединлъидал нужееги рокьа чияр ракьалдаса рачӀарал чагӀи, Мисриялда нужгоги рукӀиндал чияр ракьалдаса рачӀараллъун. 20Дурго БЕТӀЕРГЬАН Аллагьасукьа хӀинкъа, Гьесие тӀагӀат гьабе, Гьесие ритӀухълъи цӀуне ва, гьа балаго, Гьесул цӀаралдалъун гурони гьедуге. 21ЦохӀо Гьесие гьабизе ккола дуца рецц! Гьев вуго дур Аллагь! Гьес дуе гӀоло кӀудиял ва хӀинкъарал хӀалкӀолъаби гьаруна ва гьеб кинабго дур беразда бихьана. 22Мисриялде гочараб мехалъ дур умумузул вукӀана 70 чи, гьанжейин абуни, БЕТӀЕРГЬАН Аллагьас зодир цӀвабигӀанги гӀемерлъизаруна нуж.

Currently Selected:

Къанун 10: АварАК

Highlight

Copy